ສຶກສາເຊກອງເຜີຍແຜ່ວຽກກີລາກາຍະກຳ ຢູ່ທ່າແຕ່ງ

  ໃນວັນທີ 18 ພະຈິກ 2020 ຜ່ານມານີ້, ພະແນກສຶກສາທິການ ແລະກີລາແຂວງເຊກອງລົງເຜີຍແຜ່ເອກະສານແຈ້ງການລະບຽບການກ່ຽວກັບວຽກງານກີລາກາຍະກຳມວນຊົນທົ່ວໂຮງຮຽນຂອງ ຢູ່ເມືອງທ່າແຕງແຂວງເຊກອງ ໂດຍການເປັນປະທານຂອງທ່ານ ອຸດົມໄຊ ດອມສະຫວັນວ່າການຫົວໜ້າຫ້ອງການສຶກສາທິການ ແລະກີລາເມືອງທ່າແຕງເປັນກຽດເຂົ້າ ຮ່ວມຂອງທ່ານ ແສງສຸບັນ ໄຊສະຫວັນ ຮອງເຈົ້າເມືອງໆທ່າແຕງ, ທ່ານ ໄຊຍະເພັດ ຊາພິຈິດ ຄະນະພະແນກສຶກສາທິການ ແລະກີລາ ແຂວງເຊກອງ, ຄູ-ອາຈານ, ຜູ້ບໍລິຫານການສຶກສາຂັ້ນເມືອງເຂົ້າຮ່ວມ.

  ທ່ານວິໄລພອນ ທຳມະວົງ ຫົວໜ້າຂະແໜງກີລາກະຍາກຳພະ ແນກສຶກສາທິການ ແລະກີລາແຂວງ ເຊກອງໄດ້ເຜີຍແຜ່ເອກະສານແຈ້ງການຂໍ້ຕົກລົງວ່າດ້ວຍການຈັດຕັ້ງສະເຫຼີມສະຫຼອງວັນກີລາກະຍາກຳແຫ່ງຊາດ ແລະຄຳແນະນຳຂອງລັດຖະມົນຕີວ່າດ້ວຍການຫັດກາຍກາຍະກຳບໍລິຫານ ແລະການອອກ ກຳລັງກາຍກາງໂມງພ້ອມທັງຜ່ານບົດສະຫຼຸບກີລາກາຍະກຳ 5 ປີ 20 16-2020 ວ່າ: ໃນທົ່ວແຂວງເຊກອງມີຜູ້ບໍລິຫານກີລາ-ກາຍະກຳທັງໝົດ 21 ທ່ານ ຄະນະສະມາຄົມກີລາແຂວງມີ 41 ທ່ານມີ 19 ສະຫະພັນກີລາປະເພດຕ່າງໆ, ສ້າງຄູຝຶກໄດ້ 29 ທ່ານ ກຳມະການຕັດສີນ 28 ທ່ານ ແລະນັກກີລາພອນສະຫວັນ 79 ທ່ານ ໃນທົ່ວແຂວງມີໂຮງຮຽນປະຖົມ ແລະມັດທະຍົມທັງໝົດ 266 ແຫ່ງ, ປະກາດເປັນໂຮງຮຽນປອດຢາເສບຕິດໄດ້ 125 ແຫ່ງເທົ່າກັບ 46,81%, ໃນນັ້ນມີໂຮງຮຽນປະຖົມ 47 ແຫ່ງປະກາດໄດ້ 41 ແຫ່ງ, ເທົ່າກັບ 87,23%, ໂຮງຮຽນປະຖົມ 220 ແຫ່ງປະກາດໄດ້ 84 ແຫ່ງເທົ່າກັບ 38,18%.

  ພ້ອມດຽວກັນກໍ່ໄດ້ຜ່ານເອກະສານຕ່າງໆກ່ຽວກັບວຽກງານກາຍະກຳມວນຊົນເພື່ອສ້າງຄວາມເຂັ້ມແຂງໃຫ້ວຽກງານກາຍະກຳພາລະສີລະປະສຶກສາໃຫ້ຜູ້ບໍລິຫານການສຶກສາທົ່ວເມືອງທ່າແຕງໄດ້ຮູ້ ແລະເຂົ້າໃຈວິທີການ ແລະຂັ້ນຕອນຕ່າງໆໃນການຈັດຕັ້ງປະຕິບັດການສ້າງໜ່ວຍກີລາສະໂມສອນກີລາ ແລະ  ອື່ນໆຈາກນັ້ນກໍ່ໄດ້ມີການ ແລກປ່ຽນປະກອບຄຳຄິດຄຳເຫັນຢ່າງກົງໄປກົງມາເພື່ອໃຫ້ການຈັດຕັ້ງປະຕິບັດຖືກຕ້ອງຕາມລະບຽບການ ແລະເພື່ອສ້າງຄວາມເຂັ້ມແຂງໃຫ້ວຽກງານກາຍະກຳພາລະ ແລະສີລະປະສຶກສາໃຫ້ຜູ້ບໍລິຫານການສຶກສາໃນທົ່ວເມືອງທ່າແຕງ ປະຈຳປີ 2020 ອີກດ້ວຍ.

----

ໂດຍ: ລັດຕະນາ ຄຳສົມພູ

แชร์