ເຜີຍແຜ່ເປົ້າໝາຍການພັດທະນາແບບຍືນຍົງຢູ່ 2 ໂຮງຮຽນ

  ເມື່ອອາທິດຜ່ານມາ, ກອງເລຂາຄະນະຊີ້ນຳລະດັບຊາດເພື່ອການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງນຳໂດຍທ່ານ ກັນຍາ ຄຳມຸງຄຸນ, ຮອງຫົວໜ້າກົມອົງການຈັດຕັ້ງສາກົນ,ກະຊວງການຕ່າງປະເທດໄດ້ລົງເຄື່ອນໄຫວຈັດກອງປະຊຸມເຜີຍແຜ່ກ່ຽວກັບການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ ) ຢູ່ ສປປ ລາວ ໃຫ້ແກ່ຄູອາຈານ ແລະນັກຮຽນນັກສຶກສາທີ່ມະຫາວິທະຍາໄລແຫ່ງຊາດ ແລະໂຮງຮຽນມັດທະຍົມສົມບູນວຽງຈັນ, ເຂົ້າຮ່ວມກອງປະຊຸມເຜີຍແຜ່ຄັ້ງວັນທີ 11 ພະຈິກ 2020 ທີ່ມະຫາວິທະຍາໄລແຫ່ງຊາດມີທ່ານ ຮສ.ປອ ບົວດຳ ແສງຄຳຄຸດລາວົງ, ຫົວໜ້າຫ້ອງການມະຫາວິທະຍາໄລແຫ່ງຊາດ, ມີຜູ້ຕາງໜ້າຈາກຄະນະວິຊາ, ສະຖາບັນ, ຄູ-ອາຈານ ແລະນັກສຶກສາປີ 4 ທົ່ວມະຫາວິທະຍາໄລແຫ່ງຊາດເຂົ້າຮ່ວມທັງໝົດ 300 ກວ່າຄົນ.

  ສ່ວນກອງປະຊຸມເຜີຍແຜ່ຄັ້ງວັນທີ 12 ພະຈິກ 2020 ທີ່ໂຮງຮຽນມັດທະຍົມສົມບູນວຽງຈັນມີທ່ານ ນາງ ປະທຸມພອນ ພິມປະໄພ, ຮອງຜູ້ອຳນວຍການໂຮງຮຽນມັດທະຍົມສົມບູນວຽງຈັນ, ຄູ-ອາຈານ, ນ້ອງນັກຮຽນຂອງໂຮງຮຽນມັດທະຍົມສົມບູນວຽງຈັນຈຳນວນ 250 ຄົນ, ມີບັນດາທ່ານແຂກຖືກເຊີນຈາກກະຊວງສຶກສາ ທິການ ແລະກີລາ, ພະແນກສຶກສາທິການ ແລະກີລານະຄອນຫຼວງວຽງຈັນ, ຜູ້ອຳນວຍການ, ຮອງຜູ້ອຳນວຍການ ແລະຜູ້ຕາງໜ້າຈາກໂຮງຮຽນມັດທະຍົມສົມບູນເອກະຊົນທີ່ຢູ່ໃກ້ຄຽງຈຳນວນ 9 ແຫ່ງ ເຂົ້າຮ່ວມ.

  ຈຸດປະສົງຕົ້ນຕໍຂອງກອງປະຊຸມດັ່ງກ່າວແມ່ນເພື່ອສ້າງໂອກາດໃຫ້ບັນດາຄູ-ອາຈານ, ນັກຮຽນນັກສຶກສາໄດ້ຮັບຮູ້ ແລະສ້າງຄວາມເຂົ້າໃຈທີ່ຖືກຕ້ອງກ່ຽວກັບປະຫວັດຄວາມເປັນມາຂອງ ປພຍ ແລະການຈັດຕັ້ງປະຕິບັດເປົ້າໝາຍດັ່ງກ່າວຢູ່ ສປປ ລາວ, ພາຍຫຼັງຮັບຟັງການບັນລະຍາຍຈາກນັກວິທະຍາກອນແລ້ວກອງປະຊຸມຍັງໄດ້ເປີດໂອກາດໃຫ້ນ້ອງນັກຮຽນນັກສຶກສາມີສ່ວນຮ່ວມໃນການສ້າງກິດຈະກຳຖາມ-ຕອບ ເພື່ອສ້າງບັນຍາກາດຕິດພັນກັບການແລກປ່ຽນຂໍ້ມູນຂ່າວສານກ່ຽວກັບການຈັດຕັ້ງປະຕິບັດ ປພຍ ຢູ່ປະເທດເຮົາໃນໄລຍະທີ່ຜ່ານມາເຮັດໃຫ້ຜູ້ເຂົ້າຮ່ວມໄດ້ຮັບຮູ້ ແລະສາມາດນຳໄປໝູນໃຊ້ເຂົ້າໃນການຮຽນການສອນໃນຕໍ່ໜ້າ, ໃນກອງປະຊຸມດັ່ງກ່າວ, ກອງເລຂາຄະນະຊີ້ນຳລະດັບຊາດເພື່ອການຈັດຕັ້ງປະຕິບັດ ປພຍ ຍັງໄດ້ນຳສະເໜີ SDGs Application ເພື່ອເປັນຊ່ອງທາງໃໝ່ໃນການສະໜອງຂໍ້ມູນຂ່າວສານເປັນການສົ່ງເສີມການຮຽນຮູ້ກ່ຽວກັບເປົ້າໝາຍການພັດທະນາແບບຍືນຍົງຢູ່ ສປປ ລາວສຳລັບປະຊາຊົນລາວເພື່ອສາມາດເຂົ້າເຖິງຂໍ້ມູນ ປພຍ ແລະກໍ່ເພື່ອຍົກລະດັບການເຜີຍແຜ່ໃຫ້ທັນສະໄໝ ແລະນຳໃຊ້ເຕັກໂນໂລຊີໃຫ້ແທດເໝາະກັບຍຸກປະຈຸບັນ. 

  ສປປ ລາວ ເປັນປະເທດໜຶ່ງທີ່ໄດ້ມີຄວາມພະຍາຍາມເຊື່ອມສານບັນດາຕົວຊີ້ບອກຂອງ ປພຍ ເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດຂອງຕົນຢ່າງຕັ້ງໜ້າ ໂດຍສະເພາະແມ່ນແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII (2016-2020), ຊຶ່ງກວມເອົາປະມານ 60% ຂອງຕົວຊີບອກທັງໝົດຂອງແຜນດັ່ງກ່າວ ແລະຍັງຈະໄດ້ສືບຕໍ່ເຊື່ອມສານບັນດາຕົວຊີ້ບອກທີ່ຍັງເຫຼືອເຂົ້າໃສ່ແຜນພັດທະນາເສດຖະກິດ-ສັງຄົມ 5 ປີຄັ້ງທີ IX ແລະແຜນ X ຂອງຕົນ, ແນໃສ່ເຮັດໃຫ້ເສດຖະກິດແຫ່ງຊາດມີການເຕີບໂຕຢ່າງຕໍ່ເນື່ອງຕາມທິດສີຂຽວ ແລະຍືນຍົງ, ແກ້ໄຂຊີວິດການເປັນຢູ່ຂອງປະຊາຊົນລາວບັນດາເຜົ່າ, ປັບປຸງບັນດາພື້ນຖານໂຄງລາງທີ່ຈຳເປັນ ແລະ ສ້າງບັນດາປະຖົມປັດໄຈເພື່ອກະກຽມຄວາມພ້ອມໃຫ້ແກ່ການນຳພາປະເທດຊາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາແລະກ້າວຂຶ້ນເປັນປະເທດກຳລັງພັດທະນາທີ່ມີລາຍຮັບປານກາງສູງໃນອະນາຄົດ, ນອກນັ້ນ, ຍັງໄດ້ສົ່ງເສີມການມີສ່ວນ ຮ່ວມຂອງທຸກພາກສ່ວນໃນສັງຄົມເພື່ອຮັບປະກັນການຈັດຕັ້ງປະຕິບັດໃຫ້ໄດ້ປະສິດທິພາບ ແລະປະສິດທິຜົນ, ບົນທິດທາງ “ກ້າວໄປພ້ອມກັນ” ຫຼື (Leavingnoone behind) ແນໃສ່ໃຫ້ສາມາດບັນລຸຄາດໝາຍໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງໃນປີ 2030 ໃຫ້ປາກົດຜົນເປັນຈິງ.

 

แชร์