ຊາວກະສິກອນເມືອງອາດສະພັງທອງ ເກັບກ່ຽວເຂົ້ານາປີໃກ້ສຳເລັດແລ້ວ

  ການເກັບກ່ຽວມ້ຽນມັດຜົນລະຜິດລະດູຝົນ ໂດຍສະເພາະເຂົ້ານາປີຂອງຊາວກະສິກອນເມືອງອາດສະພັງທອງມາຮອດປະຈຸບັນແມ່ນໃກ້ຈະສຳເລັດແລ້ວທັງ ຍັງສາມາດປູກພືດລະດູແລ້ງໄດ້ແລ້ວ 148 ເຮັກຕາຈາກແຜນການຜະລິດ 2.600 ເຮັກຕາ.

  ທ່ານ ພອນເພັດ ໄຊປັນຍາຫົວໜ້າຫ້ອງການກະສິກໍາ-ປ່າໄມ້ເມືອງອາດສະພັງທອງໃຫ້ຮູ້ວ່າ: ການຜະລິດກະສິກໍາຢູ່ເມືອງອາດສະພັງທອງ ແຂວງສະຫວັນເຂດໃນປີນີ້ບໍ່ໄດ້ຮັບໝາກຜົນເທົ່າທີ່ຄວນເນື່ອງຈາກວ່າສະພາບດິນຟ້າອາອາດບໍ່ເອື້ອອໍານວຍຝົນຕົກກະແຈກກະຈາຍເລັກນ້ອຍເຮັດໃຫ້ຂະບວນການຜະລິດຂອງຊາວກະສິກອນພາຍໃນເມືອງຫັນປ່ຽນຮູບ ແບບການຜະລິດຈາກນາທີ່ເຄີຍປັກດຳຫັນມາເຮັດນາຢອດ ແລະນາຫວ່ານຈຳນວນຫຼວງຫຼາຍຊຶ່ງເນື້ອທີ່ໃນທົ່ວເມືອງສາມາດຜະລິດນາປີໄດ້ທັງໝົດ 13.099 ເຮັກຕາ, ມາຮອດປະຈຸບັນນີ້ສາມາດເກັບກ່ຽວເຂົ້ານາປີສຳເລັດແລ້ວ 95% ຂອງເນື້ອທີ່ການຜະລິດ ທັງໝົດ.

  ນອກຈາກການເກັບກ່ຽວເຂົ້ານາປີແລ້ວຊາວກະສິກອນຍັງໄດ້ລົງມືປູກພືດລະດູແລ້ງ ຊຶ່ງການຜະລິດລະດູແລ້ງໃນສົກປີ 2020-2021 ນີ້ມີເນື້ອທີ່ແຜນ ການ 2.600 ເຮັກຕາ, ປະຈຸບັນລົງມືປູກໄດ້ແລ້ວ 148 ເຮັກຕາປະເພດພືດທີ່ນຳມາປູກເປັນຕົ້ນແມ່ນ: ໝາກຖົ່ວ, ໝາກແຕງ, ໝາກແຕງໂມ ແລະພືດຜັກຕ່າງໆ.

 ----

ໜັງສືພິມ ເສດຖະກິດ-ສັງຄົມ

แชร์