ມິສ ເວິລ ລາວ 2021 ເປີດຮັບສະມັກແລ້ວ

  ວັນທີ 23 ພະຈິກ 2020 ທີ່ໂຮງແຮມເລີທາດຫຼວງ ດໍຣ ນະຄອນຫຼວງວຽງຈັນ ໄດ້ຈັດພິທີຖະແຫຼງຂ່າວການປະກວດ ມິສ ເວິລ ລາວ2021  (Miss World Laos 2021) ໂດຍໃຫ້ກຽດເຂົ້າຮ່ວມຂອງທ່ານ ສຸລິຍາ ແກ້ວພິລາວົງ ຫົວໜ້າກົມຂະບວນການຊາວໜຸ່ມສູນກາງຊາວໜຸ່ມປະຊາຊົນປະຕິວັດລາວ, ທ່ານ ສາຍແກ້ວ ສີດາວົງ ປະທານໂຄງການຈັດການປະກວດມິສ ເວິລ ລາວ, ທ່ານ ນາງ ຄໍາໃສ ສີຫາວົງ ປະທານເອັນຈອຍມີເດຍອໍານວຍການໂຄງການປະກວດ ມິສ ເວິລ ລາວ, ທ່ານ ນາງ ເນລະມິດ ໄຊປັນຍາ ມິສ ເວິລ ລາວ 2019 ພ້ອມດ້ວຍແຂກຖືກເຊີນ ແລະພາກສ່ວນກ່ຽວຂ້ອງເຂົ້າຮ່ວມ.

   ທ່ານ ສາຍແກ້ວ ສີດາວົງ ກ່າວວ່າ: ເວທີ Miss World Laos ຖືເປັນເວທີຄວາມງາມທີ່ຍິ່ງໃຫຍ່ ແລະຊົງຄຸນຄ່າທີ່ສຸດໃນລາວການປະກວດຄັ້ງນີ້ກໍເພື່ອສືບຕໍ່ການຈັດປະກວດ Miss World Laos 2021 ທີ່ຈະມາເຖິງນີ້, ເພື່ອຄົ້ນຫານ້ອງນາງສາວລາວທີ່ມີພຽບພ້ອມດ້ານຄວາມຮູ້, ຄວາມກ້າສະແດງອອກເພື່ອຈະໄປເຜີຍແຜ່ວັດທະນະທໍາໃຫ້ຊາວໂລກໄດ້ຮັບຮູ້ເຖິງວັດທະນະທໍາລາວ.

 ສ່ວນເງື່ອນໄຂຂອງຜູ້ທີ່ຈະເຂົ້າມາສະໝັກປະກອບມີຕ້ອງເປັນສັນຊາດລາວໂດຍກຳເນີດອາຍຸລະຫວ່າງ 17-27 ປີ ສ່ວນສູງແມ່ນ 165 ຊັງຕີແມັດ ຂຶ້ນໄປເປັນຍິງໂສດສາມາດສື່ສານໄດ້ທັງພາສາລາວ ແລະພາສາອັງກິດ (ໂດຍພື້ນຖານ), ໂດຍຊີງເງິນລາງວັນລວມມູນຄ່າກວ່າ 150 ລ້ານກີບ.

 ສຳລັບລາຍລະອຽດຂອງການປະກວດມີດັ່ງນີ້: ເລີ່ມເປີດຮັບສະໝັກແຕ່ວັນທີ 25 ພະຈິກ 2020 ເປັນຕົ້ນໄປຈົນຮອດວັນທີ 1 ມີນາ2021 ແລະ ວັນທີ 2 ມີນາ ຈະຄັດເລືອກເອົານ້ອງນາງສາວ 20 ຄົນສຸດທ້າຍຈາກທົ່ວປະເທດ, ວັນທີ 3 ມີນາເປັນມື້ເປີດໂຕມົງກຸດ ແລະ ເປີດຕົວຜູ້ເຂົ້າຮອບຂອງນ້ອງນາງສາວທັງ 20 ຄົນ ວັນທີ 5 ມີນາແມ່ນເລີ່ມເກັບຕົວ ແລະເຮັດກິດຈະກໍາກັບທາງປະກວດ, ວັນທີ 27 ມີນາ ແມ່ນຮອບຕັດສິນຂອງການປະກວດ Miss World Laos 2021.

แชร์