ຫັນກຳມະສິດໂຮງແຮມຊຳເໜືອພະລາຊາເປັນຂອງພົງສະຫວັນ

  ພິທີເຊັນສັນຍາມອບໂອນກິດຈະການໂຮງແຮມຊຳເໜືອພະລາຊາລະຫວ່າງທ່ານ ສົມຫວັງ ວົງວິໄລ ຜູ້ອຳນວຍການໃຫຍ່ບໍລິສັດ ຈິດຈະເລີນກໍ່ສ້າງ ຈຳກັດ ກັບທ່ານ ສີວິໄລ ພົມມະຈັກ ຜູ້ອຳນວຍການໃຫຍ່ກຸ່ມບໍລິສັດພົງສະຫວັນຈຳກັດໄດ້ຈັດຂຶ້ນຢູ່ຫ້ອງວ່າການແຂວງຫົວພັນໃນວັນທີ 16 ກັນຍາຜ່ານມາໂດຍເຂົ້າຮ່ວມເປັນສັກຂີພິຍານຂອງທ່ານ ເພີດ ມາປັນຍາ ຮອງເລຂາພັກແຂວງ, ມີບັນດາທ່ານໃນການນຳແຂວງ, ພາກສ່ວນທີ່ກ່ຽວຂ້ອງຂັ້ນແຂວງ, ແຂກຮັບເຊີນແລະຜູ້ຕາງໜ້າຈາກສອງບໍລິສັດເຂົ້າ ຮ່ວມ.

   ກິດຈະການໂຮງແຮມຊຳເໜືອພະລາຊາທີ່ໄດ້ມອບໂອນໃນຄັ້ງນີ້ປະກອບມີ: ສິ່ງກໍ່ສ້າງເປັນອາຄານກໍ່ສອງຊັ້ນທີ່ກໍ່ສ້າງຍັງບໍ່ທັນສຳເລັດ ແລະສົມບູນຕາມການອອກແບບທີ່ກຳນົດໄວ້, ຕົວອາຄານທັງຊັ້ນທີ 1 ແລະ ຊັ້ນທີ 2 ແມ່ນຍັງບໍ່ທັນໄດ້ກໍ່ຝາເປັນອາຄານທີ່ຕັ້ງເປັນເສົາໄວ້ ແລະ ມີການເທພື້ນຊັ້ນທີ 2 ດ້ວຍເບຕົງ, ຂະໜາດຂອງສິ່ງກໍ່ ສ້າງກວ້າງ 20 ແມັດ, ຍາວ 80 ແມັດ, ລວມມູນຄ່າການມອບໂອນກິດຈະການທັງໝົດ 1,5 ລ້ານໂດລາສະຫະລັດ.

  ກິດຈະການດັ່ງກ່າວຕັ້ງຢູ່ບ້ານພັນໄຊ ເມືອງຊຳເໜືອ ແຂວງຫົວພັນ, ເມື່ອກໍ່ສ້າງສຳເລັດຄາດວ່າຈະໃຊ້ເປັນໂຮງແຮມ 3 ດາວທະນາຄານພົງສະຫັວນສາຂາແຂວງຫົວພັນ ແລະສູນການຄ້າເພື່ອໃຫ້ບໍລິການລູກຄ້າທັງພາຍໃນ ແລະຕ່າງປະເທດທັງເປັນໂສມໜ້າໃໝ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງຫົວພັນໃນອະນາຄົດ.

----------------

ຂ່າວ: ໄອແກ້ວ, ຮູບພາບ: ໜັງສືພິມເສດຖະກິດ-ສັງຄົມ

แชร์