ເອກະຊົນທຸ່ມທຶນ 5 ຕື້ກີບພັດທະນາຕາດໝາໄນ ເປັນແຫຼ່ງທ່ອງທ່ຽວ

  ແກ້ວທະວີຊັບກໍ່ສ້າງຂົວທາງແມ່ນບໍລິສັດເອກະຊົນທີ່ຈະທຸ່ມທຶນປະມານ 5 ຕື້ກີບ ເຂົ້າໃນການພັດທະນານໍ້າຕົກຕາດໝາໄນໃຫ້ກາຍເປັນແຫຼ່ງທ່ອງທ່ຽວທາງທໍາມະຊາດແບບອະນຸລັກ, ທັງນີ້ກໍເພື່ອດຶງດູດບັນດານັກທ່ອງທ່ຽວຈາກທົ່ວທຸກສາລະທິດເຂົ້າມາທ່ຽວຊົມພາກໃຕ້ທີ່ເມືອງທ່າແຕງ ແຂວງເຊກອງ ໃຫ້ນັບມື້ຫຼາຍຂຶ້ນ.

ທ່ານ ນາງ ແກ້ວລາວັນ ແກ້ວລາດຊະວົງໄຊ ອໍານວຍການບໍລິສັດແກ້ວທະວີຊັບກໍ່ສ້າງຂົວທາງໃຫ້ສໍາພາດຕໍ່ນັກຂ່າວວ່າ: ສປປ ລາວ ໂດຍສະເພາະເມືອງທ່າແຕງ ແຂວງເຊກອງແມ່ນເມືອງໜຶ່ງທີ່ອຸດົມສົມບູນໄປດ້ວຍຊັບໃນດິນສິນໃນນໍ້າຫີບເງິນຫີບຄໍາທີ່ບັນພະບູລຸດເຮົາເຝົ້າ ແລະ ຫວງແຫນມາຈົນເຖິງທຸກວັນນີ້, ເມື່ອຮອດຮຸ່ນພວກເຮົາເກີດໃໝ່ໃຫຍ່ລຸນຈະຂຸດຂຶ້ນມານໍາໃຊ້ແນວໃດໃຫ້ເກີດປະໂຫຍດ ແລະ ຍືນຍົງກິນບໍ່ໝົດຈົກບໍ່ແຫ້ງ; ສະນັ້ນພັກ ແລະ ລັດຖະບານຈຶ່ງໄດ້ກໍານົດເອົາຂະແໜງການທ່ອງ ທ່ຽວເປັນອຸດສາຫະກໍາສ້າງລາຍຮັບກັບທີ່ສ້າງລາຍໄດ້ໃຫ້ຊຸມຊົນເພື່ອເປັນອີກຊອ່ງທາງໜຶ່ງທີ່ຈະນໍາພາປະເທດຊາດກໍຄືປະຊາຊົນບັນດາເຜົ່າຫຼຸດພົ້ນອອກຈາກຄວາມທຸກ ຍາກເທື່ອລະກ້າວ.

 ນໍ້າຕົກຕາດໝາໄນ ຕັ້ງຢູ່ບ້ານໂກງຕາຢູນ ເມືອງທ່າແຕງ ແຂວງເຊກອງ ໃນອະນາຄົດອັນໃກ້ນີ້ນໍ້າຕົກຕາດດັ່ງກ່າວກໍາລັງຈະຖືກພັດທະນາໃຫ້ກາຍເປັນແຫຼ່ງທ່ອງທ່ຽວທີ່ມີຄວາມສວຍງາມໂດຍໃນໄລຍະຜ່ານມາທາງບໍລິສັດໄດ້ນໍາພາທີມງານຈາກຂະແໜງການຕ່າງໆທີ່ກ່ຽວຂ້ອງລົງສໍາຫຼວດ ແລະ ກໍານົດກິດຈະກໍາທ່ອງທ່ຽວແບບອະນຸ ລັກ, ປະຊາຊົນມີສ່ວນຮ່ວມ, ດ້ວຍການຍ່າງລົງປ່າຂຶ້ນພູເພື່ອເກັບກໍາຂໍ້ມູນໃຫ້ລະອຽດຊັດເຈນແຕ່ລະຈຸດແຕ່ລະບ່ອນຊຶ່ງມາຮອດປະຈຸບັນແມ່ນມີຄວາມຄືບໜ້າ, ທັງໝົດນັ້ນແມ່ນໄດ້ຮັບຄວາມຮ່ວມໄມ້ຮ່ວມມືຈາກທຸກພາກສ່ວນຂອງລັດກໍຄືປະຊາຊົນໃນທ້ອງຖິ່ນ ແລະ ຢືນຢັນວ່າໂຄງການນີ້ເກີດຂຶ້ນຢ່າງແນນອນແຕ່ທັງນີ້ທັງນັ້ນຈໍາເປັນຈະຕ້ອງໄດ້ຮັບການສືບຕໍ່ເອື້ອອໍານວຍຄວາມສະດວກດ້ານຕ່າງໆຈາກພາກສ່ວນລັດ ແລະປະຊາຊົນໃນທ້ອງຖິ່ນ.

ທ່ານ ນາງ ແກ້ວລາວັນ ແກ້ວລາດຊະວົງໄຊ ໃຫ້ຮູ້ຕື່ມວ່າ: ການພັດທະນາແມ່ນເລີ່ມຈາກການພັດທະນາເສັ້ນທາງ, ໂຮມສະເຕ(ເຮືອນພັກ), ສວນນໍ້າ, ສວນດອກໄມ້, ເຮືອນຕົ້ນໄມ້ໂດຍຈະໃຊ້ເວລາໃນການພັດທະນາປະມານ 1 ປີ, ແຕ່ແນວໃດກໍດີໃນເບື້ອງຕົ້ນແມ່ນຈະໄດ້ບຸກເບີກເສັ້ນທາງເພື່ອໃຫ້ທັນເປີດໃຫ້ນັກທ່ອງທ່ຽວໄດ້ເຂົ້າໄດ້ທ່ຽວຊົມໂອກາດປີໃໝ່ລາວປີນີ້.

  ໂອກາດວັນສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 45 ປີນີ້ທ່ານ ນາງ ແກ້ວລາວັນ ແກ້ວລາດຊະວົງໄຊ ໄດ້ອ່ວຍພອນມາຍັງການນໍາພັກ ແລະລັດຖະບານ, ຄະນະພັກ-ອໍານາດການປົກຄອງແຂວງເຊກອງກໍຄືເມືອງທ່າແຕງຈົ່ງມີສຸຂະພາບເຂັ້ມແຂງ, ພາລານະໄມສົມບູນ, ສືບຕໍ່ນໍາພາ-ຊີ້ນໍາປົກປັກຮັກ ສາ ແລະສ້າງສາພັດທະນາປະເທດຊາດໃຫ້ຈະເລີນ, ຮຸ່ງເຮືອງ ແລະສີວິໄລກ້າວໜ້າຢ່າງບໍ່ຢຸດຢັ້ງ.

-------------

ຂ່າວ: ສີສຸວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์