ພະລັງງານໄຟຟ້າທ່າແຮງສຳຄັນ ດຶງດູດທຶນເຂົ້າໃສ່ໄຊສົມບູນດຽວນີ້ມີ 31 ໂຄງການເຂື່ອນ

  ໄຊສົມບູນ ແຂວງນ້ອງໃໝ່ທີ 17 ຂອງລາວຢູ່ພາກກາງຂອງປະເທດມີທີ່ຕັ້ງເປັນພູດອຍ ແລະແມ່ນໍ້າຫຼາຍສາຍກາຍເປັນທ່າແຮງສຳຄັນໃຫ້ແກ່ການລົງທຶນໃສ່ໂຄງການສ້າງເຂື່ອນໄຟຟ້ານໍ້າຕົກນັບແຕ່ຂະໜາດນ້ອຍຫາໃຫຍ່ໂດຍມາປະຈຸບັນລັດໄດ້ອະນຸຍາດໃຫ້ເອກະຊົນພາຍໃນ ແລະຕ່າງປະເທດພັດທະນາມີທັງໝົດ 31 ໂຄງການລວມກຳລັງຕິດຕັ້ງ 3,5 ພັນເມກາວັດໃນນັ້ນສ້າງສຳເລັດແລະເດີນເຄື່ອງຜະລິດໄຟຂາຍແລ້ວເກືອບ 10 ໂຄງການ.

   ພະແນກພະລັງງານ ແລະບໍ່ແຮ່ແຂວງໄຊສົມບູນ ໄດ້ລາຍງານຕໍ່ກອງປະຊຸມໃຫຍ່ຂອງອົງຄະນະພັກແຂວງທີ່ຈັດຂຶ້ນຫວ່າງບໍ່ດົນມານີ້ໃຫ້ຮູ້ວ່າ: ແຂວງໄຊສົມບູນມີທີ່ຕັ້ງເປັນພູດອຍ ແລະມີແມ່ນໍ້າຫຼາຍສາຍອັນເປັນທ່າແຮງສຳຄັນໃຫ້ແກ່ການກໍ່ສ້າງເຂື່ອນໄຟຟ້ານໍ້າຕົກຂະໜາດໃຫຍ່, ກາງ ແລະ ຂະໜາດນ້ອຍຊຶ່ງໃນຊຸມປີຜ່ານມາລັດຖະ ບານ ແລະແຂວງໄດ້ອະນຸຍາດໃຫ້ເອກະຊົນທັງພາຍໃນ ແລະຕ່າງປະເທດເຂົ້າລົງທຶນພັດທະນາລວມທັງໝົດ 31 ໂຄງການ ມີກຳລັງການຕິດຕັ້ງ 3.542 ເມກາວັດ.

  ໃນນັ້ນສູນກາງອະນຸຍາດ 14 ໂຄງການ, ແຂວງອະນຸຍາດ 17 ໂຄງການ ແລະ ມີໂຄງການກໍ່ສ້າງເຂື່ອນທີ່ສຳເລັດໄດ້ຜະລິດພະລັງງານຊົມໃຊ້ແລ້ວຈຳນວນ 8 ໂຄງ ການມີກຳລັງການຕິດຕັ້ງ 956,2 ເມກາວັດ ສ່ວນທີ່ເຫຼືອແມ່ນຍັງຢູ່ໃນຂັ້ນຕອນກຳລັງກໍ່ສ້າງ ແລະສຶກສາສຳຫຼວດໂດຍໃນໂຄງການທັງໝົດນັ້ນຖ້າປຽບທຽບໃສ່ 5 ປີຜ່ານມາແມ່ນເພີ່ມຂຶ້ນ 51%.

   ນອກຈາກການລະດົມການລົງທຶນໃສ່ການສ້າງເຂື່ອນແລ້ວທາງແຂວງຍັງໄດ້ເອົາໃຈໃສ່ຂະຫຍາຍ ແລະ ກໍ່ສ້າງລະບົບຕາໜ່າງໄຟຟ້າລົງສູ່ຊົນນະບົດທົວແຂວງໃນ 5 ປີ ຜ່ານມາມີ 10 ໂຄງການໃນນັ້ນກໍ່ສ້າງສຳເລັດ 8 ໂຄງການ ແລະອີກ 2 ໂຄງການແມ່ນຍັງສືບຕໍ່ຈັດຕັ້ງປະຕິບັດໂດຍທົ່ວແຂວງມີ 2 ສະຖານີຈ່າຍໄຟຟ້າ.

ແນວໃດກໍດີຈາກຄວາມພະຍາຍາມຄືດັ່ງກ່າວພະແນກພະລັງງານ ແລະບໍ່ແຮ່ແຂວງລະບຸວ່າ: ໄດ້ສົ່ງຜົນເຮັດໃຫ້ທົ່ວແຂວງຈຳນວນ 5 ເມືອງ 89 ບ້ານມີໄຟຟ້ານຳໃຊ້ຖາ ວອນ 100% ແລະກວມ 94% ແມ່ນຄອບຄົວທີ່ໄດ້ໃຊ້ໄຟຟ້າຖາວອນທຽບໃສ່ 5 ປີຜ່ານມາແມ່ນເພີ່ມຂຶ້ນປະມານ 87% ຂະນະທີ່ໃນອີກ 5 ປີຕໍ່ໜ້າທາງແຂວງໄດ້ວາງຄາດໝາຍສູ້ຊົນໃຫ້ຈຳນວນຄອບຄົວຊົມໃຊ້ໄຟຖາວອນກວມເພີ່ມຂຶ້ນເປັນ 98% ດ້ວຍການຈະປະຕິບັດ 3 ໂຄງການໃໝ່ປ່ຽນຖ່າຍ ແລະ ກໍ່ສ້າງຕາຂ່າຍໄຟຟ້າພ້ອມກັບຈະສຳເລັດໂຄງການກໍ່ສ້າງເລີ່ມຜະລິດໄຟ 4 ໂຄງການໃນນີ້ແມ່ນລວມທັງເຂື່ອນທີ່ກຳລັງກໍ່ສ້າງ ແລະຈະມີການກໍ່ສ້າງໃໝ່.

แชร์