ຍທຂ ຫຼວງພະບາງ ຍົກລະດັບວຽກຄຸ້ມຄອງ ແລະສອບເສັງໃບຂັບຂີ່

  ພະແນກໂຍທາທິການ ແລະຂົນສົ່ງແຂວງຫຼວງພະບາງໄດ້ເປີດຊຸດອົບຮົມວຽກງານຄຸ້ມຄອງ ແລະສອບເສັງໃບຂັບຂີ່ເພື່ອຍົກລະດັບຄວາມຮູ້ດ້ານວິຊາການໃຫ້ກັບພະນັກ ງານຮັບຜິດຊອບວຽກງານຂົງເຂດດັ່ງກ່າວຊຶ່ງໄດ້ຈັດຂຶ້ນ ໃນລະຫວ່າງວັນທີ 17-19 ພະຈິກ 2020 ນີ້ທີ່ພະແນກ ຍທຂ ໃຫ້ກຽດເຂົ້າຮ່ວມເປັນປະທານຂອງທ່ານ ບຸນຄົງ ສຸກສະຫວັດ ຮອງຫົວໜ້າພະແນກໂຍທາທິການ ແລະຂົນສົ່ງແຂວງ,ມີຂະແໜງການທີ່ກ່ຽວຂ້ອງພາຍໃນພະແນກ ແລະຕາງໜ້າຫ້ອງການໂຍທາທິການ ແລະ ຂົນ ສົ່ງບັນດາເມືອງ, ວິທະຍາກອນພ້ອມດ້ວຍສໍາມະນາກອນເຂົ້າຮ່ວມ.

 ທ່ານ ບຸນຄົງ ສຸກສະຫວັດ ຮອງຫົວໜ້າພະແນກໂຍທາທິການ ແລະຂົນສົ່ງກ່າວວ່າ: ຊຸດອົບຮົມຄັ້ງນີ້ເພື່ອໃຫ້ຜູ້ທີ່ເຮັດວຽກດ້ານການຄຸ້ມຄອງການຂັບຂີ່ພາຫະນະຂອງພະແນກ ຍທຂ ໄດ້ຮັບຮູ້ ແລະເຂົ້າໃຈອີກຕື່ມກ້າວໜຶ່ງໃນວຽກງານຄຸ້ມຄອງພາຫະນະ ແລະການສອບເສັງໃບຂັບຂີ່ດ້ວຍລະບົບທີ່ທັນສະໄໝນໍາໄປຈັດຕັ້ງປະຕິບັດຄຸ້ມຄອງຕໍ່ຜູ້ທີ່ໃຊ້ຍານພາຫະນະໃຫ້ເປັນລະບຽບຮຽບຮ້ອຍຕາມທ້ອງຖະໜົນ ແລະເຂົ້າສູ່ລະບຽບການຢ່າງເຂັ້ມງວດພ້ອມນີ້ສໍາມະນາກອນທີ່ເຂົ້າຮ່ວມຍັງຈະໄດ້ຮັບຟັງການເຜີຍ ແຜ່ບາງມາດຕາຂອງກົດໝາຍວ່າດ້ວຍການສັນຈອນທາງບົກ, ປ້າຍ ແລະ ເຄື່ອງໝາຍການຈະລາຈອນ, ພຶດຕິກໍາຂອງຜູ້ຂັບຂີ່ທີ່ມີຄວາມສ່ຽງກໍ່ໃຫ້ເກີດອຸບັດເຫດ, ສະ ພາບການສັນຈອນ, ຜົນເສຍຫາຍ,ສະຖິຕິ ແລະວິທີແກ້ໄຂ,ການເບິ່ງພາບວິດີໂອຈາກກ້ອງວົງຈອນປິດ ແລະການແກ້ໄຂຂໍ້ຂ້ອງໃຈລວມເຖິງການຖາມ-ຕອບ ເພື່ອສົນທະ ນາແລກປ່ຽນບົດຮຽນຮ່ວມກັນ, ຮັບຟັງເອກະສານ ແລະຄູ່ມືການສອບເສັງ, ຂັ້ນຕອນການປະກອບເອກະສານຕ່າງໆຂອງຜູ້ທີ່ມາຂໍສອບເສັງເອົາໃບຂັບຂີ່, ການເຂົ້າຂໍ້ມູນ ໃບຂັບຂີ່, ການພິມໃບນັດສອບເສັງ-ໃບຄະແນນ, ການຖ່າຍຮູບແລະການອັບໂຫຼດຮູບເຂົ້າໃບຂັບຂີ່,ການນໍາໃຊ້ຄອມພິວເຕີເຂົ້າໃນການສອບເສັງຜ່ານລະບົບອອນລາຍ, ຂັ້ນຕອນການເຂົ້າຂໍ້ມູນປຶ້ມກົງໂຕນ, ແນະນໍາຂັ້ນຕອນວິທີໃຊ້ ແລະລົງປະຕິບັດຕົວຈິງເພື່ອໃຫ້ຜູ້ເຂົ້າຮ່ວມຝຶກອົບຮົມຊຸດນີ້ໄດ້ມີຄວາມເຂົ້າໃຈເລິກເຊິ່ງຕື່ມອີກກ້າວໜຶ່ງ.

   ພ້ອມນີ້ທ່ານຮອງຫົວໜ້າພະແນກ ຍທຂ ຍັງໄດ້ຮຽກຮ້ອງໃຫ້ທຸກຄົນຈົ່ງເອົາໃຈໃສ່ ແລະຍົກສູງຄວາມຮັບຜິດຊອບເພື່ອໃຫ້ຊຸດຝຶກອົບຮົມຊຸດນີ້ໄດ້ບັນລຸຕາມຈຸດປະສົງ ແລະນໍາເອົາບົດຮຽນດັ່ງກ່າວເຂົ້າໄປໝູນໃຊ້ເຂົ້າໃນການປະຕິບັດໜ້າທີ່ຂອງຕົນໃຫ້ໄດ້ຮັບປະສິດທິພາບສູງ ແລະວ່ອງໄວຂຶ້ນກວ່າເກົ່າ.

------------

ຂ່າວ: ສີສຸວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์