ເຊັນສັນຍາໂຄງການສ້າງອາຄານພະແນກການຕ່າງປະເທດແຂວງໄຊຍະ

   ພິທີເຊັນສັນຍາຮັບເໝົາໂຄງການກໍ່ສ້າງອາຄານພະແນກການຕ່າງປະເທດ ແຂວງໄຊຍະບູລີ ລະຫວ່າງພະແນກການຕ່າງປະເທດ ແລະບໍລິສັດພອນຈະເລີນຊັບກໍ່ສ້າງຂົວທາງ ແລະສ້ອມແປງເຄຫາສະຖານຈໍາກັດຜູ້ດຽວເປັນຜູ້ຮັບເໝົາກໍ່ສ້າງໄດ້ຈັດຂຶ້ນໃນວັນທີ 18 ພະຈິກ 2020 ນີ້ທີ່ຫ້ອງປະຊຸມພະແນກການຕ່າງປະເທດແຂວງ, ເຂົ້າຮ່ວມມີທ່ານ ລືໄຊ ພະດວງເດດ ຫົວໜ້າພະແນກການຕ່າງປະເທດແຂວງ, ທ່ານ ພອນ ນັນທະວົງ ຫົວໜ້າບໍລິສັດພອນຈະເລີນຊັບກໍ່ສ້າງຂົວທາງ ແລະ ສ້ອມແປງເຄຫາສະຖານຈໍາກັດຜູ້ດຽວ, ມີຫົວໜ້າ, ຮອງຫົວໜ້າພະແນກການທີ່ກ່ຽວຂ້ອງພ້ອມດ້ວຍວິຊາການເຂົ້າຮ່ວມເປັນສັກຂີພິຍານ.

 ພະແນກການຕ່າງປະເທດໄດ້ກະກຽມການປຸກສ້າງອາຄານຂອງພະແນກຢູ່ບໍລິເວນດິນຈັດສັນຂອງສໍານັກງານລັດຢູ່ບ້ານນາໄຮ, ໃນເນື້ອທີ່ 2.390 ຕາແມັດ, ໄດ້ອອກແບບການກໍ່ສ້າງພະແນກການຕ່າງປະເທດຜ່ານພະແນກໂຍທາທິການ ແລະຂົນສົ່ງແຂວງທີ່ມີມູນຄ່າລວມທັງໝົດປະມານ 3 ຕື້ກວ່າກີບ.

   ສໍາລັບງົບປະມານກໍ່ສ້າງແມ່ນໄດ້ນໍາໃຊ້ງົບຊ່ວຍເຫຼືອຈາກແຂວງອຽນບາຍ ສສ ຫວຽດນາມ ຈໍານວນ 3 ຕື້ດົງ ແລະງົບປະມານການປະກອບສ່ວນພາຍໃນຂອງແຂວງ 2 ຕື້ກີບ, ໃນການເຊັນສັນຍາຄັ້ງນີ້ຜູ້ຮັບເໝົາໂຄງການຕ້ອງໄດ້ປະຕິບັດຕາມສັນຍາໃຫ້ສໍາເລັດ 100% ພາຍໃນກໍານົດ 3 ປີ ໂດຍເລີ່ມແຕ່ເດືອນພະຈິກ 2020 ເປັນຕົ້ນໄປ, ຜູ້ຮັບເໝົາໂຄງການຕ້ອງຮັບປະກັນດ້ານເຕັກນິກ ແລະຄຸນນະພາບໃຫ້ແກ່ເຈົ້າຂອງໂຄງການຫຼັງຈາກການກວດກາສໍາເລັດ ແລະໄດ້ມອບ-ຮັບ ເປັນຕົ້ນໄປພາຍໃນກໍານົດ 12 ເດືອນ ພ້ອມທັງວາງເງິນຄໍ້າປະກັນໂຄງການຈໍານວນ 10% ຂອງມູນຄ່າໂຄງການຕາມສັນຍາກໍລະນີສິ່ງກໍ່ສ້າງໂຄງການດັ່ງກ່າວຫາກເປ່ເພເສຍຫາຍ, ມີຄວາມຜິດພາດເກີດຂຶ້ນດ້ວຍສາເຫດໃດກໍ່ຕາມຜູ້ຮັບເໝົາໂຄງການຕ້ອງໄດ້ຮັບຜິດຊອບຕໍ່ຜົນເສຍຫາຍທັງໝົດພຽງຝ່າຍດຽວເວັ້ນເສຍແຕ່ກໍລະນີຍ້ອນສາເຫດສຸດວິໄສເທົ່ານັ້ນ.

   ການກວດກາພາກສະໜາມທຸກຄັ້ງເຈົ້າຂອງໂຄງການຈະຕ້ອງໄດ້ປະສານສົມທົບຄະນະກໍາມະການຕາມຂໍ້ຕົກລົງແຕ່ງຕັ້ງເພື່ອລົງກວດກາບັນດາໜ້າວຽກເປັນແຕ່ລະໄລຍະນັບແຕ່ການນໍາເອົາວັດສະດຸ-ອຸປະກອນກໍ່ສ້າງຕ່າງໆມາຮອດພາກສະໜາມ, ການກໍ່ສ້າງປະຕິບັດໜ້າວຽກສໍາເລັດ 30%, 50% ແລະ ໄດ້ຈັດຕັ້ງປະຕິບັດໜ້າວຽກຂອງໂຄງການທັງໝົດສໍາເລັດ 100% ກ່ອນການມອບ-ຮັບໃຫ້ເຈົ້າຂອງໂຄງການ, ຝ່າຍເຈົ້າຂອງໂຄງການຕ້ອງອໍານວຍຄວາມສະດວກໃຫ້ແກ່ບໍລິສັດຜູ້ຮັບເໝົາກໍ່ສ້າງໃນການພົວພັນວຽກງານຕ່າງໆກັບພາກລັດເພື່ອໄກ່ເກ່ຍບັນຫາສິ່ງຂີດຂວາງຕ່າງໆທີ່ອາດຈະເກີດຜົນກະທົບເຮັດໃຫ້ໂຄງການຫຼ້າຊ້າ, ລົງຊຸກຍູ້, ກວດກາ ແລະຕິດຕາມຢູ່ພາກສະໜາມ ແລະລາຍງານຄະນະຊີ້ນໍາຮັບຊາບຕະຫຼອດໄລຍະດໍາເນີນໂຄງການເພື່ອໃຫ້ໄດ້ລາຍງານຂັ້ນເທິງໃຫ້ທັນເວລາ.

   ຈາກນັ້ນ ທ່ານ ປອ ລືໄຊ ພະດວງເດດ ຫົວໜ້າພະແນກການຕ່າງປະເທດແຂວງ ແລະ ທ່ານ ພອນ ນັນທະວົງ ຫົວໜ້າບໍລິສັດພອນຈະເລີນຊັບກໍ່ສ້າງຂົວທາງ ແລະສ້ອມແປງເຄຫາສະຖານຈໍາກັດຜູ້ດຽວໄດ້ລົງນາມເຊັນບົດບັນທຶກຮ່ວມກັນ.

-------------

ຂ່າວ: ມະໄລວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์