ຄຳມ່ວນ ມີ 229 ໂຄງການຊົນລະປະທານປີນີ້ເລີ່ມຂະບວນຜະລິດລະດູແລ້ງແລ້ວ

  ຄຳມ່ວນແມ່ນນອນໃນບັນດາແຂວງພາກກາງທີ່ມີດິນອຸດົມສົມບູນ ແລະມີແມ່ນໍ້າຫຼາຍສາຍທີ່ອຳນວຍຄວາມສະດວກໃຫ້ແກ່ການຜະລິດກະສິກຳເວົ້າສະເພາະແມ່ນການຜະລິດສະບຽງອາຫານກາຍເປັນອູ່ເຂົ້າອູ່ປາໜຶ່ງຂອງປະເທດໂດຍປະຈຸບັນທົ່ວແຂວງມີໂຄງການຊົນລະປະທານທັງໝົດ 229ໂຄງການ,ສາມາດຕອບສະໜອງນໍ້າໃຫ້ແກ່ການຜະລິດໃນລະດູຝົນ 19,5ພັນເຮັກຕາ ແລະລະດູ ແລ້ງ 12 ພັນເຮັກຕາ.

   ພິທີເປີດຂະບວນການຜະລິດລະດູແລ້ງສົກປີ 2020-2021 ຂອງແຂວງຄຳມ່ວນໄດ້ຈັດຂຶ້ນໃນວັນທີ 17 ພະຈິກ ຜ່ານມາທີ່ບ້ານນາຄືເມືອງຫີນບູນ ເຂົ້າຮ່ວມມີທ່ານ ບຸນມີພິມ ມະສອນ ຮອງເຈົ້າແຂວງຄຳມ່ວນ, ທ່ານ ຄຳສິງ ອໍລະວັນ ເຈົ້າເມືອງຫີນບູນ, ທ່ານ ສຸກັນ ອິນທະນູຮັກ ຮອງຫົວໜ້າພະແນກກະສິກຳ ແລະ ປ່າໄມ້ແຂວງພ້ອມດ້ວຍການນຳຂອງເມືອງອ້ອມຂ້າງ,ບັນດາພະແນກການ,ຂະແໜງການທີ່ກ່ຽວຂ້ອງອຳນາດການປົກຄອງບ້ານ ແລະພໍ່ແມ່ປະຊາຊົນທີ່ເປັນຊາວນາເຂົ້າຮ່ວມ.

  ທ່ານ ສຸກັນ ອິນທະນູຮັກ ໄດ້ລາຍງານວ່າ: ແຂວງຄຳມ່ວນມີເນື້ອທີ່ສາມາດທຳການຜະລິດ 1 ແສນກວ່າເຮັກຕາ ແລະມີແມ່ນໍ້າຫຼາຍສາຍທີ່ອຳນວຍຄວາມສະດວກໃຫ້ແກ່ການຜະລິດກະສິກຳປະຈຸບັນທົ່ວແຂວງມີໂຄງການຊົນລະປະທານທັງໝົດ229 ໂຄງການ, ສາມາດຕອບສະໜອງນໍ້າໃຫ້ແກ່ການຜະລິດໃນລະດູຝົນ 19,5 ພັນເຮັກຕາ ແລະລະດູແລ້ງ 12 ພັນເຮັກຕາ.

   ຢ່າງໃດກໍຕາມແຂວງຄຳມ່ວນແມ່ນນອນຢູ່ໃນດິນທີ່ມີຄວາມອຸດົມສົມບູນປານກາງ ແລະຕໍ່າເມື່ອດິນມີຄຸນນະພາບຕໍ່າສະມັດຕະພາບໃນການຜະລິດກໍ່ຕໍ່າເຊັ່ນດຽວກັນ ຊຶ່ງການປັບປຸງດິນໃຫ້ມີຄຸນນະພາບດີສາມາດເຮັດໄດ້ດ້ວຍການໃສ່ຝຸ່ນບົ່ມຈາກເສດພືດ, ຝຸ່ນຄອກ, ຝຸ່ນຊີວະພາບ ແລະອື່ນໆການໄຖກົບຕໍເຟືອງ ຫຼືການໄຖປົກຕໍເຟືອງລົງໃນດິນພາຍຫຼັງການເກັບກ່ຽວແລ້ວປະປ່ອຍໃຫ້ເຟືອງຍ່ອຍສະຫຼາຍເອງກໍ່ແມ່ນວິທີການໜຶ່ງທີ່ດີຕໍ່ການປັບປຸງດິນໃຫ້ມີຄວາມອຸດົມສົມບູນໂດຍຜົນການຄົ້ນຄວ້າວິໄຈຂອງນັກວິທະຍາສາດດິນພົບວ່າ: ການເຮັດແບບນີ້ຢ່າງຕໍ່ເນື່ອງທຸກລະດູການຈະຊ່ວຍເພີ່ມທາດໄນໂຕຼເຈນ ແລະສິລິເກດຊຶ່ງລ້ວນແຕ່ເປັນທາດອາຫານຫຼັກຂອງເຂົ້າ-ພືດທັງເຮັດໃຫ້ດິນອ່ອນຜຸຜຸ່ຍດີ.

 ສຳລັບໃນປີ 2019 ຜ່ານມາແຂວງຄຳມ່ວນສາມາດໄຖກົບຕໍເຟືອງໄດ້ 5,5 ພັນເຮັກຕາ ແລະຂົນຝຸ່ນຄອກລົງໃສ່ນາໄດ້ 18,4 ພັນໂຕນ, ດ້ານການສັກຢາປ້ອງກັນພະ ຍາດສັດໃນປີ 2020 ມີຄວາຍ 13 ພັນກວ່າໂຕ ກວມເອົາ 17%, ງົວ 37 ພັນໂຕ ກວມເອົາ26%, ໝູ 28 ພັນໂຕ ກວມເອົາ 39%, ແບ້ 1 ພັນໂຕກວມເອົາ 3% ແລະສັດປີກ 44 ພັນໂຕ ກວມເອົາ 3%.

  ໃນພິທີດັ່ງກ່າວບັນດາພາກສ່ວນຕ່າງໆທີ່ເຂົ້າຮ່ວມກໍ່ໄດ້ຮັບຊົມວິທີການໄຖກົບຕໍເຟືອງ, ການສັກຢາກັນພະຍາດໃຫ້ແກ່ສັດ ແລະຕອນທ້າຍພິທີຕັດແຖບຜ້າ,ລັ່ນຄ້ອງ 9 ບາດເພື່ອຢັ້ງຢືນເຖິງການເປີດຂະບວນການຜະລິດລະດູແລ້ງສົກປີ 2020-2021ຢ່າງເປັນທາງການພ້ອມທັງເປີດປະຕູນໍ້າເຂົ້າຄອງຊົນລະປະທານເພື່ອທໍາການຜະລິດຂອງພໍ່ແມ່ປະຊາຊົນ.

-------------

ຂ່າວ: ກອງຄຳ. ຮູບພາບ: #ຫນັງສືພິມເສດຖະກິດສັງຄົມ

แชร์