ເຈົ້າແຂວງຈຳປາສັກ ຕ້ອນຮັບຄະນະໜ່ວຍງານກວດກາສູນກາງພັກ

  ວັນທີ 23 ພະຈິກ 2020 ທີ່ຫ້ອງປະຊຸມຫຼັກ 4 ແຂວງຈຳປາສັກ, ທ່ານ ວິໄລວົງ ບຸດດາຄຳ ເຈົ້າແຂວງໆຈຳປາສັກ ໄດ້ຕ້ອນຮັບຄະນະໜ່ວຍງານກວດກາຈາກຄະນະກວດກາສູນກາງພັກນຳ ໂດຍທ່ານ ຕຽງທອງ ສີສຸວັນນະແສງ ຮອງຫົວໜ້າກົມກວດກາລັດທ້ອງຖິ່ນອົງການກວດກາລັດຖະບານ, ພ້ອມຄະນະ, ມີຄະນະກວດກາພັກ-ລັດແຂວງຈຳປາສັກ ເຂົ້າຮ່ວມ.

  ໃນການລົງມາເຄື່ອນໄຫວຂອງຄະນະໜ່ວຍງານກວດກາຈາກຄະນະກວດກາສູນກາງພັກແຜນວຽກຕົ້ນຕໍກໍ່ແມ່ນ: ສືບຕໍ່ດຳເນີນການເຄື່ອນໄຫວກວດກາບັນ ດາຂໍ້ຕົກລົງຂອງການນຳຂັ້ນສູງ ແຂວງຈຳປາສັກ ສະໄໝທີ 7 ຈຳນວນໜຶ່ງທີ່ຍັງຄ້າງ, ການຕົກລົງຫັນສິດນຳໃຊ້ທີ່ດິນໃຫ້ບຸກຄົນ, ນິຕິບຸກຄົນ, ການຕົກລົງປະຕິບັດນະໂຍບາຍ, ການແຕ່ງຕັ້ງຄະນະກຳມະການອື່ນໆ ແລະການຕົກລົງກ່ຽວກັບການຈັດຕັ້ງປະຕິບັດໂຄງການລົງທຶນຂອງລັດພ້ອມກັນນັ້ນ, ຈະໄດ້ລົງກວດກາຄືນຂອງແຕ່ລະໂຄງການໃຫ້ລະອຽດຈະແຈ້ງລວມທັງໂຄງການກໍ່ສ້າງດ່ານສາກົນວັງເຕົ່າ  ແລະໂຄງການກໍ່ສ້າງປ້ອງກັນຕະຝັ່ງເຈື່ອນແຄມຂອງຢູ່ນະຄອນປາກເຊ ແຂວງຈຳປາສັກ, ແບບການຈັດສັນສວນສາທາລະນະລຽບແຄມຂອງຂອງໂຄງການ ດັ່ງກ່າວ.

  ໂອກາດນີ້, ທ່ານ ວິໄລວົງ ບຸດດາຄຳ ເຈົ້າແຂວງໆຈຳປາສັກໄດ້ກ່າວຕ້ອນຮັບ ແລະໄດ້ຊີ້ນຳໃຫ້ພາກສ່ວນຂອງແຂວງຈຳປາສັກກໍ່ຄືຄະນະກວດກາພັກ-ລັດແຂວງສົມທົບກັບຂະແໜງການກ່ຽວຂ້ອງໃນການອຳນວຍຄວາມສະດວກ ແລະແບ່ງຄວາມຮັບຜິດຊອບລະ ຫວ່າງສູນກາງ ແລະທ້ອງຖິ່ນໃນແຜນດຳເນີນງານຂອງຄະນະໜ່ວຍງານກວດກາຈາກຄະນະກວດກາສູນກາງພັກສືບຕໍ່ວຽກງານກວດກາຢູ່ແຂວງຈຳປາສັກແລ້ວລວບລວມລາຍງານຄືນເພື່ອຄົ້ນຄວ້າວິທີການແກ້ໄຂໃນຕໍ່ໜ້າເພື່ອຄວາມເປັນເອກະພາບທັງສູນກາງ ແລະທ້ອງຖິ່ນເພື່ອໃຫ້ວຽກງານດັ່ງກ່າວໄດ້ຮັບຜົນສຳເລັດຕາມລະດັບຄາດໝາຍ.

----

ຂ່າວ: ທັດຊະນະ  

แชร์