ເປີດບໍລິສັດດວງວິໄລຈຳກັດຜູ້ດຽວ

   ວັນທີ 16 ພະຈິກຜ່ານມາ ທີ່ບ້ານສົມສະຫງ່າ ເມືອງໄຊເສດຖາ ນະຄອນຫຼວງວຽງຈັນ ໄດ້ມີພິທີເປີດບໍລິສັດ ດວງວິໄລ ຈຳກັດຜູ້ດຽວຢ່າງເປັນທາງການໂດຍມີທ່ານ ສຸລິຍະສັກ ດວງວິໄລ ຜູ້ບໍລິຫານບໍລິສັດ ດວງວິໄລ ຈຳກັດຜູ້ດຽວ ພ້ອມດ້ວຍແຂກຖືກເຊີນເຂົ້າຮ່ວມ.

  ທ່ານ ສຸລິຍະສັກ ດວງວິໄລ ຜູ້ບໍລິຫານບໍລິສັດດວງວິໄລ ຈຳກັດຜູ້ດຽວ ກ່າວວ່າ: ການເປີດບໍລິສັດດັ່ງກ່າວແມ່ນເພື່ອເປັນສື່ກາງໃຫ້ກັບຜູ້ຊື້ ແລະຜູ້ຂາຍ, ວາງແຜນຈັດ ການເລື່ອງການບໍລິການ, ໂຄສະນາ, ຂໍ້ມູນຂ່າວສານເລື່ອງການວາງແຜນການຕະຫຼາດທົ່ວໄປໂດຍຫຼັກໆ ຂອງບໍລິສັດແມ່ນເຮັດທຸລະກິດກ່ຽວກັບການຕະຫຼາດຄົບວົງ ຈອນ, ການຂົນສົ່ງທັງພາຍໃນ ແລະຕ່າງປະເທດ, ສູນຄວາມງາມ, ການແລກປ່ຽນຊື້-ຂາຍອະສັງຫາລິມະຊັບແນໃສ່ໃຫ້ເຫັນຄວາມສຳຄັນຂອງການຕະຫຼາດວ່າມີການຂະຫຍາຍຕົວແບບໃດໃນການຂັບເຄື່ອນເສດຖະກິດ, ຄວາມສຳຄັນໃນການຂົນສົ່ງເຄື່ອງຄົນຕໍ່ຄົນໃຫ້ມີປະສິດທິພາບ, ມີຄວາມເປັນເອກະພາບ, ມີຄວາມວ່ອງໄວທັນໃຈ, ສາມາດຕອບສະໜອງລູກຄ້າໄດ້ທຸກຮູບແບບ.

   ສຳລັບທຸລະກິດການບໍລິການຂົນສົ່ງແມ່ນດຳເນີນມາເປັນເວລາ 4 ປີແລ້ວໂດຍທຸລະກິດໄດ້ມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງຊຶ່ງສາມາດຂະຫຍາຍສາຂາຢູ່ຕ່າງແຂວງຄື: ແຂວງຫຼວງພະບາງ, ອຸດົມໄຊ, ຫຼວງນໍ້າທາ, ຈຳປາສັກ, ສະຫວັນນະເຂດ ແລະແຂວງສາລະວັນ, ສະເພາະຢູ່ນະຄອນຫຼວງວຽງຈັນແມ່ນມີຫ້ອງການໃຫຍ່ ແລະມີແຜນຈະຂະຫຍາຍສາຂາໃນ 4 ຕົວເມືອງຕື່ມອີກ.

    ທ່ານ ສຸລິຍະສັກ ດວງວິໄລ ກ່າວຕື່ມວ່າ: ໃນນາມຜູ້ບໍລິຫານບໍລິສັດຂໍຝາກເຖິງລູກຄ້າຜູ້ທີ່ມາໃຊ້ບໍລິການ ແລະ ຍັງບໍ່ທັນເຄີຍມາໃຊ້ບໍລິການໃຫ້ການສະໜັບສະໜູນ  ແລະມາໃຊ້ບໍລິການເລື້ອຍໆເນື່ອງຈາກບໍລິສັດເນັ້ນຄວາມວ່ອງໄວ, ຄວາມທັນໃຈ, ຄວາມສະດວກສະບາຍໃນການຂົນສົ່ງສິນຄ້າໃຫ້ກັບລູກຄ້າ, ສຳລັບຕ່າງແຂວງລາຄາເລີ່ມຕົ້ນແມ່ນ 18 ພັນກີບ ແລະພາຍໃນນະຄອນຫຼວງແມ່ນ 10 ພັນກີບທ່ານໃດທີ່ສົນໃຈຢາກໃຊ້ບໍລິການບໍລິສັດດວງວິໄລກໍສາມາດຕິດຕໍ່ພົວພັນໄດ້ທີ່ຫ້ອງການບໍລິສັດຕັ້ງຢູ່ບ້ານສົມສະຫງ່າ ເມືອງໄຊເສດຖາ ນະຄອນຫຼວງວຽງຈັນ.

แชร์