ຍົກລະດັບໃຫ້ຜູ້ປະກອບການທ່ອງທ່ຽວ ເມືອງກະລຶມ

  ທ້າຍອາທິດຜ່ານມານີ້ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງເຊກອງຮ່ວມກັບຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວເມືອງກະລຶມໄດ້ຈັດຝຶກອົບຮົມການບໍລິການທ່ອງທ່ຽວໃຫ້ແກ່ຫົວໜ່ວຍຜູ້ປະກອບການທຸລະກິດການທ່ອງທ່ຽວທີ່ເມືອງກະລຶມ,ແຂວງເຊກອງໂດຍການເຂົ້າຮ່ວມເປັນປະທານຂອງທ່ານນາງ ວຽງສະໄໝ ວົງວິຈິດຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ,ທ່ານ ແສນວັງ ເວນສິລິປິ້ນ ຫົວໜ້າຫ້ອງການຖະແຫຼງຂ່າວ, ວັດ ທະນະທຳ ແລະທ່ອງທ່ຽວ, ມີຄູຝຶກຈາກຂະແໜງການທ່ອງທ່ຽວແຂວງ, ໜ່ວຍງານທ່ອງທ່ຽວຂັ້ນເມືອງ ແລະຜູ້ປະກອບການທຸລະກິດເຮືອນພັກ, ຮ້ານອາຫານ, ກິນດື່ມ, ຄາຣາໂອເກະ ແລະບັນເທີງເຂົ້າຮ່ວມ.

  ການຝຶກອົບຮົມໃນຄັ້ງນີ້ແມ່ນເພື່ອຍົກລະດັບຄວາມຮູ້ພື້ນຖານດ້ານການບໍລິການໃຫ້ແກ່ຜູ້ປະກອບການທຸລະກິດການທ່ອງທ່ຽວໃນທົ່ວເມືອງກະລຶມຊຶ່ງຈະໄດ້ຮຽນຮູ້ຂັ້ນຕອນການປະຕິບັດງານທີ່ເປັນມາດຕະການ, ຂັ້ນຕອນໃນການກະກຽມອຸປະກອນ, ຂັ້ນຕອນການເຮັດຄວາມສະອາດຫ້ອງແຂກ, ການມ້ຽນຕຽງ, ການປູຕຽງ, ການເປີດຕຽງ, ການຮັກສາພາບຫຼັກທີ່ເປັນມືອາຊີບ, ຄຸນນະພາບຂອງການບໍລິການກັບລູກຄ້າປະກອບມີ 3 ວິຊາຄື: ການບໍລິການແມ່ເຮືອນ, ການບໍລິການຕ້ອນຮັບສ່ວນໜ້າ, ການບໍລິການອາຫານ ແລະເຄື່ອງດື່ມຊຶ່ງໄດ້ແບ່ງອອກເປັນສອງພາກຄື: ພາກທິດສະດີ ແລະພາກປະຕິບັດຕົວຈິງ, ທັງນີ້ກໍເພື່ອແນໃສ່ເຮັດໃຫ້ການບໍລິການທຸລະ ກິດທ່ອງທ່ຽວຢູ່ແຂວງເຊກອງເວົ້າລວມເວົ້າສະເພາະກໍຄືຢູ່ເມືອງກະລຶມໄດ້ຮັບຄຸນນະພາບສູງພ້ອມທັງເປັນການຟື້ນຟູຜົນກະທົບຈາກການລະບາດຂອງພະຍາດໂຄວິດ- 19.

   ພາຍຫຼັງສໍາເລັດຂອງການຝຶກອົບຮົມໃນຄັ້ງນີ້ຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງເຊກອງກໍໄດ້ອອກໃບຢັ້ງຢືນສຳເລັດການຝຶກອົບຮົມການບໍລິການທ່ອງທ່ຽວໃຫ້ແກ່ນັກສໍາມະກອນເປັນກຽດກ່າວມອບໂດຍທ່ານ ບູ່ໄຊ ໄຊຍະເສນ ຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງ.

แชร์