ທ່ານ ນາງ ຈັນທະຈອນ ວົງໄຊ ປະທານ ສທຍ ອີກສະໄໝ

   ວັນທີ 18 ພະຈິກ 2020, ທີ່ໂຮງແຮມແລນມາກ ນະຄອນຫຼວງວຽງຈັນ, ໄດ້ມີກອງປະຊຸມໃຫຍ່ຄັ້ງທີ III ສະມາຄົມນັກທຸລະກິດຍິງ (ສທຍ) ໂດຍເຂົ້າຮ່ວມຂອງທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະການຄ້າ,ທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະອຸດສາຫະກຳແຫ່ງ ຊາດລາວ, ມີບັນດາສະມາຊິກສະມາຄົມນັກທຸລະກິດຍິງສູນກາງ, ແຂວງ, ນະຄອນຫຼວງ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

   ທ່ານ ນາງ ຈັນທະຈອນ ວົງໄຊ ປະທານສະມາຄົມທຸລະກິດຍິງ (ສທຍ) ທັງເປັນປະທານກອງປະຊຸມໄດ້ໃຫ້ຮູ້ວ່າ: ກອງປະຊຸມຄັ້ງນີ້, ໄດ້ພ້ອມກັນຕີລາຄາຢ່າງພາວະວິໄສ, ຕໍ່ກັບຂໍ້ຄົງຄ້າງ, ອຸປະສັກທີ່ຍັງມີຢູ່ໃນສະມາຄົມຂອງພວກເຮົາໃນ 5 ປີຜ່ານມາຊອກຫາສາເຫດ ແລະບົດຮຽນທີ່ຖອດຖອນໄດ້ຈາກການນໍາພາເພື່ອນໍາມາເປັນຈຸດໜຶ່ງທີ່ຕ້ອງໄດ້ ສືບຕໍ່ສູ້ຊົນ, ເປັນບ່ອນອີງໃຫ້ແກ່ການກໍາ ນົດທິດທາງ 5 ປີຕໍ່ໜ້າ (2021-2025), ກອງປະຊຸມຍັງໄດ້ຮັບຮອງເອົາກົດລະບຽບສະບັບປັບປຸງຕາມດໍາລັດໃໝ່ຂອງລັດຖະບານ, ຊຶ່ງຜ່ານມາສະມາຄົມນັກທຸລະກິດຍິງໄດ້ຈັດກອງປະຊຸມຄະນະສະມາຄົມນັກທຸລະກິດແມ່ຍິງລາວສະຫຼຸບງານ 6 ເດືອນຕົ້ນປີ ແລະວາງແຜນ 6 ເດືອນທ້າຍປີ, ບົດສະຫຼຸບ ແລະແຜນການປະຈໍາປີທຸກປີສໍາລັບປີ 2020; ໄດ້ຈັດກອງປະຊຸມຜ່ານທາງອອນລາຍເພື່ອປຶກສາຫາລືວຽກງານ ແລະຊອກວິທີທາງແກ້ໄຂການປະຕິບັດວຽກງານ; ໄດ້ນໍາພາແນວຄິດພາຍໃນຄະນະ ແລະສະມາຊິກ ສທຍ ປຸກລະດົມ,ເອື້ອອຳນວຍຄວາມສະດວກໃຫ້ສະມາຊິກດໍາເນີນທຸລະກິດໃຫ້ສອດຄ່ອງກັບຕາມນະໂຍບາຍເສດຖະກິດແບບໃຫມ່ຂອງພັກ-ລັດ ສະແດງອອກ; ຈັດພິມປຶ້ມ “ລາງວັນເຄືອຂ່າຍຜູ້ປະກອບການແມ່ຍິງດີເດັ່ນອາຊຽນ” ຂອງສາຍໄດ້ 1 ເຫຼັ້ມ ດ້ວຍຄວາມຍາວ 90 ໜ້າ, ຈໍານວນ 250 ຫົວ; ໄດ້ເຂົ້າຮ່ວມພິທີສະເຫຼີມສະຫຼອງວັນສໍາຄັນຂອງຊາດ ແລະຂອງແມ່ຍິງເປັນຕົ້ນເຂົ້າຮ່ວມສະເຫຼີມສະຫຼອງວັນກອງທັບທີ 20 ມັງກອນ, ວັນແມ່ຍິງສາກົນ, ວັນບຸນປີໃໝ່ລາວ, ວັນກໍາມະກອນສາກົນ, ວັນເດັກສາກົນທັງເປັນວັນປູກຕົ້ນໄມ້ແຫ່ງຊາດ, ວັນສ້າງຕັ້ງອົງການຈັດຕັ້ງສະພະພັນແມ່ຍິງລາວ, ທີ 20 ກໍລະກົດ, ວັນທີ 23 ສິງຫາ ແລະວັນຊາດ ທີ 2 ທັນວາ ຂອງແຕ່ລະປີຢ່າງເປັນປະຈໍາ; ໄດ້ເປີດກອງປະຊຸມລະດັບຊາດພາຍໃຕ້ຫົວຂໍ້ “ສ້າງແຮງ ຈູງໃຈໃນການດໍາເນີນທຸລະກິດຂອງແມ່ຍິງລາວເພື່ອກ້າວໃຫ້ທັນຍຸກດີຈີຕອລ ແລະບໍ່ຖິ້ມຜູ້ໃດໄວ້ທາງຫຼັງ” ແລະໄດ້ຈັດຕັ້ງພິທີມອບໃບຍ້ອງຍໍໃຫ້ສະມາຊິກ ສທຍ ຜູ້ໄດ້ຮັບລາງວັນ AWEN Award ແຕ່ປີ 2015 ເຖິງປີ 2019.

  ໃນກອງປະຊຸມບັນດາທ່ານສະມາຊິກສະມາຄົມນັກທຸລະກິດແມ່ຍິງໃນນາມຜູ້ແທນສົມບູນກອງປະຊຸມໃຫຍ່ຍັງໄດ້ໃຊ້ສິດປະຊາທິໄຕປ່ອນບັດຄັດເລືອກເອົາຄະນະບໍລິຫານສະມາຄົມທຸລະກິດແມ່ຍິງຊຸດໃໝ່ເພື່ອສືບຕໍ່ຊີ້ນໍາ-ນໍາພາຈັດຕັ້ງປະຕິບັດມະຕິກອງປະຊຸມໃຫຍ່ສະມາຄົມທຸລະກິດແມ່ຍິງຄັ້ງທີ III ຜ່ານການປ່ອນບັດເລືອກຕັ້ງເລືອກຄະ ນະຊຸດໃໝ່ໄດ້ 9 ທ່ານ, ໃນນັ້ນ ທ່ານ ນາງ ຈັນທະຈອນ ວົງໄຊ ເປັນປະທານ,ທ່ານ ນາງ ສິຣິຄູນ ພູມລາວັນ ເປັນຮອງ, ທ່ານ ນາງ ວິດາລີ ຈັນທະຜາສຸກ ເປັນຮອງ ແລະ ອີກ 6 ທ່ານ ເປັນຄະນະ; ເລືອກເອົາທ່ານ ນາງ ສີວິໄຊ ທຳມະລັງສີ ເປັນປະທານກວດກາ ແລະອີກ 2 ທ່ານ ເປັນຮອງ.

แชร์