ສະພາບໍລິຫານ ທຫລ ຮັບຮອງ 4 ວຽກສຳຄັນ

   ກອງປະຊຸມສະພາບໍລິຫານທະນາຄານແຫ່ງ ສປປ ລາວ (ທຫລ) ຄັ້ງທີ I ປະຈໍາປີ 2020 ໄດ້ສຳເລັດລົງດ້ວຍໝາກຜົນອັນຈົບງາມໃນວັນທີ 16 ພະຈິກ 2020 ທີ່ຫ້ອງປະຊຸມ ທຫລ, ນະຄອນຫຼວງວຽງຈັນ ໂດຍດຳເນີນເປັນປະທານຂອງທ່ານ ສອນໄຊສິດ ພະໄຊ ຜູ້ວ່າການ ທຫລ, ປະທານສະພາບໍລິຫານ ທຫລ;

 ພ້ອມນີ້ກໍ່ມີການເຂົ້າຮ່ວມຂອງຮອງປະທານ-ຄະນະກໍາມະການສະພາບໍລິຫານ ແລະບັນດາກົມຫ້ອງການທີ່ກ່ຽວຂ້ອງຂອງ ທຫລ ຊຶ່ງເປັນກອງປະຊຸມຄັ້ງປະຖົມມະລຶກຂອງສະພາບໍລິຫານຊຸດໃໝ່ພາຍຫຼັງທີ່ປະກາດການຈັດຕັ້ງສະພາບໍລິຫານ ທຫລ ໃນກາງເດືອນມິຖຸນາ 2020 ກໍຄືເປັນການຈັດຕັ້ງຜັນຂະຫຍາຍຜົນສໍາເລັດຂອງກອງປະຊຸມໃຫຍ່ຜູ້ແທນອົງຄະນະພັກ ທຫລ ຄັ້ງທີ IV.

  ກອງປະຊຸມໄດ້ຮັບຟັງການລາຍງານການເຄື່ອນໄຫວວຽກງານຂອງ ທຫລ ໄລຍະຜ່ານມາ ແລະທິດທາງແຜນການທ້າຍປີ 2020; ສະຫຼຸບການປະຕິບັດແຜນເງິນຕາໃນໄລຍະ 10 ເດືອນປີ 2020, ທິດທາງແຜນການເຄື່ອນໄຫວຮອດທ້າຍປີ 2020 ແລະແຜນການປີ 2021; ບົດລາຍງານຜົນການຈັດຕັ້ງປະຕິບັດແຜນງົບປະມານ 9 ເດືອນ, ຄາດຄະເນປະຕິບັດໝົດປີ ແລະການດັດແກ້ແຜນງົບປະມານປີ 2020 ຂອງທຫລ ແລະວຽກງານອື່ນໆທີ່ຕິດພັນ, ພ້ອມກັນນັ້ນ, ບັນດາກໍາມະການສະພາບໍລິຫານ ທຫລ ຍັງໄດ້ມີການຄົ້ນຄວ້າ ແລະປະກອບຄໍາເຫັນລົງເລິກວຽກງານຄຸ້ມຄອງມະຫາພາກເງິນຕາໂດຍສະເພາະແມ່ນການກຳນົດຄາດໝາຍແຜນເງິນຕາ,ການຄຸ້ມຄອງປະລິມານເງິນ, ການຄຸ້ມຄອງຮ້ານແລກປ່ຽນເງິນຕາ; ການປັບປຸງທະນາຄານທຸລະກິດລັດເຫຼົ່ານີ້ເປັນຕົ້ນທັງນີ້ກໍເພື່ອເຮັດໃຫ້ແຜນດຳເນີນງານໃນຕໍ່ໜ້າບັນລຸ ຜົນດີກວ່າເກົ່າ.

  ທ່ານຜູ້ວ່າການ ທຫລ, ປະທານສະພາບໍລິຫານ ທຫລ ໄດ້ເນັ້ນໜັກວ່າ: ໃນປີ 2020 ຕ້ອງສຸມໃສ່ຈັດຕັ້ງປະຕິບັດມາດຕະການຄວບຄຸມ ແລະນະໂຍບາຍຕ່າງໆເພື່ອແກ້ໄຂຜົນກະທົບຈາກການລະບາດຂອງພະຍາດ COVID-19, ພ້ອມນີ້, ກໍ່ສືບຕໍ່ເອົາໃຈໃສ່ຮັກສາສະຖຽນລະພາບເງິນຕາແຫ່ງຊາດຕາມຄາດໝາຍຕົວເລກມະຫາພາກເງິນຕາທີ່ທາງສະພາແຫ່ງຊາດໄດ້ຮັບຮອງເປັນຕົ້ນການຄຸ້ມຄອງອັດຕາແລກປ່ຽນຕາມຂອບທີ່ກຳນົດໄວ້;ຄວບຄຸມປະລິມານເງິນ M2; ລະດັບຄັງສຳຮອງເງິນຕາຕ່າງປະເທດ ແລະຄຸ້ມຄອງໜີ້ສິນຂອງທະນາຄານທຸລະກິດ ແລະຄຸ້ມຄອງສະຖາບັນການເງິນ, ປັບປຸງລະບົບທະນາຄານໃຫ້ມີຄວາມໜັກແໜ້ນເຂັ້ມແຂງ, ຊຸກຍູ້ທະນາ ຄານທຸລະກິດສະໜອງທຶນເພື່ອສົ່ງເສີມ SME ແລະ ທຫລ ສືບຕໍ່ເອົາໃຈໃສ່ຈັດຕັ້ງປະຕິບັດແຜນງົບປະມານຕາມແຜນທີ່ສະພາບໍລິຫານ ທຫລ ຮັບຮອງ ແລະພ້ອມທັງຈັດຕັ້ງປະຕິບັດການເຄື່ອນໄຫວຂອງວຽກງານ ທຫລ ໃຫ້ໄດ້ຮັບຜົນເປັນຢ່າງດີ.

--------------

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์