ສາລະວັນ ໄຂກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ

   ກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງສາລະວັນໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 23 ພະຈິກ 2020 ທີ່ຫ້ອງປະຊຸມສະໂມສອນໃຫຍ່ແຂວງ, ພາຍໃຕ້ການເປັນປະທານຂອງສະຫາຍ ໂພໄຊ ໄຊຍະສອນ ກຳມະການສຳຮອງສູນກາງພັກ, ເລຂາຄະນະບໍລິຫານງານພັກແຂວງ, ຮັກສາການເຈົ້າແຂວງໆສາລະວັນ ແລະໃຫ້ກຽດເຂົ້າຮ່ວມຂອງສະຫາຍ ຄໍາພັນ ພົມມະທັດ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກຫົວໜ້າຄະນະໂຄສະນາອົບຮົມສູນກາງພັກ, ມີຜູ້ຕາງໜ້າຄະນະກວດກາ, ຄະນະຈັດຕັ້ງສູນກາງພັກ, ພະນັກງານ ອາວຸໂສບຳນານຜູ້ຊົງຄຸນວຸດທິ, ຜູ້ແທນສົມບູນຈຳນວນ 323 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກໃນທົ່ວແຂວງຈຳນວນ 14 ພັນກວ່າສະຫາຍ, ພ້ອມດ້ວຍແຂກຖືກເຊີນເຂົ້າຮ່ວມ.

 ພາຍຫຼັງ ສະຫາຍ ໂພໄຊ ໄຊຍະສອນ ຂຶ້ນກ່າວໄຂກອງປະຊຸມຢ່າງເປັນທາງການ ແລະກໍ່ໄດ້ຜ່ານບົດລາຍງານການເມືອງທັງສອງພາກ, ຊຶ່ງພາກທຳອິດແມ່ນໄດ້ຕີລາຄາໝາກຜົນຂອງການຈັດຕັງຜັນຂະຫຍາຍມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ: ເຖີງວ່າໄດ້ພົບກັບຄວາມຫຍຸ້ງຍາກທາງດ້ານເສດຖະກິດ, ໄພພິ ບັດຂອງທຳມະຊາດ, ການແຜ່ລະບາດຂອງພະຍາດໂຄວິດ-19 ແລະປະກົດການຫຍໍ້ທໍ້ຕ່າງໆໃນສັງຄົມຢ່າງສັບສົນ, ແຕ່ພາຍໃຕ້ການນຳພາອັນສະຫຼາດ, ສ່ອງໃສຂອງພັກ-ລັດຖະບານບວກກັບຄວາມສາມັກຄີເປັນຈິດໜຶ່ງໃຈດຽວ, ຄວາມຕັດສິນໃຈ,ຄວາມຮັບຜິດຊອບສູງຂອງຄະນະພັກ,ອົງການປົກຄອງແຂວງ,ບັນດາສະຫາຍສະມາຊິກ ພັກ-ພະນັກງານ ແລະຄວາມເປັນເຈົ້າການຂອງປະຊາຊົນບັນດາເຜົ່າໄດ້ເຮັດໃຫ້ທົ່ວແຂວງມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ ແລະເປັນລະບຽບຮຽບຮ້ອຍດີ, ເສດຖະກິດພັດທະນາກ້າວຂຶ້ນຢ່າງຕໍ່ເນື່ອງ.

 ໄລຍະ 5 ປີຜ່ານມາ ເສດຖະກິດຂະຫຍາຍຕົວສະເລ່ຍ 7% ຕໍ່ປີ, ລວມຍອດຜະລິດຕະພັນພາຍໃນ ຫຼື (GDP) ບັນລຸໄດ້ 20,5 ພັນຕື້ກີບ, ສະເລ່ຍໃສ່ພົນລະເມືອງໄດ້ 9,72 ລ້ານກີບຕໍ່ຄົນຕໍ່ປີ ຫຼືເທົ່າກັບ1.147ໂດລາ ການລົງທຶນ 5 ປີສາມາດປະຕິບັດໄດ້ 6 ພັນຕື້ກວ່າກີບທຽບໃສ່ແຜນການປະຕິບັດໄດ້ 81%. ການສົ່ງອອກສິນຄ້າກະສິກໍາເພີ່ມຂຶ້ນ, ຂະບວນການຜະລິດກະສິກໍາເປັນສິນຄ້າຂອງປະຊາຊົນມີບາດກ້າວຂະຫຍາຍຕົວໃໝ່ມາຮອດປະຈຸບັນ, ຄອບຄົວທຸກຍາກຫຼຸດລົງຍັງເຫຼືອ 3.604 ຄອບຄົວ ກວມ 4,9 %, ບ້ານທຸກຍາກຍັງເຫຼືອ 52 ບ້ານ, ກວມ 8,9% ຂອງຈໍານວນບ້ານທັງໝົດ.

  ກອງປະຊຸມໃຫຍ່ຄັ້ງນີ້ຈະດຳເນີນເປັນເວລາ 2 ວັນ ແຕ່ວັນທີ 23-24 ພະຈິກ 2020, ຊຶ່ງເນື້ອໃນຂອງກອງປະຊຸມແມ່ນສຸມໃສ່ພິຈາລະນາ ແລະຮັບຮອງເອົາຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີ (2021-2025); ຮັບຟັງການປະກອບຄຳເຫັນຈາກຂະແໜງການ,ກົມກອງ,ຄອບຄົວຕົວແບບຈຳ ນວນໜຶ່ງ, ພ້ອມທັງດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກແຂວງສະໄໝທີ IX ແລະ ເລືອກເອົາຜູ້ແທນໄປເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI.

ອັນສຳຄັນຈະໄດ້ຮັບຟັງການໂອ້ລົມ ແລະໃຫ້ທິດຊີ້ນຳຈາກສະຫາຍ ຄຳພັນ ພົມມະທັດ ເພື່ອໃຫ້ຄະນະບໍລິຫານງານພັກແຂວງສາລະວັນຊຸດໃໝ່ ແລະຜູ້ແທນກອງປະຊຸມນຳໄປຄົ້ນຄວ້າ, ຫັນເປັນທິດທາງ ແລະແຜນການລະອຽດຂອງຄະນະພັກຂັ້ນຂອງຕົນ ແລະຈັດຕັ້ງຜັນຂະຫຍາຍໃຫ້ປາກົດຜົນເປັນຈິງ.

--------------

ຂ່າວ: ວິໄລວອນ ສິດທິໄຊ 

ຮູບພາບ: ໜັງສືພິມເສດຖະກິດ-ສັງຄົມ

แชร์