ທ່ານ ທອງສະຫວັນ ພົມວິຫານ ຢ້ຽມຢາມໂຄງການຊ່ວຍເຫຼືອຈາກປະເທດໄທ

  ເພື່ອເປັນການປະກອບສ່ວນເຂົ້າໃນການສ້າງບັນຍາກາດ ແລະສະພາບແວດລ້ອມອັນດີໃຫ້ແກ່ການພົວພັນແລະຮ່ວມມືລະຫວ່າງລາວ-ໄທ ໃນໂອກາດສະເຫຼີມສະຫຼອງຄົບຮອບ 70 ປີການສ້າງຕັ້ງສາຍພົວພັນການທູດລາວ-ໄທ (19 ທັນວາ 1950-19 ທັນວາ 2020) ໃນປີ2020, ທັງເປັນການຕິດ ຕາມ ແລະຊຸກຍູ້ການຈັດຕັ້ງ ປະຕິບັດບັນດາໂຄງການຮ່ວມມືຕ່າງໆລະຫວ່າງລາວ ແລະໄທໃຫ້ມີຄວາມຍືນຍົງ ແລະສໍາເລັດຕາມເປົ້າໝາຍ, ໃນລະຫວ່າງວັນທີ 18-20 ພະຈິກ 2020, ທ່ານ ທອງສະຫວັນ ພົມວິຫານຮອງລັດຖະມົນຕີກະຊວງການຕ່າງປະເທດໄດ້ນໍາພາຄະນະເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງຈໍາປາສັກ ແລະແຂວງສະຫວັນນະເຂດ, ຊຶ່ງເປັນສອງແຂວງ ທີ່ມີຊາຍແດນຕິດຈອດກັບຣາຊະອານາຈັກໄທ ແລະມີໂຄງການຮ່ວມມື ລາວ-ໄທ.
  ໃນໂອກາດເຄື່ອນໄຫວເຮັດວຽກໃນຄັ້ງນີ້, ທີ່ແຂວງຈຳປາສັກ, ຄະນະໄດ້ຢ້ຽມຢາມສູນສຶກສາການພັດທະນາກະສິກໍາເຂດພູພຽງບໍລະເວນ, ເມືອງປາກຊ່ອງ, ແຂວງຈໍາປາສັກທີ່ໄດ້ຮັບການສ້າງຕັ້ງຂຶ້ນໃນ ປີ 2015 ແລະຄາດວ່າຈະໄດ້ຮັບການມອບ-ຮັບໃນປີ 2021 ນີ້ໂຄງການດັ່ງກ່າວໄດ້ຮັບການຊ່ວຍເຫຼືອຈາກມູນນິທິໄຊພັດທະນາແຫ່ງຣາຊະອານາຈັກໄທໂດຍມີຈຸດປະສົງເພື່ອຄົ້ນຄວ້າ ແລະທົດລອງກ້າເບ້ຍໄມ້ເຂດໜາວເພື່ອແຈກຢາຍໃຫ້ປະຊາຊົນໃນເຂດດັ່ງກ່າວທຳການຜະລິດຈາກນັ້ນ, ຄະນະໄດ້ສືບຕໍ່ຢ້ຽມຢາມໂຄງການພັດທະນາໂຮງໝໍເມືອງປາກຊ່ອງ, ແຂວງຈໍາປາສັກ, ຊຶ່ງເປັນໂຄງການຊ່ວຍເຫຼືອພາຍໃຕ້ການຮ່ວມມືດ້ານວິຊາການລາວ-ໄທໃນມູນຄ່າ 25 ລ້ານບາດລວມມີຕຶກກວດພະຍາດເຂດນອກ, ຫ້ອງຜ່າຕັດ ແລະຕຶກອົບເຄື່ອງ ແລະອຸປະກອນການແພດ ແລະໄດ້ມີການມອບ-ຮັບໃນປີ 2018 ຜ່ານມາໃນໂອກາດຢ້ຽມຢາມແຂວງຈໍາປາສັກ ຄັ້ງນີ້, ທ່ານຮອງລັດຖະມົນຕີ ແລະຄະນະຍັງໄດ້ພົບປະກັບທ່ານ ມະໄລທອງ ກົມມະສິດ, ຮອງເລຂາຄະນະພັກແຂວງ, ຮອງ ເຈົ້າແຂວງຈຳປາສັກ ແລະໄດ້ໂອ້ລົມກັບພະແນກການຕ່າງປະເທດ ແຂວງດັ່ງກ່າວເພື່ອແລກປ່ຽນບົດ ຮຽນໃນການເຄື່ອນໄຫວວຽກງານຕ່າງປະເທດໃຫ້ມີປະສິດທິພາບສູງ ໂດຍສອດຄ່ອງກັບສະພາບການພາຍໃນປະເທດ, ພາກພື້ນ ແລະສາກົນອີກດ້ວຍ.
ສຳລັບທີ່ແຂວງສະຫວັນນະເຂດ, ຄະນະໄດ້ຢ້ຽມຢາມ ແລະຮັບຟັງຜົນສຳເລັດໃນການພັດທະນາ ແລະບໍລິການກະສິກໍາ-ປ່າໄມ້ ຂອງສູນພັດທະນາ ແລະບໍລິການກະສິກໍາ-ປ່າໄມ້ໜອງເຕົ່າ, ຊຶ່ງເປັນ ໂຄງການທີ່ໄດ້ຮັບການຊ່ວຍເຫຼືອຈາກມູນນິທິໄຊພັດທະນາແຫ່ງຣາຊະອານາຈັກໄທ ເພື່ອຊ່ວຍສ້າງ ຄວາມເຂັ້ມແຂງທາງດ້ານວິຊາການ ແລະຖ່າຍທອດເຕັກໂນໂລຊີທາງດ້ານກະສິກຳໃຫ້ແກ່ຊາວກະສິກອນຂອງລາວຈາກນັ້ນ, ຄະນະຍັງໄດ້ພົບປະກັບທ່ານ ທ່ອນ ແກ້ວ ພຸດທະໄກຍະລາດ, ກໍາມະການປະຈໍາພັກແຂວງ, ຮອງເຈົ້າ ແຂວງສະຫວັນນະເຂດ ແລະໄດ້ໄປຢ້ຽມຢາມຈຸດກວດກາ-ປະຕູດຽວ (CCA) ທີ່ດ່ານສາກົນຂົວມິດຕະ ພາບລາວ-ໄທແຫ່ງທີ 2 (ສະຫວັນນະເຂດ-ມຸກດາຫານ) ເພື່ອຮັບຟັງຄວາມຄືບໜ້າໃນການດໍາເນີນວຽກງານກວດກາສິນຄ້າຜ່ານລະບົບປະຕູດຽວລະຫວ່າງ ລາວ ກັບ ໄທ ແລະຍັງໄດ້ຢ້ຽມຢາມບໍລິສັດນໍ້າຕານມິດລາວທີ່ເປັນໂຄງການລົງທຶນຂະໜາດໃຫ່ຍ ແລະມີຜົນສຳເລັດສູງຂອງປະເທດໄທໃນການຜະລິດນໍ້າຕານຢູ່ແຂວງສະຫວັນນະເຂດ.
  ການເຄື່ອນໄຫວຢ້ຽມຢາມ ແລະເຮັດວຽກຢູ່ທັງສອງແຂວງ ໃນຄັ້ງນີ້ ໄດ້ຮັບຜົນສໍາເລັດຢ່າງຈົບງາມ ແລະໄດ້ປະກອບສ່ວນອັນສໍາຄັນເຂົ້າໃນການສະເຫຼີມສະ ຫຼອງຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດລາວ-ໄທ ກໍຄືຊ່ວຍສົ່ງເສີມການພົວພັນຮ່ວມມືອັນດີງາມຖານປະເທດບ້ານໃກ້ເຮືອນຄຽງທີ່ມີມາແຕ່ບູຮານນະການລະຫວ່າງສອງປະເທດລາວ ແລະໄທ ໃຫ້ມີຄວາມແໜ້ນເເຟ້ນ ແລະຂະຫຍາຍຕົວຍິ່ງໆຂຶ້ນໃນອະນາຄົດ.

----

ໜັງສືພິມ ເສດຖະກິດ-ສັງຄົມ

แชร์