ຄາຣາວານພິຊິດຈອມພູເບ້ຍ ເປີດສາກຂື້ນເປັນທາງການເພື່ອສະຫຼອງ 2 ວັນປະຫວັດສາດ ແລະກະຕຸ້ນທ່ອງທ່ຽວ

   ແຂວງໄຊສົມບູນ ເລີ່ມເປີດຄາຣາວານທ່ອງທ່ຽວຂຶ້ນພິຊິດຈອມພູເບ້ຍຊຶ່ງເປັນພູສູງທີ່ສຸດໃນລາວຂຶ້ນຢ່າງເປັນທາງການໂດຍຂະບວນທຳອິດແມ່ນຂອງການນຳຂັ້ນແຂວງກ່ອນຈະທະຍອຍຈາກຂະບວນບັນດາແຂວງ, ກະຊວງ, ອົງການຈັດຕັ້ງຕ່າງໆ ແລ້ວປິດທ້າຍດ້ວຍຂະບວນສຳຄັນຂອງການນຳຂັ້ນສູງໃນກາງເດືອນໜ້າທັງນີ້ກໍເພື່ອເປັນການສະເຫຼີມສະຫຼອງ 2 ວັນສຳຄັນຂອງຊາດ ແລະເປັນການກະຕຸ້ນການທ່ອງທ່ຽວລາວທ່ຽວລາວເວົ້າສະເພາະແມ່ນທ່ອງທ່ຽວໄຊສົມບູນໃຫ້ກັບມາຄຶກຄັກອີກຄັ້ງຫຼັງຜ່ານພົ້ນວິດກິດໂຄວິດ 19 ທີ່ຍັງຄົງສືບຕໍ່ລະບາດຢູ່ຫຼາຍປະເທດໃນໂລກ.

  ພິທີເປີດຄາຣາວານຂຶ້ນພິຊິດຈອມພູເບ້ຍຄັ້ງປະຫວັດສາດນີ້ໄດ້ຈັດຂຶ້ນຢ່າງເປັນທາງການໃນວັນທີ 20 ພະຈິກ  2020 ທີ່ແຂວງດັ່ງກ່າວໂດຍພາຍໃຕ້ການເປັນປະທານ ແລະນຳໜ້າພາທາງຂະບວນຂອງທ່ານ ພົນຕີ ຄຳລຽງ ອຸທະໄກສອນ ເຈົ້າແຂວງໄຊສົມບູນ, ທ່ານ ຄຳໄພ ສົມຊະນະ ປະທານບໍລິສັດກຸ່ມຄຳໄພຊະນະຈຳກັດຜູ້ດຽວພ້ອມນີ້ກໍມີບັນດາຄະນະປະຈຳພັກແຂວງ,ຫົວໜ້າ, ຮອງຫົວໜ້າພະແນກການຕະຫຼອດຮອດພະນັກງານ ແລະແຂກຖືກເຊີນຈຳນວນໜຶ່ງເຂົ້າຮ່ວມຢ່າງເປັນຂະບວນຄຶກຄື້ນ.

  ທ່ານ ພົນຕີ ຄຳລຽງ ອຸທະໄກສອນ ໂອກາດກ່າວເປີດຄາຣາວານໃຫ້ຮູ້ວ່າ: ການຈັດງານຂະບວນຄາຣາວານທ່ອງທ່ຽວພິຊິດຈອມພູເບ້ຍຄັ້ງນີ້ແມ່ນເປັນຄັ້ງທຳອິດແລະເປັນຄັ້ງປະຫວັດສາດທີ່ໄດ້ຈັດຂຶ້ນຢູ່ແຂວງໄຊສົມບູນຊຶ່ງເປັນຂະບວນການທີ່ມີຄວາມໝາຍ, ຄວາມສຳຄັນທາງດ້ານການເມືອງຢ່າງໜັກແໜ້ນເພາະການທີ່ພວກເຮົາສາມາດຂຶ້ນພິຊິດພູເບ້ຍຈອມພູທີ່ສູງສຸດໃນປະເທດລາວ, ມັນບົ່ງບອກເຖິງໄຊຊະນະອັນຍິ່ງໃຫຍ່ສະແດງເຖິງນໍ້າໃຈຮັກຊາດ, ຮັກບ້ານເກີດເມືອງນອນ, ຮັກວິລະຊົນ,  ຄວາມອົງອາດກ້າຫານແລະມີມານະອົດທົນຂອງພວກເຮົາ.

ຂະບວນຄາຣາວານທ່ອງທ່ຽວພິຊິດຈອມພູເບ້ຍແມ່ນຈະເລີ່ມແຕ່ວັນທີ 20 ພະຈິກ ເປັນຕົ້ນໄປຈົນເຖິງວັນທີ 13ທັນວາ 2020 ຈຶ່ງຈະສຳເລັດຊຶ່ງຈະປະກອບມີທັງໝົດ 7 ຂະບວນໂດຍຈຸດປະສົງຫຼັກແມ່ນເພື່ອຂໍ່ານັບຮັບຕ້ອນສອງວັນປະຫວັດສາດຄືການສະເຫຼີມສະຫຼອງວັນຊາດທີ 2 ທັນວາ ຄົບຮອບ 45 ປີ ແລະວັນຄ້າຍວັນເກີດຂອງທ່ານ ປະທານໄກ ສອນພົມວິຫານ, ຜູ້ນຳທີ່ແສນເຄົາລົບ ຮັກຂອງປວງຊົນລາວທັງຊາດຄົບຮອບ 100 ປີໃຫ້ມີບັນຍາກາດເບີກບານມ່ວນຊື່ນ ແລະສ້າງຄວາມເອກອ້າງທະນົງໃຈຕໍ່ກັບມູນເຊື້ອຮັກຊາດ, ນໍ້າໃຈພິລະອາດຫານຂອງປະຊາຊົນລາວບັນດາເຜົ່າ ແລະວິລະກຳອັນລໍ້າເລີດຂອງນັກຮົບວິລະຊົນ, ນັກຮົບແຂ່ງຂັນທີ່ໄດ້ສ້າງຜົນງານອັນໃຫຍ່ຫຼວງໃນພາລະກິດປົດປ່ອຍຊາດ, ພາລະກິດປົກປັກຮັກສາ ແລະສ້າງສາພັດທະນາປະເທດຊາດໃນໄລຍະຜ່ານມາພາຍໃຕ້ການນຳພາຂອງພັກປະຊາຊົນປະຕິວັດລາວ.

  ທັງເປັນການຊົມເຊີຍຜົນສໍາເລັດກອງປະຊຸມໃຫຍ່ຄັ້ງທີ I ຂອງອົງຄະນະພັກແຂວງໄຊສົມບູນທີ່ຫາກໍສຳເລັດໃນວ່າງບໍ່ດົນມານີ້; ສົ່ງເສີມວຽກງານການທ່ອງທ່ຽວຂອງແຂວງໄຊສົມບູນໃຫ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງແຂວງຕາມ 5 ທ່າແຮງທີ່ໄດ້ວາງໄວ້ ແລະ ກະຕຸ້ນການທ່ອງທ່ຽວໃນໄລຍະທີ່ທົ່ວໂລກກຳລັງໄດ້ຮັບຜົນກະທົບຈາກພະຍາດລະບາດໂຄວິດ-19 ໃຫ້ຫັນມາທ່ອງທ່ຽວແບບ “ລາວທ່ຽວລາວ” ໃຫ້ນັບມື້ຫຼາຍຂຶ້ນໂດຍສະເພາະ ແມ່ນຢູ່ແຂວງໄຊສົມບູນຂອງພວກເຮົາ.

 ທ່ານ ພົນຕີ ຄຳລຽງ ອຸທະໄກສອນ ກ່າວຕື່ມອີກວ່າ: ພູເບ້ຍແມ່ນພູທີ່ສູງທີ່ສຸດໃນ ສປປ ລາວ, ສູງ 2.820 ແມັດ, ເປັນພູທີ່ມີຄວາມອຸດົມສົມບູນທາງດ້ານຊັບພະຍາ ກອນທຳມະຊາດ ແລະຊີວະນາໆພັນຫຼາຍປະການ,ສິ່ງທີ່ໂດດເດັ່ນທີ່ສຸດຂອງພູເບ້ຍກໍຄືລັກສະນະຂອງຕົ້ນໄມ້ທີ່ປົກຫຸ້ມຢ່າງໜາແໜ້ນຢູ່ເທິງຈອມພູເບ້ຍຊຶ່ງພວກເຮົາເອີ້ນກັນວ່າ “ຫຼັງຄາຂອງປະເທດລາວ” ນອກນັ້ນຕົ້ນໄມ້ຍັງຖືກຫຸ້ມຫໍ່ດ້ວຍຂົນເຮັດໃຫ້ຕົ້ນໄມ້ມີຄວາມສວຍງາມເປັນພິເສດ, ມີຄວາມອະລັງການ ແລະອັດສະຈັນຕາເມື່ອໄດ້ເຫັນ ຊຶ່ງພວກເຮົາເອີ້ນກັນວ່າ “ປ່າຂົນເທບນິຍາຍແຫ່ງຄວາມເປັນຈິງ”, ສິ່ງທີ່ເປັນຈຸດເດັ່ນສໍາຄັນຂອງພູເບ້ຍກໍຄື “ດອກກຸຫຼາບລ້ານປີ” ທີ່ເບັ່ງບານຕາມຈອມພູໃນຊ່ວງເດືອນມັງກອນ ຫາ ເດືອນພຶດ ສະພາຊຶ່ງມີເຖິງ 6 ຊະນິດດ້ວຍກັນ.

   ສຸດທ້າຍທ່ານເຈົ້າແຂວງໄຊສົມບູນຍັງໄດ້ກ່າວຍ້ອງຍໍຊົມເຊີຍຄະນະຮັບຜິດຊອບທັງພາກລັດທຸກຂັ້ນທີ່ໄດ້ສຸມທຸກສະຕິປັນຍາ, ແຮງກາຍແຮງໃຈເຂົ້າໃຈການກະກຽມຈັດງານຄາຣາວານທ່ອງທ່ຽວພິຊິດຈອມພູເບ້ຍຈົນປະສົບຜົນສຳເລັດ ແລະ ຂອບໃຈເປັນພິເສດບໍລິສັດກຸ່ມ ຄຳໄພຊະນະ ຈຳກັດຜູ້ດຽວ ທີ່ໄດ້ອຳນວຍຄວາມສະດວກທຸກຢ່າງ, ປະກອບສ່ວນທຶນຮອນເຂົ້າໃນການກະກຽມງານເຮັດໃຫ້ງານໃນຄັ້ງນີ້ໄດ້ດຳເນີນໄປຕາມລະດັບຄາດໝາຍທີ່ວາງໄວ້.

แชร์