ຝຶກອົບຮົມນໍາໃຊ້ສື່ເຂົ້າໃນການຮຽນ-ການສອນ ໃຫ້ 17 ໂຮງຮຽນເປົ້າໝາຍ

  ອົງການໂລຕັສເວີຣ ສາທາລະນະລັດເກົາຫຼີ ( ສ.ເກົາຫຼີ) ປະຈໍາລາວຮ່ວມກັບຫ້ອງການສຶກສາທິການ ແລະກີລາເມືອງ (ສກມ) ຄໍາສືບຕໍ່ຈັດກອງປະຊຸມຝຶກອົບຮົມ ໃນຫົວຂໍ້ການນໍາໃຊ້ສື່ເຂົ້າໃນການຮຽນ-ການສອນໃຫ້ກັບ 17 ໂຮງຮຽນປະຖົມເປົ້າໝາຍໃນເມືອງຄໍາ, ພາຍຫຼັງສໍາເລັດຊຸດເຝິກອົບຮົມຊຸດທີ I ລະຫວ່າງວັນທີ 18-19 ພະຈິກ ຜ່ານມາ, ຊຶ່ງຊຸດຝຶກອົບຮົມຄັ້ງທີ II ນີ້ໄດ້ໄຂຂຶ້ນເປັນທາງການໃນວັນທີ 20 ພະຈິກນີ້ ທີ່ສະໂມສອນບ້ານກ້ວຍໝໍ້ເມືອງຄໍາ ແຂວງຊຽງຂວາງ, ໂດຍໃຫ້ກຽດເປັນປະທານຂອງ ທ່ານ ທອງສີ ພັນທະວົງ ຮອງຫົວໜ້າພະແນກ ສກຂ ແລະເຂົ້າຮ່ວມຂອງທ່ານ ພົມມາ ສີພັນທອງ ຮອງຫົວໜ້າຫ້ອງການ ສກມ ຄໍາ, ທ່ານ ນາງ ຮີຈອງຄິມ ຫົວໜ້າອົງການໂລຕັສເວີຣ ສ.ເກົາຫຼີ ປະຈໍາ ສປປ ລາວ, ມີຜູ້ຕາງໜ້າຈາກພະແນກສຶກສາທິການ ແລະກີລາແຂວງ (ສກຂ) ໜ່ວຍງານທີ່ກ່ຽວຂ້ອງຫ້ອງການ ສກມ ຄໍາ, ຜູ້ປະສານງານອົງການໂລຕັສເວີຣ, ຄູຝຶກ ແລະສໍາມະນາກອນເຂົ້າຮ່ວມ.

  ຈຸດປະສົງຂອງການຝຶກອົບຮົມຄັ້ງນີ້ແມ່ນເພື່ອໃຫ້ສໍາມະນາກອນເຂົ້າຮ່ວມຮູ້ຈັກຄວາມໝາຍຂອງສື່ການຮຽນ-ການສອນ, ເຕັກນິກການນໍາໃຊ້ສື່ເຂົ້າໃນການຮຽນ-ການສອນເພື່ອຊ່ວຍໃຫ້ນັກຮຽນເຂົ້າໃຈສິ່ງທີ່ເຮົາຢາກຖ່າຍທອດໄດ້ງ່າຍຂຶ້ນໃນນັ້ນມີທັງສື່ປະຈັກຕາ ແລະ ນາມສົມມຸດ, ສື່ປະຈັກຕາປະກອບມີ: ປຶ້ມນິທານ, ບິກ, ສໍ, ໂຕະ, ໂປສເຕີ, ຮູບພາບ ແລະອື່ນໆ, ສ່ວນສື່ທີ່ເປັນນາມສົມມຸດ ຫຼື ບົດບາດສົມມຸດປະກອບມີ: ເລື່ອງເລົ່າ, ການຕັ້ງຄໍາຖາມປາກເປົ່າ, ເພງ, ເກມ, ນິທານ, ລະຄອນແລະອື່ນໆ, ທັງນີ້ກໍເພື່ອແນໃສ່ເຮັດໃຫ້ຄູສອນຮູ້ ແລະເຂົ້າໃຈເຖິງຄວາມຫຼາກຫຼາຍຂອງສື່ພ້ອມທັງຮູ້ຈັກການປະຍຸກສື່ເພື່ອນໍາໃຊ້ເຂົ້າໃນການສອນນັກຮຽນໃຫ້ເກີດປະໂຫຍດຕໍ່ຜົນການຮຽນຂອງນັກຮຽນໄດ້ຢ່າງລົງຕົວ.

  ສໍາລັບຄູສອນ 17 ໂຮງຮຽນເປົ້າໝາຍເຂົ້າຮ່ວມຝຶກອົບຮົມປະກອບມີ: ຄູສອນໂຮງຮຽນປະຖົມ ຈອມທອງ, ຄໍາເໜືອ, ບຸນຖິ່ນ, ນໍ້າຕຽນ, ນໍ້າຮົ່ມ, ຄັງແຄະ, ບ້ານໄຮ, ໜອງໃໝ່, ລ້ອງລານ, ລ້ອງມັດເໜືອ, ສັນພັນ, ນາຫວ້ານ, ນໍ້າຈາກ, ເຜິ້ງຊາມ, ໄຄ້ວຽງ, ດອກຄໍາ ແລະປະຖົມນາປາ.

  ໂອກາດນີ້ ທ່ານ ທອງສີ ພັນທະວົງ ປະທານຂອງປະຊຸມໄດ້ໃຫ້ກຽດມີຄໍາເຫັນໂອ້ລົມກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບອົງການໂລຕັສທີ່ໄດ້ເປັນຫ່ວງເປັນໄຍຊອກຫາທຶນຮອນມາພັດທະນາການສຶກສາຢູ່ແຂວງຊຽງຂວາງ ເວົ້າລວມເວົ້າສະເພາະ 17 ໂຮງຮຽນເປົ້າໝາຍຢູ່ເມືອງຄໍາເພື່ອໃຫ້ມີຄຸນນະພາບເທົ່າທຽມກັບໂຮງຮຽນແຫ່ງອື່ນໆ, ທ່ານຍັງໄດ້ຮຽກຮ້ອງໃຫ້ສໍາມະນາກອນເຂົ້າຮ່ວມຈົ່ງເພີ່ມສະຕິປັນຍາ ແລະມີຄວາມຮັບຜິດຊອບສູງແທ້ໆຕໍ່ໜ້າທີ່ທີ່ໄດ້ຮັບມອບໝາຍ, ເປັນຕົ້ນການມີສ່ວນຮ່ວມກິດຈະກໍານໍາຄູຝຶກ, ການປະຕິບັດໂມງເວລາພ້ອມທັງນໍາເອົາຄວາມຮູ້ທີ່ໄດ້ຮັບຈາກການຝຶກອົບຮົມໄປນໍາໃຊ້ເຂົ້າໃນວຽກງານຕົວຈິງໃຫ້ເກີດດອກອອກຜົນ.

--------

ຂຽນໂດຍ: ຄານສີສະຫວັນ

ຮູບພາບ: ໜັງສືພິມເສດຖະກິດ-ສັງຄົມ

แชร์