ຊາວບ້ານຫ້ວຍຊຳອໍ້ ຊົມໃຊ້ນ້ຳສະອາດ

  ບ້ານຫ້ວຍຊໍາອໍ້ ເປັນບ້ານໜຶ່ງທີ່ຂຶ້ນກັບ ເມືອງໄຊຍະບູລີ ແຂວງ ໄຊຍະບູລີ ມີທີ່ຕັ້ງຫ່າງຈາກເທສະບານເມືອງ 30 ກິໂລແມັດ, ມີ 27 ໜ່ວຍ ຄຸ້ມຄອງ, ມີ 272 ຄອບ ຄົວ, ມີປະຊາກອນ 1.837 ຄົນ, ຍິງ 894 ຄົນ, ບ້ານດັ່ງກ່າວຜ່ານມາແມ່ນມີຄວາມຫຍຸ້ງຍາກລໍາບາກຍ້ອນຂາດນໍ້າກິນ-ນໍ້າໃຊ້, ແມ່ຍິງ ແລະເດັກນ້ອຍໄດ້ໃຊ້ແຮງງານໄປຕັກນໍ້າໄກ, ຍາມແລງນໍ້າບົກແຫ້ງ,ແຕ່ກົງກັນຂ້າມລະດູຝົນນໍ້າພັດຂຸ່ນ,ດ້ວຍເຫດນີ້ລັດຖະບານ ແລະປະຊາຊົນຍີ່ປຸ່ນໂດຍສະເພາະແມ່ນເອກອັກຄະລະຊະທູດຍີ່ປຸ່ນປະຈໍາລາວຈຶ່ງໄດ້ໃຫ້ທຶນອັນມະຫາສານເພື່ອຊ່ວຍສ້າງລະບົບນໍ້າ ລິນໃຫ້ກັບປະຊາຊົນບ້ານຫ້ວຍຊໍາອໍ້.

 ພິທີມອບ-ຮັບໂຄງການກໍ່ສ້າງລະບົບນໍ້າລິນ ບ້ານຫ້ວຍຊໍາອໍ້ ໄດ້ຈັດຂຶ້ນໃນວັນທີ 23 ກຸມພາ ຜ່ານມາທີ່ບ້ານ ດັ່ງກ່າວ, ເປັນກຽດເຂົ້າຮ່ວມມີທ່ານ ພົງສະ ຫວັນ ສິດທະວົງ ເຈົ້າແຂວງໄຊຍະບູລີ, ທ່ານ ຕາເກສິ ຮີກິຮາລະ ເອກອັກຄະລະຊະທູດຍີ່ປຸ່ນປະຈໍາລາວ, ພ້ອມ ພັນລະຍາ, ມີລັດຖະມົນຕີກະຊວງສາທາລະນະສຸກ, ພະນັກງານການນໍາຂອງແຂວງ,  ພະນັກງານຫຼັກແຫຼ່ງຂອງເມືອງ ໄຊຍະບູລີ ແລະປະຊາຊົນບ້ານຫ້ວຍຊໍາອໍ້ເຂົ້າຮ່ວມຢ່າງຫຼວງຫຼາຍ.

  ໂຄງການກໍ່ສ້າງລະບົບນໍ້າລິນບ້ານຫ້ວຍຊໍາອໍ້ໄດ້ເລີ່ມລົງມືກໍ່ສ້າງແຕ່ເດືອນ ພຶດສະພາ ຫາ ເດືອນສິງຫາແມ່ນສໍາເລັດ 100%, ໂດຍມີໜ້າວຽກເຊັ່ນ: ກໍສ້າງຫົວງານ 1 ແຫ່ງ, ຂຸດຮ່ອງ ແລະ ວາງທໍ່ນໍ້າແຕ່ຫົວງານຫາບ່ອນຕິດຕັ້ງອ່າງມີຄວາມຍາວ 5,2 ພັນແມັດ, ກໍ່ ສ້າງອ່າງລົດຄວາມດັນນໍ້າ 1 ແຫ່ງ, ກໍ່ ສ້າງອ່າງເກັບນໍ້າຂະໜາດ 42 ແມັດກ້ອນ 1 ອ່າງ, ຕັ້ງເສົາເບຕົງຂ້າມນໍ້າ 1 ຈຸດ, ວາງທໍ່ ແລະຕິດຕັ້ງກ້ອກນໍ້າ 18  ກ້ອກ, ກໍ່ສ້າງຝາຍຕັນນໍ້າຍາວ 7 ແມັດ, ສູງ 1 ແມັດ, ກໍ່ສ້າງອ່າງຂະໜາດນ້ອຍ ມີ 3 ຫ້ອງ ພ້ອມດ້ວຍລະບົບເປີດ-ປິດ, ກໍ່ ສ້າງອ້າງເກັບນໍ້າເປັນລະບົບເບຕົງເສີມ ເຫຼັກສູງ 2,4 ແມັດ, ກວ້າງ 5 ແມັດ, ມີຝາປິດ, ບັນຈຸນໍ້າ 42 ແມັດກ້ອນ.

  ໂຄງການກໍ່ສ້າງລະບົບນໍ້າລິນດັ່ງ ກ່າວໂດຍແມ່ນພະນັກງານຈາກພະແນກ ສາທາລະນະສຸກແຂວງ, ເມືອງໄຊຍະບູລີ ແລະປະຊາຊົນຮ່ວມກັນກໍ່ສ້າງ, ມີມູນຄ່າທັງໝົດເກືອບ 80 ພັດກວ່າໂດລາ, ໃນນັ້ນທຶນຊ່ວຍເຫຼືອລ້າຈາກລັດຖະບານ ແລະປະຊາຊົນ ຍີ່ປຸ່ນມູນຄ່າ 72 ພັນກວ່າໂດລາສະຫະລັດ, ທຶນສົມຈາກປະ ຊາຊົນບ້ານຫ້ວຍຊໍາອໍ້ 83 ລ້ານກວ່າກີບ.

ຂ່າວ: ອຸ່ນເຮືອນ-ນສພ ເສດຖະກິດ-ສັງຄົມ     

แชร์