ໂຄງການກໍ່ສ້າງທາງລົດໄຟລາວ-ຈີນ ສຳເລັດເກືອບ 90% ທ້າຍປີໜ້າເປີດໃຊ້

   ວັນທີ14 ພະຈິກຜ່ານມາສະມາຊິກສະພາແຫ່ງຊາດ (ສສຊ) ທີ່ມາເຂົ້າຮ່ວມກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VIII ໄດ້ ຢ້ຽມຢາມບໍລິສັດວິສະວະກຳທາງລົດ ໄຟເລກ2 ສປ ຈີນ ທີ່ບ້ານສົງເປືອຍ ເມືອງນາຊາຍທອງ ນະຄອນຫຼວງວຽງຈັນ ເພື່ອຕິດຕາມກວດກາຄວາມຄືບໜ້າການກໍ່ສ້າງເສັ້ນທາງລົດໄຟລາວ-ຈີນ ຊຶ່ງນຳໂດຍທ່ານ ສາຍທອງ ແກ້ວດວງດີ ປະທານກຳມາທິການກົດໝາຍສະພາແຫ່ງຊາດ, ທັງເປັນສະມາຊິກສະພາແຫ່ງຊາດເຂດເລືອກຕັ້ງນະຄອນ ຫຼວງວຽງຈັນພ້ອມຄະນະ ສສຊ ແຕ່ລະເຂດເລືອກຕັ້ງໂດຍໄດ້ຮັບການຕ້ອນຮັບຈາກທ່ານທູດເສດຖະກິດ ສປ ຈີນ ປະຈໍາລາວ, ຜູ້ອຳນວຍການໃຫຍ່ບໍລິສັດວິສະວະກຳ ທາງລົດໄຟລາວ-ຈີນ ເລກ 2 ພ້ອມດ້ວຍພາກສ່ວນກ່ຽວຂ້ອງ.

   ການລົງຢ້ຽມຢາມໂຄງການດັ່ງກ່າວສະມາຊິກສະພາແຫ່ງຊາດໄດ້ຮັບຟັງການລາຍງານຄວາມຄືບໜ້າການກໍ່ສ້າງເສັ້ນທາງລົດໄຟລາວ-ຈີນ ມາຮອດປະຈຸບັນໜ້າວຽກໂດຍລວມມີຄວາມຄືບໜ້າ 88% ໃນນີ້ ແບ່ງເປັນໜ້າວຽກຍ່ອຍເປັນຕົ້ນແມ່ນວຽກການວາງຂາງຂົວຄືບໜ້າ 95,9%, ການວາງລາງລົດໄຟ 55,9%, ວຽກລະບົບ 18,7% ແລະການກໍ່ສ້າງສະຖານີມີຄວາມຄືບໜ້າ 21,7% ແລະວຽກງານອື່ນໆ.

  ທາງລົດໄຟລາວ-ຈີນ ເລີ່ມລົງມືກໍ່ສ້າງມາແຕ່ວັນທີ 25 ທັນວາ 2016 ມີ ໄລຍະການກໍ່ສ້າງ 5ປີ ແລະຈະເປີດນຳໃຊ້ທ່າງເປັນທາງການໃນທ້າຍປີ 2021 ນຳໃຊ້ງົບປະມານກໍ່ສ້າງ 37,4 ຕື້ຢວນ, ມີຄວາມຍາວ 422,4 ກິໂລແມັດ,ຄວາມໄວ 160 ກິໂລແມັດຕໍ່ຊົ່ວໂມງ,ການກໍ່ສ້າງແຕ່ບໍ່ເຕັນຫານະຄອນຫຼວງວຽງຈັນມີອຸມົງທັງໝົດ 75 ແຫ່ງເຈາະສຳເລັດແລ້ວ, ມີຂົວ 164 ແຫ່ງໄດ້ສຳເລັດໂຄງສ້າງຕົ້ນຕໍແລ້ວ, ມີທັງຫມົດ 32 ສະຖານີຊຶ່ງເປັນໂຄງການບູລິມາສິດທຳອິດພາຍໃຕ້ຫົວຂໍ້ລິເລີ່ມຫນື່ງແລວຫນື່ງເສັ້ນທາງກາຍເປັນສັນຍາລັກແຫ່ງການຮ່ວມມືຮອບດ້ານລະຫວ່າງສອງປະເທດລາວ-ຈີນ.

  ໂອກາດນີ້ ທ່ານ ສາຍທອງ ແກ້ວດວງດີ ຕາງໜ້າໃຫ້ຄະນະໄດ້ສະແດງຄວາມຊົມເຊີຍຕໍ່ການປະຕິບັດໜ້າທີ່ຂອງພະນັກງານທຸກຄົນລວມເຖິງພາກສ່ວນກ່ຽວຂ້ອງຕ່າງໆທີ່ເອົາໃຈໃສ່ໃນການປະຕິບັດໜ້າທີ່ຢ່າງແຂງແຮງໃນການກໍ່ສ້າງທາງລົດໄຟລາວ-ຈີນ ເຮັດໃຫ້ໂຄງການນີ້ມີຄວາມຄືບໜ້າຢ່າງຕໍ່ເນື່ອງພ້ອມທັງໃຫ້ຄໍາໝັ້ນສັນຍາວ່າຈະປຸກລະດົມໃຫ້ປະຊາຊົນຊາວນະຄອນຫຼວງວຽງຈັນ ແລະ ບັນດາແຂວງອື່ນໆໃຫ້ການຮ່ວມມືກັບໂຄງການນີ້ຢ່າງຈິງຈັງໂດຍສະເພາະການປົກປັກຮັກສາເສັ້ນທາງລົດໄຟ, ປ້ອງ ກັນບໍ່ໃຫ້ສັດລ້ຽງຜ່ານເຂົ້າໄປໃນບໍລິເວນລົດໄຟແລ່ນຜ່ານເພື່ອຫຼີກລ່ຽງຈາກອຸບັດເຫດທີ່ອາດຈະເກີດຂຶ້ນ.

แชร์