ເປີດແລ້ວໂຮງງານນໍ້າດື່ມ-ນໍ້າກ້ອນພັດທະນາທີ່ຫຼວງພະບາງ

   ໂຮງງານນໍ້າດື່ມສະອາດທີ່ເນັ້ນຄຸນນະພາບພັດທະນາໄດ້ເປີດຮັບໃຊ້ສັງຄົມແລ້ວຊຶ່ງໄດ້ຈັດພິທີເປີດຢ່າງເປັນທາງການໃນວັນທີ 14 ພະຈິກຜ່ານມາທີ່ໂຮງງານບ້ານຂົວທີ່ໜຶ່ງນະຄອນຫຼວງພະບາງໂດຍເຂົ້າຮ່ວມຂອງ ທ່ານ ຈັນສຸກ ພັນໂດລັກ ເຈົ້ານະຄອນຫຼວງພະບາງ, ມີຕາງໜ້າກົງສູນໃຫຍ່ຫວຽດນາມປະຈໍາພາກເໜືອຂອງລາວ, ຕາງໜ້າພະແນກການກ່ຽວຂ້ອງແຂວງ, ນະຄອນພ້ອມດ້ວຍຫົວໜ່ວຍທຸລະກິດແລະພະນັກງານຂອງໂຮງງານເຂົ້າຮ່ວມ.

   ທ່ານພັດທະນາເຈົ້າຂອງໂຮງງານນໍ້າດື່ມ ແລະນໍ້າກ້ອນພັດທະນາໄດ້ລາຍງານໃຫ້ຮູ້ວ່າ: ສໍາລັບໂຮງງານນໍ້າດື່ມແມ່ນໄດ້ເລີ່ມສ້າງຕັ້ງມາແຕ່ເດືອນສິງຫາ 2020 ລວມມູນຄ່າກໍ່ສ້າງທັງໝົດ 1 ແສນໂດລາສະຫະລັດ, ເປັນໂຮງງານຜະລິດນໍ້າດື່ມນໍ້າກ້ອນສະອາດໄດ້ມາດຕະຖານທຽບເທົ່າສາກົນຮັບໃຊ້ສັງຄົມໂດຍໄດ້ນໍາໃຊ້ລະບົບເຄື່ອງທີ່ທັນສະໄໝເຂົ້າໃນການກັ່ນຕອງດ້ວຍລະບົບຣີເວີສໂອສໂມຊິສ໌(ອາໂອ) 2 ຊັ້ນ ແລະຂ້າເຊື້ອດ້ວຍແສງອູນຕຣາໄວໂອເລັດທ໌ແລະໂອໂຊນ 3 ເທົ່າ.

   ປະຈຸບັນທາງໂຮງງານໄດ້ຜະລິດນໍ້າດື່ມ 2 ຂະໜາດຄື: ຕຸກໃຫຍ່ບັນຈຸໄດ້ 20 ລິດ, ຂາຍລາຄາ 5.000 ກີບ, ຂະໜາດກາງບັນຈຸ 8 ລິດ ຂາຍລາຄາ 3.000 ກີບ ແລະໃນອານາຄົດໃກ້ໆນີ້ທາງໂຮງງານຍັງມີແຜນຈະຜະລິດລິດນໍ້າດື່ມຕຸກນ້ອຍເຮັດເປັນແພັກເພື່ອໄວ້ຮັບໃຊ້ບໍລິການງານຕ່າງໆຂອງສັງຄົມອີກຕື່ມ, ພ້ອມນີ້ທ່ານເຈົ້າຂອງໂຮງງານຍັງໄດ້ເຊື່ອເຊີນໃຫ້ພໍ່ແມ່ປະຊາຊົນລອງມາໃຊ້ບໍລິການນໍາທາງໂຮງງານນໍ້າດື່ມ ແລະນ້ຳກ້ອນພັດທະນາທີ່ເຮັດດ້ວຍໃຈ ແລະໃສ່ໃຈຄຸນນະພາບອອກຮັບໃຊ້ສັງຄົມໃຫ້ໄດ້ດື່ມນໍ້າສສະອາດ ແລະດີຕໍ່ສຸຂະພາບ.

-------------

ຂ່າວ: ສີສຸວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์