ເທບວົງສາ ເລີ່ມສຳຫຼວດກຽມພັດທະນາພູຈວມ ແລະຕາດໄຟໄໝ້ກາຍເປັນແຫຼ່ງທ່ອງທ່ຽວໜ້າສົນໃຈ

  ບໍລິສັດ ເທບວົງສາ ພາວເວີ ຈໍາກັດ ໄດ້ຮັບຄວາມໄວ້ວາງໃຈຈາກອຳນາດການປົກຄອງແຂວງເຊກອງເປັນເວລາ 1 ປີເພື່ອໃຫ້ເຂົ້າສຶກສາ-ສໍາຫຼວດຄວາມເປັນໄປໄດ້ເຂດພູຈວມ ແລະນໍ້າຕົກຕາດໄຟໄໝ້ທີ່ເມືອງທ່າແຕງກ່ອນກ້າວພັດທະນາເປັນແຫຼ່ງທ່ອງທ່ຽວທໍາມະຊາດ, ກະສິກໍາປະສົມ, ປະຫວັດສາດ, ຊົນເຜົ່າທີ່ໜ້າສົນໃຈອີກແຫ່ງຂອງແຂວງເຊກອງກໍຄືຂອງ ສປປ ລາວ.

  ພິທີເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາ-ສໍາຫຼວດຄວາມເປັນໄປໄດ້ໂຄງການດັ່ງກ່າວໄດ້ຈັດຂຶ້ນໃນວັນທີ 16 ພະຈິກ 2020 ທີ່ຫ້ອງວ່າການແຂວງເຊກອງ ລະຫວ່າງອົງການປົກຄອງແຂວງຊຶ່ງຕາງໜ້າໂດຍທ່ານ ສາກົນ ພອນປະເສີດ ຫົວໜ້າພະແນກແຜນການ ແລະການລົງທຶນແຂວງແລະທ່ານ ຄໍາປະສິດ ເທບວົງສາ ປະທານບໍລິສັດເທບວົງສາ ພາວເວີ ຈໍາກັດ ໂດຍເຂົ້າຮ່ວມເປັນສັກຂີພິຍານຂອງທ່ານ ເຫຼັກໄຫຼສີວິໄລ ເຈົ້າແຂວງໆເຊກອງພ້ອມນີ້ກໍມີພາກສ່ວນທີ່ກ່ຽວຂ້ອງທັງສອງຝ່າຍ.

  ໃນບົດບັນທຶກຄວາມເຂົ້າໃຈທັງສອງຝ່າຍເຫັນດີເປັນເອກະພາບນໍາກັນວ່າ: ສໍາລັບແຂວງແມ່ນຕ້ອງການພັດທະນາສະພາບເສດຖະກິດ-ສັງຄົມ ແລະສົ່ງເສີມການທ່ອງທ່ຽວຂອງແຂວງໃຫ້ກາຍເປັນຈຸດໃຈກາງໃນ 4 ແຂວງພາກໃຕ້ ເພື່ອແກ້ໄຂຄວາມທຸກຍາກຂອງປະຊາຊົນບັນດາເຜົ່າຢູ່ແຂວງເຊກອງໃຫ້ນັບມື້ນັບດີຂຶ້ນ.

  ສ່ວນບໍລິສັດແມ່ນເພື່ອສຶກສາ-ສໍາ ຫຼວດຄວາມເປັນໄປໄດ້ເພື່ອກ້າວໄປສູ່ການພັດທະນາເຂດພູຈວມ ແລະນໍ້າຕົກຕາດໄຟໄໝ້ເປັນແຫຼ່ງທ່ອງທ່ຽວທໍາມະຊາດ, ກະສິກໍາປະສົມ, ປະຫວັດສາດ, ຊົນເຜົ່າຂອງເມືອງທ່າແຕງ, ຊຶ່ງໄລຍະເວລາຂອງບົດບັນທຶກຄວາມເຂົ້າໃຈສະບັບນີ້ແມ່ນ 12 ເດືອນ, ໃນນັ້ນໜ້າວຽກຂອງບໍລິສັດທີ່ຈະຕ້ອງໄດ້ປະຕິບັດຄື: ສຶກສາສໍາຫຼວດ, ສ້າງບົດວິພາກເສດຖະກິດ-ເຕັກນິກ, ບົດປະເມີນຜົນກະທົບຕໍ່ສິ່ງແວດລ້ອມ, ບົດປະເມີນຜົນກະທົບຕໍ່ສັງຄົມ, ແຜນການຄຸ້ມຄອງ ແລະຕິດ ຕາມກວດກາດ້ານສິ່ງແວດລ້ອມ, ແຜນການຄຸ້ມຄອງ ແລະ ຕິດຕາມກວດກາດ້ານສັງຄົມໂດຍຫຼີກເວັ້ນຜົນກະທົບພ້ອມຍົກສູງຜົນປະໂຫຍດຂອງປະຊາຊົນບັນດາ ເຜົ່າທີ່ນອນໃນເຂດຂອງໂຄງການດັ່ງກ່າວ.

   ໂອກາດນີ້ທ່ານ ເຫຼັກໄຫຼ ສີວິໄລ ກໍໄດ້ໂອລົມຕໍ່ພິທີຊຶ່ງທ່ານໄດ້ຍົກໃຫ້ເຫັນເຖິງຄວາມສໍາຄັນໃນການສ້າງສາພັດທະນາແຂວງເຊກອງ, ນອກນີ້ທ່ານຍັງໄດ້ເນັ້ນໜັກໃຫ້ບໍລິສັດພາຍຫຼັງເຊັນບົດບັນທຶກຄວາມເຂົ້າໃຈແລ້ວໃຫ້ເຄື່ອນໄຫວສໍາຫຼວດເພື່ອເກັບຂໍ້ມູນລະອຽດໂດຍສົມທົບກັບບັນດາຂະແໜງການທີ່ກ່ຽວຂ້ອງ, ອົງການປົກຄອງບ້ານເພື່ອສຶກສາຮີດຄອງປະເພນີຂອງບ້ານເພື່ອກໍານົດໜ້າວຽກ ແລະບັນດາກິດຈະກໍາໃຫ້ລະອຽດ, ພ້ອມນີ້ທ່ານສະແດງຄວາມຍ້ອງຍໍຊົມເຊີຍຕໍ່ບໍລິສັດທີ່ໄດ້ປະກອບສ່ວນທຶນຮອນໃນການພັດທະນາແຂວງຂອງພວກເຮົາຊຶ່ງຈະເປັນການປະກອບສ່ວນສໍາຄັນເຂົ້າໃນການພັດທະເສດຖະກິດ-ສັງຄົມຂອງແຂວງ, ການສ້າງວຽກເຮັດງານທໍາໃຫ້ແກ່ປະຊາຊົນເຂດດັ່ງກ່າວຕື່ມອີກ,ພ້ອມທັງຮຽກອົງການປົກຄອງທ້ອງຖິ່ນໃຫ້ການຮ່ວມມືໃນການສໍາຫຼວດ ແລະຮຽກຮ້ອງໃຫ້ຄະນະກໍາການຄຸ້ມຄອງການລົງທຶນຂັ້ນແຂວງໃຫ້ຕິດຕາມ, ກວດກາ, ຊຸກຍູ້, ຄຸ້ມຄອງໃຫ້ຖືກຕ້ອງຕາມລະບຽບ, ຮ່ວມກັນພັດທະນາແຂວງເຊກອງໃຫ້ມີຄວາມຮຸ່ງເຮືອງສີວິໄລຂຶ້ນເປັນກ້າວໆ.

แชร์