ປາກແຊງສະຫຼຸບການດຳເນີນທຸລະກິດປຸງແຕ່ງ ແລະແປຮູບຜະລິດຕະພັນໄມ້

  ເມື່ອບໍ່ດົນມານີ້ຫ້ອງການອຸດສາຫະກຳ ແລະການຄ້າເມືອງປາກແຊງແຂວງຫຼວງພະບາງໄດ້ຈັດກອງປະຊຸມສະຫຼຸບຕີລາຄາການດຳເນີນທຸລະກິດການປຸງແຕ່ງ ແລະແປຮູບຜະລິດຕະພັນໄມ້ປະຈຳປີ 2020 ແລະ ວາງທິດທາງແຜນການ 2021 ທີ່ຫ້ອງປະຊຸມຫ້ອງການເງິນເມືອງ,ໂດຍເປັນປະທານຂອງ ທ່ານ ອານຸສັກ ພອນສະ ຫວັນ ຮອງເຈົ້າເມືອງປາກແຊງ, ມີຂະແໜງຫ້ອງການອ້ອມຂ້າງ ແລະຜູ້ປະກອບການດ້ານທຸລະກິດປຸງແຕ່ງໄມ້ຢູ່ພາຍໃນເມືອງເຂົ້າຮ່ວມ.

  ທ່ານ ວົງສອນ ຈັນທະຈິດ ຫົວໜ້າຫ້ອງການອຸດສາຫະກໍາ ແລະ ການຄ້າເມືອງໄດ້ລາຍງານກ່ຽວກັບການດຳເນີນທຸລະກິດຂອງຫົວໜ່ວຍທຸລະກິດໂຮງງານການປຸງ ແຕ່ງໄມ້, ໂຮງງານເຟີນີເຈີປະຈຳປີ 2020 ວ່າ: ທົ່ວເມືອງປະກອບມີໂຮງງານອຸດສາຫະກຳປຸງແຕ່ງໄມ້ທັງໝົດ 9 ແຫ່ງ, ໃນນີ້ໂຮງງານທີ່ແຂວງເປັນຜູ້ຄຸ້ມຄອງ 7 ແຫ່ງ, ມີໂຮງງານປະເພດ 1 ຈໍານວນ 1 ແຫ່ງ, ມີທຶນຈົດທະບຽນ 4 ຕື້ກີບ, ໂຮງງານປະເພດ2 ມີ 1 ແຫ່ງ, ມີທຶນຈົດທະບຽນ 300 ລ້ານກີບ, ໂຮງງານປະເພດ 3 ມີ 5 ແຫ່ງ, ມີທຶນຈົດທະບຽນ 300 ລ້ານກວ່າກີບ ແລະ ບໍ່ໄດ້ຂຶ້ນທະບຽນ 2 ແຫ່ງ, ໄລຍະຜ່ານມາຂະແໜງການທີ່ກ່ຽວຂ້ອງຂອງເມືອງໄດ້ເອົາໃຈໃສ່ເຄື່ອນໄຫວກວດກາ, ຕິດຕາມ ແລະຊຸກຍູ້ໂຮງງານການປຸງແຕ່ງແລະ ແປຮູບຜະລິດຕະພັນໄມ້ໃຫ້ກາຍ ເປັນໃຈກາງໃນການຜະລິດ, ເພື່ອຕອບສະໜອງຄວາມຕ້ອງການຂອງຜູ້ຊົມໃຊ້ໃນສັງຄົມ, ສາມາດຈຳໜ່າຍຢູ່ພາຍໃນເມືອງໄດ້ທັງໝົດ 2,2 ຕື້ກີບ ແລະຈຳໜ່າຍພາຍໃນແຂວງ-ຕ່າງແຂວງມີມູນຄ່າ 1,7 ຕື້ກີບ.

   ນອກນັ້ນຜູ້ເຂົ້າຮ່ວມໄດ້ປະກອບຄໍາເຫັນໃສ່ບົດສະຫຼຸບເພື່ອຄວາມເປັນເອກະພາບທາງດ້ານເນື້ອໃນ ແລະສອດຄ່ອງກັບລະບຽບກົດໝາຍທີ່ກຳນົດໄວ້, ຕອນທ້າຍທ່ານ ອານຸສັກ ພອນສະຫວັນ ໄດ້ເນັ້ນໜັກໃຫ້ທຸກພາກສ່ວນເປັນເຈົ້າການຈັດຕັ້ງປະຕິບັດກົດລະບຽບ-ກົດໝາຍໃຫ້ໄດ້ຢ່າງເຂັ້ມງວດ, ທັງຄຸ້ມຄອງການຜະລິດ ແລະປຸງແຕ່ງຜະລິດຕະພັນໄມ້ໃຫ້ກາຍເປັນສິນຄ້າທີ່ສ້າງລາຍຮັບໃຫ້ກັບຜູ້ປະກອບການລວມທັງປະຊາຊົນບັນດາເຜົ່າພາຍໃນເມືອງ.

แชร์