ບໍລິການຂົນສົ່ງ ແລະສ້ອມແປງພາຄອບຄົວພົ້ນທຸກ

 ຖືເອົາການປະກອບອາຊີບບໍລິການຂົນສົ່ງ ແລະບໍລິການສ້ອມແປງຈົນກາຍເປັນຄອບຄົວຕົວແບບທີ່ສາມາດສ້າງລາຍຮັບໄດ້ 400 ລ້ານກີບຕໍ່ປີການເຮັດທຸລະກິດການບໍລິ ການຂົນສົ່ງສິນຄ້າເປັນທາງເລືອກໜຶ່ງທີ່ ທ່ານ ຈັນເພັງ ແສງແກ້ວ ໄດ້ເລືອກເຮັດຈົນພາໃຫ້ຊີວິດການເປັນຢູ່ຂອງຄອບຄົວດີຂຶ້ນເທື່ອລະກ້າວ.

  ທ່ານ ຈັນເພັງ ແສງແກ້ວ ອາຍຸ 53 ປີ ກຸ່ມພັດທະນາທີ 6 ເມືອງປາກອູ ແຂວງຫຼວງພະບາງ ໄດ້ຖືເປັນອາຊີບຫຼັກຈົນກາຍເປັນຄອບຄົວຕົວແບບໃຫ້ຮູ້ວ່າ: ຄອບຄົວມີ ທັງໝົດ 12 ຄົນ, ຍິງ 8 ຄົນ, ມີ 7 ແຮງງານ, ອາຊີບເມື່ອກ່ອນແມ່ນເຮັດນາເຮັດໃຫ້ຊີວິດການເປັນຢູ່ພໍແຕ່ກຸ້ມກິນ, ການໃຊ້ຈ່າຍ, ສົ່ງລູກຮຽນຍັງບໍ່ພຽງພໍມາຮອດປີ 1997 ໄດ້ຫັນປ່ຽນອາຊີບຄື: ໄດ້ຊື້ລົດມາແລ່ນໂດຍສານ, ຄ້າຂາຍ,ເກັບຊື້ເຄື່ອງນາຂອງປ່າມາຂາຍສາມາດສ້າງລາຍຮັບສະເລ່ຍໄດ້ 100 ລ້ານກີບຕໍ່ປີ, ເຮັດໃຫ້ຄອບຄົວມີຊີວິດດີຂຶ້ນ, ມາຮອດປີ 2007 ທ່ານ ຈັນເພັງ ແສງແກ້ວ ໄດ້ຊື້ລົດ 12 ລໍ້ຕື່ມ 1 ຄັນ ແລະມາຮອດປີ 2009 ໄດ້ຊື້ລົດ 12 ລໍ້ຕື່ມ 1 ຄັນ ເພື່ອມາຕ່າງເຄື່ອງຂົນສົ່ງສາມາດສ້າງລາຍຮັບເຂົ້າຄອບຄົວສະເລ່ຍໄດ້ 300 ລ້ານກີບ ຕໍ່ປີເຫັນວ່າຊີວິດການເປັນຢູ່ດີຂຶ້ນກວ່າເກົ່າ, ແຕ່ມາຮອດປີ 2011 ເຫັນວ່າການແລ່ນລົດມີລາຍຮັບຫຼຸດລົງ ຈຶ່ງໄດ້ຫັນປ່ຽນຈາກການແລ່ນລົດມາສ້າງຮ້ານສ້ອມແປງລົດໃຫຍ່ໄດ້ 1 ຫຼັງ ສາມາດສ້າງລາຍຮັບເພີ່ມສະເລ່ຍໄດ້ 400 ລ້ານກີບຕໍ່ປີ ເຮັດໃຫ້ຊີວິດການເປັນຢູ່ພາຍໃນຄອບຄົວຫຼຸດພົ້ນອອກຈາກຄອບຄົວທຸກຍາກໄດ້ກາຍມາເປັນຄອບຄົວພັດທະນາ,ຜ່ານການສະສົມທຶນຮອນມາແຕ່ລະປີມາຮອດປະຈຸບັນສາມາດພັດທະນາຄອບຄົວໄດ້ດີຂຶ້ນເປັນລຳດັບສະແດງອອກມີເຮືອນຖາວອນ 1 ຫຼັງ,ມີລົດຮັບໃຊ້ຄອບຄົວປະເພດລົດ 12 ລໍ້ 2 ຄັນ,ລົດດ່າມ 1 ຄັນ, ລົດຮຸ່ນໄດ 2 ຄັນ,ລົດກະບະ 2 ຄັນ ແລະລົດຈັກ 2 ຄັນ, ໃນຕໍ່ໜ້າຈະສືບຕໍ່ຂະຫຍາຍກິດຈະການໃຫ້ກວ້າງຂວາງຂຶ້ນຕື່ມເພື່ອສ້າງລາຍຮັບເຂົ້າຄອບຄົວໃຫ້ໄດ້ຫຼາຍກວ່າເກົ່າ, ພ້ອມນັ້ນຈະໄດ້ຊອກພະນັກງານຜູ້ທີ່ມີຄວາມຊໍານານ, ມີປະສົບການມາປະກອບເຂົ້າໃນການສ້ອມແປງລົດທຸກປະເພດ.

  ໂອກາດນີ້ທ່ານໄດ້ຮຽກຮ້ອງເຖິງຜູ້ທີ່ມີຄວາມສົນໃຈ, ມີເງື່ອນໄຂຢາກຫັນມາເຮັດທຸລະກິດແບບດຽວກັນສາມາດມາຖອດຖອນບົດຮຽນນໍາໄດ້ພ້ອມແລ້ວທີ່ຈະຖ່າຍທອດບົດຮຽນໃຫ້. ນອກຈາກເປັນຄອບຄົວຕົວແບບແລ້ວ ທ່ານ ຈັນເພັງ ແສງແກ້ວ ແມ່ນໄດ້ຮັບໜ້າທີ່ເປັນເລຂາພັກບ້ານນາຍ ບ້ານຫາດປາງ ຊຶ່ງເປັນອີກບ້ານໜຶ່ງທີ່ເປັນຕົວແບບກ່ຽວກັບໜ່ວຍພັກນໍາພາປະຊາຊົນຫຼຸດພົ້ນອອກຈາກຄວາມທຸກຍາກ.

-------------------

ຂ່າວ: ສົມລິດ ແສງທິວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์