ຫຼວງນໍ້າທາ ເຊັນສັນຍາໂຄງການສ້າງທາງຮ່ອງລະບາຍນໍ້າ ແລະຂົວ

  ວັນທີ 23 ພະຈິກ ຜ່ານມາທີ່ໂຮງແຮມອຸດົມສີນແຂວງຫຼວງນໍ້າທາໄດ້ຈັດພິທີເຊັນສັນຍາໂຄງການວຽກເພີ່ມກໍ່ສ້າງເສັ້ນທາງ, ຮ່ອງລະບາຍນໍ້າ ແລະຂົວສຳລັບໂຄງການພັດທະນາຕົວເມືອງຕາມແລວທາງອະນຸພາກພື້ນແມ່ນໍ້າຂອງ 2 ຕົວເມືອງຫຼວງນໍ້າທາເຂົ້າຮ່ວມໂດຍທ່ານ ຄໍາໄຫຼ ສີປະເສີດ ຮັກສາການເຈົ້າແຂວງໆຫຼວງນໍ້າທາ, ທ່ານນາງ ວິສາພອນ ອີນທິລາດ ຮອງຫົວໜ້າກົມເຄຫາ ແລະຜັງເມືອງກະຊວງໂຍທາທິການ ແລະຂົນສົ່ງ, ແມ່ນມີຮອງເຈົ້າເມືອງ, ຫົວໜ້າບໍລິສັດ,ຫົວໜ້າພະແນກ-ຮອງ ພະແນກການທີ່ກ່ຽວຂ້ອງເຂົ້າຮ່ວມ.

  ທ່ານ ລາຢ່າງ ຮືຫລົ່ງ ຫົວໜ້າຫ້ອງການຈັດຕັ້ງໂຄງການໄດ້ລາຍງານຫຍໍ້ໂຄງການວຽກງານເພີ່ມໃນການກໍ່ສ້າງເສັ້ນທາງ, ຮ່ອງລະບາຍນໍ້າ ແລະຂົວ, ເປັນໂຄງການວຽກເພີ້ມຊຶ່ງໄດ້ນໍາໃຊ້ງົບປະມານທີ່ປະຢັດໄດ້ຈາກບັນດາໂຄງການຍ່ອຍການປະມູນໂຄງການດັ່ງກ່າວເປັນການປະມູນແບບສາກົນໂດຍໄດ້ປະກາດຂາຍຊອງປະມູນແຕ່ວັນ ທີ 13 ມັງກອນ 2020 ແລະໄດ້ເປີດຊອງປະມູນໃນວັນທີ 26 ກຸມພາ 2020.

  ໂຄງການກໍ່ສ້າງນີ້ກວມເອົາ 8 ບ້ານ ຄື: ບ້ານວຽງເງິນ, ຫົວນາ, ນໍ້າດີ, ທົ່ງໄຈໃຕ້, ປ່າປົວະ, ໂພນໄຊ, ຫົວຂົວ ແລະບ້ານດອນສໍາພັນ, ໜ້າວຽກຫຼັກຂອງໂຄງການມີຄື: ກໍ່ສ້າງເສັ້ນທາງປູເບຕົ່ງເສີມດ້ວຍຕາໜ່າງເຫຼັກກັນແດກ, ຮ່ອງລະບາຍນໍ້າແຄມທາງ ແລະທໍ່ລອດທາງ, ຄວາມຍາວເສັ້ນທາງ 936,5 ແມັດ; ຄວາມກວ້າງເສັ້ນ ທາງ 4–5 ແມັດ; ຄວາມໜາເບຕົງຊັ້ນໜ້າທາງ 20 ຊັງຕີແມັດ, ບ້ານວຽງເງິນ-ບ້ານນໍ້າດີ, ມີຄວາມຍາວ 3.455 ແມັດ ຄວາມໜາ 15 ຊັງຕີແມັດ, ເສັ້ນທາງເຂົ້າບ້ານອື່ນໆ, ຄວາມຍາວ 5.910 ແມັດ, ການກໍ່ສ້າງຂົວເບຕົງຂ້າມນໍ້າດີມີຄວາມຍາວ 25 ແມັດ, ຄວາມກວ້າງ 5,8 ແມັດ ລວມທາງຍ່າງ; ການກໍ່ສ້າງຂົວຂ້າມ ນໍ້າທາບ້ານທົ່ງໃຈ້ໃຕ້-ບ້ານໂພນໄຊ ມີຄວາມຍາວ 50 ແມ້ດ, ຄວາມກວ້າງ ຂົວ 5,80 ແມັດ ລວມທາງຍ່າງມີທາງຍ່າງໜຶ່ງເບື້ອງ; ການກໍ່ສ້າງລວມມູນຄ່າຂອງໂຄງ ການທັງໝົດ: 2,97 ລ້ານໂດລາ ບໍ່ລວມອາກອນມູນຄ່າເພີ່ມ 10%, ໄລຍະປະຕິບັດໂຄງການ 18 ເດືອນ, ໂດຍຜູ້ຮັບເໝົາກໍ່ສ້າງ, ບໍລິສັດໄຊຍາກໍ່ສ້າງ ແລະ ສ້ອມ ແປງຄົບວົງຈອນຈຳກັດຜູ້ດຽວເປັນຜູ້ຮັບເໝົາກໍ່ສ້າງ.

  ທ່ານຮັກສາການເຈົ້າແຂວງໆຫຼວງນໍ້າທາໄດ້ກ່າວໂອ້ລົມຊີ້ນຳ ແລະເນັ້ນໜັກໃຫ້ເຈົ້າຂອງໂຄງການກັບບໍລິສັດຈົ່ງຈັດປະຕິບັດຕາມສັນຍາເລັ່ງໃສ່ແຕ່ລະໜ້າວຽກຂອງໂຄງ ການໃຫ້ໄດ້ຕາມລະດັບຄາດໝາຍທີ່ວາງໄວ້, ໃຫ້ການກໍ່ສ້າງທັນກັບເວລາກໍານົດຂອງສັນຍາ ແລະເຮັດໃຫ້ການກໍ່ສ້າງດັ່ງກວ່າສໍາເລັດໃຊ້ໄດ້ຢ່າງຍາວນານ.

แชร์