ຮອງລັດຖະມົນຕີກະຊວງການຕ່າງປະເທດ ຢ້ຽມຢາມບໍ່ແກ້ວ ແລະຫຼວງນໍ້າທາ

  ໃນລະຫວ່າງວັນທີ 11-12 ພະຈິກ 2020, ທ່ານ ທອງສະຫວັນ ພົມວິຫານ, ຮອງເລຂາຄະນະພັກກະຊວງ, ຮອງລັດຖະມົນຕີກະຊວງການຕ່າງປະເທດໄດ້ລົງເຄື່ອນໄຫວເຮັດວຽກທີ່ແຂວງບໍ່ແກ້ວ, ຊຶ່ງໃຫ້ກຽດຕ້ອນຮັບໂດຍທ່ານ ຈອມສີ ລັດຕະນະປັນ, ຮອງເລຂາຄະນະພັກແຂວງ, ຮອງເຈົ້າແຂວງ-ແຂວງບໍ່ແກ້ວ ດ້ວຍບັນຍາ ກາດໄມຕີຈິດມິດຕະພາບອັນອົບອຸ່ນ.

 ໃນໂອກາດມາເຄື່ອນໄຫວເຮັດວຽກຄັ້ງນີ້, ທ່ານຮອງລັດຖະມົນຕີກະຊວງການຕ່າງປະເທດໄດ້ໃຫ້ກຽດເຜີຍແຜ່ສະພາບການທີ່ພົ້ນເດັ່ນໃນພາກພື້ນ, ສາກົນ ແລະວຽກ ງານຊາຍແດນ, ໂດຍໄດ້ເນັ້ນໃສ່ການຈັດຕັ້ງປະຕິບັດບັນດານິຕິກໍາກົດໝາຍ, ລະບຽບການຕ່າງໆ ແລະສັນຍາທີ່ພົວພັນກັບວຽກງານຊາຍແດນໃຫ້ຄະນະພັກ-ຄະນະນໍາ, ພະນັກງານຫຼັກແຫຼ່ງ, ທະຫານ, ຕໍາຫຼວດຕະຫຼອດຮອດພໍ່ແມ່ປະຊາຊົນບັນດາເຜົ່າໃນທົ່ວແຂວງບໍ່ແກ້ວໄດ້ຮັບຮູ້ ແລະເຂົ້າໃຈຕໍ່ບັນຫາດັ່ງກ່າວຢ່າງເລິກເຊິ່ງ, ໂດຍສະ ເພາະສະພາບການທີ່ພົ້ນເດັ່ນຂອງພາກພື້ນ ແລະສາກົນແມ່ນຍັງເປັນທ່າອ່ຽງລວມຢູ່ຂອງການເສີມສ້າງສັນຕິພາບ, ການຮ່ວມມືເພື່ອການພັດທະນາ ແລະ ການເຊື່ອມ ໂຍງສາກົນ. ສໍາລັບວຽກງານສໍາຫຼວດ ແລະປັກຫຼັກໝາຍຊາຍແດນກັບບັນດາປະເທດເພື່ອບ້ານເຫັນວ່າມີຄວາມຄືບໜ້າຫຼາຍສົມຄວນ, ໂດຍສະເພາະໄດ້ສໍາເລັດການສໍາຫຼວດ ແລະ ປັກຫຼັກໝາຍຊາຍແດນກັບ 3 ປະເທດ ຄື: ຫວຽດນາມ, ຈີນ ແລະມຽນມາ, ຊຶ່ງໄດ້ຮັບຮອງໂດຍສົນທີສັນຍາວ່າດ້ວຍການກໍານົດເສັ້ນຊາຍແດນລະຫວ່າງສອງຝ່າຍ. ສ່ວນຊາຍແດນ ສປປ ລາວ ກັບຣາຊາອານາຈັກກໍາປູເຈຍແມ່ນສໍາເລັດໄປແລ້ວຈໍານວນ 86%,ຊຶ່ງສາມາດປັກຫຼັກໝາຍຊາຍແດນຮ່ວມກັນໄດ້ທັງໝົດ126 ຫຼັກໝາຍ, ໃນນີ້ຍັງມີຈຸດຄົງຄ້າງຮ່ວມກັນຈໍານວນ 8 ບໍລິເວນ ທີ່ຈະສືບຕໍ່ຮ່ວມກັນແກ້ໄຂຕໍ່ໄປ. ສ່ວນຊາຍແດນ ສປປ ລາວ ກັບຣາຊາອານາຈັກໄທສໍາເລັດແລ້ວ ປະມານ 93% ຂອງຊາຍແດນທາງບົກ ແລະສາມາດກໍ່ສ້າງຫຼັກໝາຍຊາຍແດນໄດ້ 211 ຫຼັກໝາຍ. ໃນນີ້ຍັງມີຈຸດຄົງຄ້າງຮ່ວມກັນ 14 ບໍລິເວນ, ຊຶ່ງຈະໄດ້ສືບຕໍ່ປຶກສາຫາລືຊອກຫາວິທີແກ້ໄຂຮ່ວມກັນ.ສໍາລັບຊາຍແດນທາງນໍ້ານັ້ນແມ່ນຍັງຢູ່ໃນການດໍາເນີນການຖ່າຍທອດເສັ້ນຊາຍແດນຈາກແຜນທີ່ຝຣັ່ງ-ສະຫຍາມ ປີ 1929-1931 ລົງໃສ່ແຜນທີ່ສະບັບໃໝ່ມາດຕາສ່ວນ 1:25,000 ຕາມວິທີການທາງດ້ານເຕັກນິກຂອງແຕ່ລະຝ່າຍ.

 ພາຍຫຼັງສໍາເລັດການເຜີຍແຜ່ດັ່ງກ່າວ,ທ່ານຮອງລັດຖະມົນຕີກະຊວງການຕ່າງປະເທດຍັງໄດ້ເຂົ້າຢ້ຽມຂໍ່ານັບພົບປະເຮັດວຽກກັບທ່ານເຈົ້າແຂວງ-ແຂວງບໍ່ແກ້ວ. ຈາກນັ້ນ, ໃນວັນທີ 13 ພະຈິກ 2020, ກໍໄດ້ສືບຕໍ່ເຄື່ອນໄຫວພົບປະ ແລະເຮັດວຽກຮ່ວມກັບການນໍາຂອງແຂວງຫຼວງນໍ້າທາ, ຊຶ່ງໃຫ້ກຽດຕ້ອນຮັບນໍາໂດຍທ່ານ ອ່ອນຈັນ ຄໍາພາວົງ, ກໍາມະການພັກແຂວງເພື່ອຕິດຕາມກວດກາຄວາມຄືບໜ້າຂອງບັນດາໜ້າວຽກທີ່ໄດ້ມອບໝາຍໃຫ້ບັນດາຂະແໜງການທີ່ກ່ຽວຂ້ອງໃນການກະກຽມໃຫ້ແກ່ການເປີດນໍາໃຊ້ດ່ານຊ່ອງທາງລົດບັນທຸກສະເພາະຂົນສົ່ງສິນຄ້າຢູ່ດ່ານສາກົນບໍ່ເຕັນ, ແຂວງຫຼວງນໍ້າທາທີ່ຫ້ອງວ່າການປົກຄອງແຂວງຫຼວງນໍ້າທາອີກດ້ວຍ.  

แชร์