ສະຫະພັນແມ່ຍິງແຂວງຄຳມ່ວນສ້າງຂະບວນການຍ່າງເພື່ອສຸຂະພາບ

  ຂະບວນການຍ່າງເພື່ອສຸຂະພາບເພື່ອສະເຫຼີມສະຫຼອງວັນສົນທິສັນຍາວ່າດ້ວຍສິດທິເດັັກ 20 ພະຈິກ ແລະລະນຶກເຖິງວັນສາກົນຢຸດຕິການໃຊ້ຄວາມຮຸນ ແຮງຕໍ່ແມ່ຍິງ ແລະເດັກນ້ອຍ 25 ພະຈິກໄດ້ຈັດຂຶ້ນໃນຕອນເຊົ້າຂອງວັນທີ 20 ພະຈີກ 2020 ທີ່ເດີ່ນຫ້ອງວ່າການເມືອງທ່າແຂກ ແຂວງຄຳມ່ວນ ໂດຍການເປັນກຽດເຂົ້າຮ່ວມຂອງທ່ານ ວັນໄຊ ພອງສະຫວັນ ຮັກສາການເຈົ້າແຂວງໆຄຳມ່ວນ, ມີບັນດາທ່ານການນຳຂອງແຂວງ, ພະນັກງານການນໍາຈາກບັນດາພະແນກການອ້ອມຂ້າງແຂວງພ້ອມທັງມວນຊົນຊາວເມືອງທ່າແຂກເຂົ້າຮ່ວມຢ່າງເປັນຂະບວນຟົດຟື້ນ.

  ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນໄດ້ຍົກໃຫ້ເຫັນເຖິງປະຫວັດຄວາມເປັນມາ ແລະຄວາມໝາຍສຳຄັນວັນສົນທິສັນຍາວ່າດ້ວຍສິດທິເດັກ, ກອງປະຊຸມຂອງຊະມັດຊາໃຫຍ່ອົງການສະຫະປະຊາຊາດໄດ້ຖະແຫຼງກ່ຽວກັບສິດທິເດັກໃນວັນທີ 20 ພະຈິກ 1959 ແລະໄດ້ຮັບຮອງເອົາສົນທິສັນຍາວ່າດ້ວຍສິດທິເດັກໃນວັນທີ 20 ພະຈິກ 1989 ເປັນວັນເດັກໂລກ ໂດຍໃຫ້ເລີ່ມຈັດຕັ້ງປະຕິບັດນັບແຕ່ປີ 1990 ເປັນຕົ້ນມາ, ເພື່ອເປັນການຍົກສູງສິດທິເດັກ, ຮັບປະກັນຄວາມຢູ່ຫຼອດ, ການປົກປ້ອງ, ການພັດທະນາຂອງເດັກແລະການມີສ່ວນຮ່ວມເພື່ອເຮັດໃຫ້ເດັກທີ່ເປັນລູກຫຼານຂອງພວກເຮົາໃນມື້ນີ້ໃຫ້ກາຍເປັນໄວເດັກທີ່ເຕັມໄປດ້ວຍຄວາມສຸກ, ຄວາມອົບອຸ່ນຈາກພໍ່ແມ່, ການຈັດຕັ້ງ ແລະສັງຄົມ, ຕໍ່ກັບວັນສາກົນຢຸດຕິການໃຊ້ຄວາມຮຸນແຮງຕໍ່ແມ່ຍິງ  ຊຶ່ງການໃຊ້ຄວາມຮຸນແຮງຕໍ່ແມ່ຍິງເປັນບັນຫາລວມຂອງໂລກ, ການໃຊ້ຄວາມຮຸນແຮງແມ່ນສາມາດເກີດຂຶ້ນໄດ້ທຸກເວລາ ແລະປະກົດຂຶ້ນໃນຫຼາຍຮູບແບບເຊັ່ນ: ຄວາມຮຸນແຮງໃນຄອບຄົວ, ການຄ້າມະນຸດ, ການທາລຸນທາງເພດ, ການກົດຂີ່ແຮງງານ ແລະອື່ນໆ, ຕໍ່ກັບເຫດການດັ່ງກ່າວແມ່ນໄດ້ຖືກຍົກຂຶ້ນຄັ້ງທຳອິດວັນທີ 25 ພະຈິກໃນອາເມລິກາລາຕິນແລະໄດ້ຄ່ອຍໆແຜ່ລາມອອກໄປສູ່ປະເທດຕ່າງໆໃນທົ່ວໂລກຈົນໄດ້ຖືກປະກາດເປັນໃຫ້ເປັນວັນສາກົນຢຸດຕິຄວາມຮຸນແຮງຕໍ່ແມ່ຍິງໃນປີ 1981 ໃນກອງປະຊຸມນັກເຄື່ອນໄຫວສົ່ງເສີມດ້ານສິດທິແມ່ຍິງທີ່ປະເທດໂກລົມເບຍ.

  ພາຍຫຼັງໄດ້ຮັບຟັງຄວາມເປັນມາຂອງສອງວັນດັ່ງກ່າວແລ້ວກໍ່ໄດ້ເລີ່ມຂະບວນການຍ່າງໂດຍເລີ່ມຈາກຫ້ອງວ່າການເມືອງທ່າແຂກອອກໄປທາງສີ່ແຍກໄຟແດງທ່າດ່ານຂຶ້ນໄປຮອດໂຮງຮຽນມິດຕະພາບລາວ-ຫວຽດນາມລ້ຽວຂວາໄປຈຸດສີ່ແຍກຮ້ານອາຫານທ່າແຂກໃໝ່ຈົນຮອດພະແນກການຕ່າງປະເທດລ້ຽວລົງໄປຮອດແຍກນໍ້າພຸຈາກນັ້ນແມ່ນຍ່າງລ້ຽວກັບມາຫ້ອງວ່າການເມືອງທ່າແຂກ.

------------

ຂຽນໂດຍ: ກອງຄຳ

ຮູບພາບ: ໜັງສືພິມເສດຖະກິດ-ສັງຄົມ

แชร์