ທະນາຄານສົ່ງເສີມກະສິກຳແຂວງຜົ້ງສາລີ ປ່ອຍສິນເຊື່ອຫຼຸດລົງ

  ການປ່ອຍສິນເຊື່ອຂອງບັນດາທະນາຄານສາຂາແຂວງຜົ້ງສາລີ ໃນປີ 2018 ຜ່ານມາແມ່ນມີການຫຼຸດລົງປະຕິບັດໄດ້ພຽງ 68,77% ຂອງແຜນການປີ ແລະຫຼຸດລົງເຖິງ 22,41% ເມື່ອທຽບໃສ່ປີຜ່ານມາ, ທັງນີ້ກໍຍ້ອນການປ່ອຍກູ້ຂອງບັນດາທະນາຄານມີຄວາມຈໍາກັດຫຼາຍຂຶ້ນ, ກູ້ຢືມໄປແລ້ວບໍ່ຊໍາລະຕາມສັນຍາ ແລະ ບັນຫາອື່ນໆລວມເຖິງການລະດົມເງິນຝາກບໍ່ໄດ້ຕາມແຜນຊຶ່ງມີພຽງທະນາຄານການຄ້າມະຫາຊົນສາຂາດຽວທີ່ສາມາດລະດົມເງິນຝາກເກີນແຜນ.

  ອີງຕາມຂໍ້ມູນຈາກແຂວງຜົ້ງ ສາລີ ໃຫ້ຮູ້ວ່າ: ໃນປີ 2018 ຜ່ານມາບັນດາທະນາຄານທຸລະກິດສາຂາແຂວງຜົ້ງສາລີເຊັ່ນ: ທະນາຄານພັດທະນາລາວ,ທະນາ ຄານ ສົ່ງເສີມກະສິກໍາ, ທະນາຄານການຄ້າຕ່າງປະເທດລາວມະຫາຊົນ, ທະນາຄານນະໂຍບາຍ, ສະຖາບັນການເງິນຈຸລະພາກແຂວງສາມາດລະດົມລວມຍອດເງິນຝາກ ໄດ້ທັງໝົດ 553,36 ຕື້ກີບ ເທົ່າກັບ 93,47% ຂອງແຜນການ, ທຽບ ໃສ່ປີຜ່ານມາເພີ່ມຂຶ້ນ 6,11%, ສ່ວນການປ່ອຍສິນເຊື່ອປະຕິບັດໄດ້ 294,25 ຕື້ກີບ ເທົ່າກັບ 68,77% ຂອງແຜນການ, ທຽບ ໃສ່ປີຜ່ານມາຫຼຸດລົງ 22,41%. ທັງນີ້ກໍເນື່ອງຈາກການປ່ອຍກູ້ ຂອງບັນດາທະນາຄານແມ່ນມີຄວາມຈໍາກັດຫຼາຍຂຶ້ນ, ການປ່ອຍກູ້ທີ່ຕິດພັນເຖິງໂຄງການລົງທຶນລັດແມ່ນນັບມື້ນັບມີຄວາມເຂັ້ມງວດກວ່າເກົ່າ ແລະປະຊາຊົນກູ້ຢືມໄປແລ້ວບໍ່ມາຊໍາລະຕາມສັນຍາທີ່ລະບຸໄວ້ເຮັດກາຍກໍານົດ ແລະບໍ່ສາມາດຂຶ້ນແຜນທັນກັບກໍານົດເວລາມີພຽງສະຖາບັນການເງິນຈຸລະພາກທີ່ສາມາດປ່ອຍສິນເຊື່ອເພີ່ມຂຶ້ນຖ້າທຽບໃສ່ປີຜ່ານມາ ແລະ ອີກຢ່າງການອວ່າຍໜີ້ 3 ແຈທີ່ລັດຖະບານໄດ້ຄົ້ນຄວ້າແກ້ໄຂກໍ່ເປັນພຽງ (ພັນທະບັດ) ທີ່ຈະປົດໜີ້ໄດ້ໃຫ້ແກ່ນັກທຸລະກິດຊຶ່ງບໍ່ສາ ມາດຈັບຈ່າຍໃຊ້ໄດ້. 

  ສະເພາະທະນາຄານພັດທະ ນາລາວສາມາດລະດົມເງິນຝາກ ໄດ້ 179,68 ຕື້ກີບ ເທົ່າກັບ 86,57%, ທຽບໃສ່ປີຜ່ານມາເພີ່ມ ຂຶ້ນ 0,16% ແລະປ່ອຍເງິນກູ້ໄດ້ 160,16 ຕື້ກີບ ເທົ່າກັບ 71,93%, ທຽບໃສ່ປີຜ່ານມາເພີ່ມຂຶ້ນ 2,58%; ສ່ວນທະນາຄານສົ່ງ ເສີມກະສິກໍາລະດົມເງິນຝາກໄດ້ 105,51 ຕື້ກີບ, ເທົ່າກັບ 97,35%, ທຽບໃສ່ປີຜ່ານມາເພີ່ມຂຶ້ນ 1,91% ແລະປ່ອຍສິນເຊື່ອໄດ້ 66,09 ຕື້ ກີບ, ເທົ່າກັບ 87,86%, ທຽບໃສ່ ປີຜ່ານມາຫຼຸດລົງ 6,41%; ທະ ນາຄານການຄ້າຕ່າງປະເທດລາວ ລະດົມເງິນຝາກໄດ້ 238,99 ຕື້ ກີບ, ລື່ນແຜນການ 1,81%, ທຽບ ໃສ່ປີຜ່ານມາເພີ່ມຂຶ້ນ 17,15% ແລະປ່ອຍເງິນກູ້ໄດ້ 36,79 ຕື້ກີບ ເທົ່າກັບ 56,17%, ທຽບໃສ່ປີຜ່ານມາຫຼຸດລົງ 47,16%.

  ສ່ວນທະນາຄານນະໂຍບາຍ ສາມາດປ່ອຍສິນເຊື່ອໄດ້ 8,13 ຕື້ກີບ, ເທົ່າກັບ 20,01%, ທຽບ ໃສ່ປີຜ່ານມາຫຼຸດລົງ 87,08%, ທັງນີ້ກໍເນື່ອງຈາກການວາງເງື່ອນ ໄຂຂອງທະນາຄານມີຄວາມເຂັ້ມ ງວດຫຼາຍຂຶ້ນ ແລະອີກຢ່າງການປ່ອຍສິນເຊື່ອໃນ 1 ປີຜ່ານມາ ກໍ່ເປັນສ່ວນໜຶ່ງຂອງງົບປະມານປ່ອຍກູ້ທີ່ເກີນຈາກປີ 2017 ນັ້ນມາຈັດຕັ້ງປະຕິບັດປ່ອຍກູ້ໃນປີ 2018.ສະຖາບັນການເງິນຈຸລະພາກພັດທະນາລະດົມເງິນຝາກໄດ້ 29,17 ຕື້ກີບ,ເທົ່າກັບ 70,60 %, ທຽບໃສ່ປີຜ່ານມາຫຼຸດລົງ 15,57% ແລະປ່ອຍເງິນກູ້ໄດ້ 23,09 ຕື້ກີບ, ເທົ່າກັບ 96,74%, ທຽບໃສ່ປີຜ່ານມາເພີ່ມຂຶ້ນ1 5,89%.

ໂດຍ: ກິ່ງລັດຕະນະ-ນສພ ເສດຖະກິດ-ສັງຄົມ

แชร์