ກອງປະຊຸມ ສພຊ ພິຈາລະນາ ແລະຮັບຮອງຫຼາຍບັນຫາສຳຄັນຂອງຊາດ

 ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ (ສພຊ) ຊຸດທີ VIII ໄດ້ອັດລົງດ້ວຍຜົນສຳເລັດໃນວັນທີ 17 ພະຈິກ 2020 ພາຍຫຼັງດຳເນີນແຕ່ວັນ ທີ 27 ຕຸລາ ທີ່ສະພາແຫ່ງຊາດພາຍໃຕ້ການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດໂດຍເປັນກຽດເຂົ້າຮ່ວມຂອງ ທ່ານ ບຸນຍັງ ວໍລະຈິດ ປະທານປະເທດ, ທ່ານ ທອງລຸນ ສີສຸລິດ ນາຍົກລັດຖະມົນຕີພ້ອມດ້ວຍບັນດາການນໍາພັກ-ລັດ ແລະບັນດາ ສສຊ ຈາກເຂດເລືອກຕັ້ງເຂົ້າຮ່ວມ.

    ກອງປະຊຸມຄັ້ງນີ້ໄດ້ພິຈາລະນາຮັບຮອງເອົາຫຼາຍບັນຫາສຳຄັນພື້ນຖານຂອງປະເທດຊາດໂດຍໄດ້ອອກເປັນມະຕິກອງປະຊຸມຈຳນວນ 9 ສະບັບຄື: ມະຕິກອງປະຊຸມສະພາແຫ່ງຊາດວ່າດ້ວຍການຮັບຮອງເອົາການແຕ່ງຕັ້ງທ່ານ ຄໍາເຈນ ວົງໂພສີ ເປັນລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ, ການຮັບຮອງເອົາການແຕ່ງຕັ້ງທ່ານ ທອງຈັນ ມະນີໄຊ ເປັນລັດຖະມົນຕີກະຊວງພາຍໃນ, ການຮັບຮອງເອົາແຜນຜັງລວມຕົວເມືອງນະຄອນຫຼວງວຽງຈັນ ສະບັບທີ III.

 ການຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ2020, ທິດທາງແຜນການປະຈໍາປີ 2021, ການຮັບຮອງເອົາບົດລາຍງານຂອງລັດຖະບານກ່ຽວກັບການສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ 9 ເດືອນ, ຄາດຄະເນປະຕິບັດໝົດປີ 2020 ແລະແຜນການປະຈໍາປີ 2021, ຮັບຮອງເອົາບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2019 ແລະ ບົດລາຍງານຜົນການກວດກາຕາມຜົນການກວດສອບປີ 2018, ສົກປີ 2013-2014 ແລະ 2015-2016, ຮັບຮອງເອົາບົດລາຍງານຂອງອົງການໄອຍະການປະ ຊາຊົນສູງສຸດ ແລະສານປະຊາຊົນສູງສຸດກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2020 ແລະທິດທາງແຜນການປະຈໍາປີ 2021.

   ນອກນັ້ນກອງປະຊຸມຍັງໄດ້ຮັບຮອງເອົາບົດສະຫຼຸບການເຄື່ອນໄຫວວຽກງານຂອງອົງການກວດສອບແຫ່ງລັດປະຈໍາປີ 2020 ແລະທິດທາງແຜນການເຄື່ອນໄຫວປະຈໍາປີ 2021 ແລະຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ 5 ປີ (2016- 2020) ແລະປີ 2020 ຂອງສະພາແຫ່ງຊາດຊຸດທີ VIII ແລະຄາດຄະເນແຜນການປະຈໍາປີ 2021.

  ພ້ອມນັ້ນຍັງໄດ້ພິຈາລະນາຮັບຮອງເອົາກົດໝາຍ 5 ສະບັບ, ໃນນັ້ນກົດໝາຍສ້າງໃໝ່ 4 ສະບັບ ແລະ ປັບປຸງ 1 ສະບັບຄື: ກົດໝາຍວ່າດ້ວຍຊັ້ນນັກການທູດ, ກົດ ໝາຍວ່າດ້ວຍຊາວໜຸ່ມລາວ, ກົດໝາຍວ່າດ້ວຍການສຶກສາຊັ້ນສູງ, ກົດໝາຍວ່າດ້ວຍການຮ່ວມມືລະຫວ່າງປະເທດທາງອາຍາ ແລະກົດໝາຍວ່າດ້ວຍການກວດສອບແຫ່ງລັດສະບັບປັບປຸງ.

แชร์