ໄຊສົມບູນ-ບໍລິຄຳໄຊ ສ້າງຂະບວນການເຕະບານມິດຕະພາບ

  ການນຳແຂວງໄຊສົມບູນ ແລະການນຳແຂວງບໍລິຄຳໄຊໄດ້ສ້າງຂະບວນການເຕະບານມິດຕະພາບເພື່ອຂໍ່ານັບຮັບຕ້ອນກອງປະຊຸມທາບທາມເນື້ອໃນກອງປະຊຸມໃຫຍ່ຄັ້ງທີ XI ຂອງພັກໃນວັນທີ 22 ພະຈິກທີ່ເດີ່ນບານເຕະແສງວົງຈິດ ຊຶ່ງທີມການນຳແຂວງໄຊສົມບູນນຳໂດຍທ່ານ ພົຕ ຄຳລຽງ ອຸທະໄກສອນ ເຈົ້າແຂວງໄຊສົມບູນ ແລະທີມການນຳແຂວງບໍລິຄຳໄຊນຳໂດຍທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ.

 ນັບແຕ່ວິນາທີທຳອິດຂອງການແຂ່ງຂັນນັກກີລາທັງສອງທີມຕ່າງຝ່າຍກໍເຮັດໜ້າທີ່ຂອງຕົນເຂົ້າໃນແຂ່ງຂັນດ້ວຍຄວາມຮັບຜິດຊອບສູງຊຶ່ງນັກກີລາແຕ່ລະທ່ານໄດ້ໝູນໃຊ້ເຕັກນິກ, ໄຫວພິບ ແລະຄວາມສາມາດສະເພາະໂຕຂອງຕົນເຂົ້າໃນການຫຼິ້ນເພື່ອຫຼອກລໍ້ຝ່າຍກົງກັນຂ້າມດ້ວຍຈັງຫວະທີ່ວ່ອງໄວເພື່ອກ້າວສູ່ເປົ້າໝາຍສູງສຸດກໍຄືໄຊຊະ ນະບົນພື້ນຖານນໍ້າໃຈນັກກີລາຮູ້ໃຫ້ກຽດ, ຮູ້ແພ້-ຮູ້ຊະນະຮູ້ໃຫ້ອະໄພເຊິ່ງກັນ ແລະກັນຊຶ່ງການແຂ່ງຂັນເຕັມໄປດ້ວຍຄວາມຕື່ນເຕັ້ນ ແລະເປັນລະບຽບຮຽບຮ້ອຍຢ່າງຈົບງາມ.

  ຜ່ານການແຂ່ງຂັນກັນຢ່າງດຸເດືອດນັບແຕ່ວິນາທີທຳອິດຮອດວິນາທີຈົບເກມໂດຍແມ່ນທີມບານເຕະການນຳແຂວງໄຊສົມບູນສາມາດເອົາຊະນະທີມບານເຕະການນຳ ແຂວງບໍລິຄຳໄຊໃນຈຳນວນ 4 ປະຕູຕໍ່ 3.

  ການແຂ່ງຂັນເຕະບານລະຫວ່າງການນຳແຂວງໄຊສົມບູນ ແລະການນຳແຂວງບໍລິຄໍາໄຊຄັ້ງນີ້ນອກຈາກຈະເປັນການສ້າງຂະບວນການຂໍ່ານັບຮັບຕ້ອນກອງປະຊຸມທາບ ທາມເນື້ອໃນກອງປະຊຸມໃຫຍ່ຄັ້ງທີ XI ຂອງພັກແລ້ວຍັງເປັນການສ້າງໄມຕີຈິດມິດຕະພາບ ແລະຮັດແໜ້ນຄວາມສາມັກຄີລະຫວ່າງການນຳທັງສອງແຂວງໃຫ້ແໜ້ນແຟ້ນຍິ່ງໆຂຶ້ນນອກນີ້ຍັງເປັນການຫຼິ້ນກີລາເພື່ອບໍລິຫານຮ່າງກາຍເຮັດໃຫ້ມີສຸຂະພາບແຂງແຮງ ແລະ ປາສະຈາກໂລກໄພໄຂ້ເຈັບເພື່ອກຽມພ້ອມຮັບໃຊ້ໜ້າທີ່ການເມືອງຂອງພັກ ແລະສ້າງສາພັດທະນາປະເທດຊາດກໍຄືພັດທະນາເສດຖະກິດ-ສັງຄົມທັງສອງແຂວງໃຫ້ເຕີບໃຫຍ່ຂະຫຍາຍຕົວ ແລະຫຼຸດພົ້ນອອກຈາກຄວາມທຸກຍາກເທື່ອລະກ້າວ, ການແຂ່ງຂັນຄັ້ງນີ້ເຕັມໄປດ້ວຍບັນຍາກາດຟົດຟື້ນ, ເບີກບານມ່ວນຊື່ນ ແລະມີຄວາມໝາຍ-ຄວາມສຳຄັນທາງມິດຕະພາບ.

------------

ຂຽນໂດຍ: ຈິນລະວອນ ວໍລະສົມບູນ

ຮູບພາບ: ໜັງສືພິມເສດຖະກິດ-ສັງຄົມ

แชร์