ເນື້ອທີ່ 30,75% ຂອງປະເທດລາວຖືກດຳເນີນໂຄງການດ້ານແຮ່ທາດ

  ສປປ ລາວ ເປັນປະເທດທີ່ມີທ່າແຮງທາງດ້ານຊັບພະຍາກອນແຮ່ທາດນັບແຕ່ປີ 1990 ເປັນຕົ້ນມາ, ລັດຖະບານລາວໄດ້ເປີດກວ້າງໂດຍອະນຸຍາດໃຫ້ນັກລົງທຶນທັງພາຍໃນ ແລະຕ່າງປະເທດສາມາດລົງທຶນເຂົ້າໃສ່ການພັດທະນາສົ່ງຜົນເຮັດໃຫ້ຂະແໜງການນີ້ໄດ້ມີບາດກ້າວຂະຫຍາຍຕົວຢ່າງວ່ອງໄວມາຮອດປະຈຸບັນໄດ້ອະນຸຍາດໃຫ້ບໍລິສັດ ລົງທຶນໃນກິດຈະການທໍລະນີສາດ ແລະບໍ່ແຮ່ແລ້ວທັງໝົດ 214 ບໍລິສັດ 319 ກິດຈະການມີເນື້ອທີ່ທັງໝົດ 7,28 ລ້ານ ເຮັກຕາ ກວມ 30,75% ຂອງເນື້ອທີ່ປະເທດລາວ.

 ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະບໍ່ແຮ່ໄດ້ເປີດຕໍ່ສື່ມວນຊົນຫວ່າງບໍ່ດົນມານີ້ວ່າ: ກ່ອນປີ1975, ວຽກງານທໍລະນີສາດ ແລະແຮ່ທາດເກືອບເວົ້າໄດ້ວ່າບໍ່ໄດ້ຮັບການພັດທະນາເລີຍ, ເຖິງວ່າມີເລັກໆນ້ອຍໆ ກໍເປັນກິດຈະກຳທີ່ອ່ອນນ້ອຍ, ບໍລິມາດບໍ່ພໍເທົ່າໃດ ແລະກໍບໍ່ໄດ້ຮັບການສົ່ງເສີມຈາກພາກລັດເລີຍເຊັ່ນ: ບໍ່ກົ່ວໂພນຕີ້ວເປັນຕົ້ນ, ນອກຈາກນັ້ນໃນຊຸມປີ 1980 ກໍມີການຊອກຄົ້ນ ແລະຂຸດຄົ້ນແຮ່ທາດບາງອັນ.

  ພາຍຫຼັງທີ່ປະເທດຊາດໄດ້ຮັບການປົດປ່ອຍ, ລັດເຮົາໄດ້ມີແຜນການສຶກສາຄົ້ນຄວ້າ: ສປປ ລາວ ເປັນປະເທດທີ່ມີທ່າແຮງທາງດ້ານຊັບພະຍາກອນແຮ່ທາດຊຶ່ງມາຮອດປະຈຸບັນສາມາດຄົ້ນພົບຈຸດປາກົດແຮ່ທາດໄດ້ຫຼາຍກວ່າ 570 ຈຸດ, ໃນຂອບເຂດເນື້ອທີ່ປະມານ: 1,62 ແສນກີໂລຕາແມັດ ເທົ່າກັບ 68,46% ຂອງເນື້ອທີ່ທົ່ວປະ ເທດ; ຊຶ່ງປະກອບດ້ວຍ: ຄໍາ, ທອງ, ເງິນ, ນິແກນ, ກົ່ວ, ຖ່ານຫີນ, ບົກຊິດ, ຫີນກາວ, ເຫຼັກ, ແກ້ວປະເສີດ, ເກືອກິນ, ເກືອໂປຕັດສ໌, ຊືນ, ສັງກະສີ, ມັງການ, ຫີນປູນ, ຫີນໂດໂລໄມ, ບາລິດ ແລະອື່ນໆ.

   ທ່ານ ຄຳມະນີ ອິນທິລາດ ກ່າວຕື່ມອີກວ່າ: ນັບແຕ່ປີ 1990 ເປັນຕົ້ນມາ, ລັດຖະບານລາວໄດ້ເປີດກວ້າງໂດຍອະນຸຍາດໃຫ້ຜູ້ລົງທຶນທັງພາຍໃນ ແລະຕ່າງປະເທດສາມາດລົງທຶນເຂົ້າໃສ່ການພັດທະນາອຸດສາຫະກຳບໍ່ແຮ່, ຊຶ່ງມາຮອດປະຈຸບັນໄດ້ອະນຸຍາດໃຫ້ບໍລິສັດລົງທຶນໃນກິດຈະການທໍລະນີສາດ ແລະບໍ່ແຮ່ແລ້ວທັງໝົດ 214 ບໍລິສັດ 319 ກິດຈະການ.

  ທັງໝົດນັ້ນຢູ່ໃນຂັ້ນຕອນການຊອກຄົ້ນຈໍານວນ 21 ບໍລິສັດ 28 ກິດຈະການ, ຢູ່ໃນຂັ້ນຕອນການສໍາຫຼວດຈໍານວນ 70 ບໍລິສັດ 83 ກິດຈະການ ແລະຢູ່ໃນຂັ້ນຕອນສຶກສາຄວາມເປັນໄປໄດ້ດ້ານເສດຖະກິດ-ເຕັກນິກຈໍານວນ 43  ບໍລິສັດ 67 ກິດຈະການ, ຢູ່ໃນຂັ້ນຕອນການຂຸດຄົ້ນ ແລະປຸງແຕ່ງແຮ່ທາດມີຈໍານວນທັງໝົດ 80 ບໍລິ ສັດ 141 ກິດຈະການຊຶ່ງໂຄງການດ້ານແຮ່ທາດທີ່ໄດ້ຮັບອະນຸຍາດທັງໝົດລວມມີເນື້ອທີ່ 7,28 ລ້ານເຮັກຕາ ກວມເອົາ 30,75% ຂອງເນື້ອທີ່ປະເທດລາວທີ່ມີທັງ ໝົດ 2,3 ແສນຕາຕະລາງກີໂລແມັດ.

   ແນວໃດກໍດີຕາມຂໍ້ມູນການລາຍງານຂອງລັດຖະບານຕໍ່ກອງປະຊຸມສະພາແຫ່ງຊາດຫວ່າງບໍ່ບົນມານີ້ຮູ້ວ່າ: ວຽກງານດ້ານບໍ່ແຮ່ສຳລັບປີນີ້ແມ່ນຜະລິດໄດ້ແລ້ວມູນຄ່າ 7,7 ພັນຕື້ກີບເທົ່າກັບ 71% ຂອງແຜນດັດແກ້ຊຶ່ງຄາດຄະເນໝົດ ປີ 2020 ນີ້ຈະສາມາດຜະລິດແຮ່ທາດເປັນໄປຕາມແຜນ ຫຼືຈະຜະລິດໄດ້ທັງໝົດ 10,8 ພັນຕື້ກີບ.

------------

ຂ່າວ: ນໍ້າໜຶ່ງ. ຮູບພາບ: #ຫນັງສືພິມເສດຖະກິດສັງຄົມ

แชร์