ກຳປູເຈຍ ມອບເຄື່ອງຕ້ານໂຄວິດ-19 ແກ່ລາວ

  ລັດຖະບານ ແລະປະຊາຊົນກໍາປູເຈຍໄດ້ມອບອຸປະກອນການແພດໃຫ້ແກ່ລັດຖະບານ ແລະປະຊາຊົນລາວເພື່ອນຳໃຊ້ເຂົ້າໃນການຕ້ານ ແລະສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ໂດຍມີພິທີມອບ-ຮັບຂຶ້ນໃນວັນທີ 16 ພະຈິກ 2020 ທີ່ສະໜາມບິນສາກົນວັດໄຕນະຄອນຫຼວງວຽງຈັນຕາງໜ້າໃຫ້ແກ່ລັດຖະບານກໍາ ປູເຈຍກ່າວມອບໂດຍແມ່ນສົມເດັດປີໄຈເສນາເຕຍບັນ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແລະ ເປັນກຽດຕາງໜ້າໃຫ້ແກ່ລັດຖະບານລາວຮັບໂດຍທ່ານ ທອງລຸນ ສີສຸລິດ, ນາຍົກລັດຖະມົນຕີໂດຍມີຄະນະສະເພາະກິດເພື່ອປ້ອງກັນຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ແລະການນໍາຂັ້ນສູງຈາກກະຊວງກ່ຽວຂ້ອງຕ່າງໆເຂົ້າຮ່ວມ.

 ສຳລັບເຄື່ອງທີ່ໄດ້ຮັບການຊ່ວຍເຫຼືອຈາກລັດຖະບານກຳປູເຈຍໃນຄັ້ງນີ້ປະກອບມີຜ້າອັດປາກຈຳນວນ 2,1 ລ້ານແຜ່ນ, ເຄື່ອງຊ່ວຍຫາຍໃຈ, ເຄື່ອງວັດແທກອຸນຫະພູມ ແລະເຄື່ອງມືການແພດທີ່ຈຳເປັນອີກຈຳນວນໜຶ່ງຊຶ່ງໄດ້ຮັບການຕີລາຄາສູງ ແລະການຂອບໃຈຢ່າງຈິງໃຈຈາກລັດຖະບານ ແລະ ປະຊາຊົນລາວເພາະເປັນການສະແດງເຖິງຄວາມເປັນຫ່ວງເປັນໄຍ ແລະແບ່ງຄວາມຊ່ວຍເຫຼືອເຊິ່ງກັນ ແລະກັນໃນຍາມທີ່ສອງປະເທດພວມປະເຊີນໜ້າກັັບການລະບາດຂອງພະຍາດໂຄວິດ-19, ທັງເປັນການສ່ອງແສງໃຫ້ເຫັນເຖິງສາຍພົວພັນມິດຕະພາບ, ຄວາມສາມັກຄີທີ່ເປັນມູນເຊື້ອອັນດີງາມມາແຕ່ບູຮານນະການ ແລະ ການຮ່ວມມືຖານບ້ານໃກ້ເຮືອນຄຽງທີ່ດີກໍຄື ການເປັນຄູ່ຮ່ວມມືຍຸດທະສາດຮອບດ້ານ ແລະໝັ້ນຄົງຍາວນານລະຫວ່າງສອງປະເທດລາວ ແລະກຳປູເຈຍທີ່ນັບມື້ນັບໄດ້ຮັບການສົ່ງເສີມ ແລະ ຮັດແໜ້ນໃຫ້ເຂົ້າສູ່ລວງເລິກ ແລະແຕກດອກອອກຜົນ.

  ພ້ອມນີ້ລັດຖະບານແຫ່ງ ສປປ ລາວ ຈະນຳເອົາເຄື່ອງຊ່ວຍເຫຼືອດັ່ງກ່າວເພື່ອນຳໃຊ້ໃຫ້ເກີດປະໂຫຍດສູງສຸດໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ພາຍໃນປະເທດໃຫ້ເກີດປະໂຫຍດສູງສຸດ.

แชร์