ຖະແຫຼງຜົນກອງປະຊຸມສຸດຍອດອາຊຽນ ຄັ້ງທີ 37 ແລະກອງປະຊຸມສຸດຍອດອື່ນທີ່ກ່ຽວຂ້ອງ

  ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຖະແຫຼງຂ່າວຕໍ່ສື່ມວນຊົນໃນວັນທີ 15 ພະຈິກ 2020 ທີ່ຫໍປະຊຸມແຫ່ງ ຊາດ, ກ່ຽວກັບຜົນສໍາເລັດການເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 37 ແລະກອງປະຊຸມສຸດຍອດອື່ນທີ່ກ່ຽວຂ້ອງ (ແບບທາງໄກ) ໃນລະຫວ່າງວັນທີ 12 – 15 ພະຈິກ 2020 ຊຶ່ງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມຄະນະໄດ້ເຂົ້າຮ່ວມດ້ວຍຜົນສຳເລັດສູງ ແລະມີບົດບາດສໍາຄັນຍິ່ງ, ວ່າ:

​  ກອງປະຊຸມສຸດຍອດອາຊຽນຄັ້ງທີ 37 ແລະກອງປະຊຸມສຸດຍອດອື່ນທີ່ກ່ຽວຂ້ອງພາຍໃຕ້ການເປັນປະທານຂອງ ສສ.ຫວຽດນາມ, ໂດຍ ມີ 16 ກອງປະຊຸມລະດັບສຸດຍອດ ຄືກອງປະຊຸມລະດັບສຸດຍອດໃນຂອບອາຊຽນ 14 ກອງປະຊຸມ, ໃນຂອບແມ່ນໍ້າຂອງມີ 2 ກອງປະຊຸມກໍຄືກອງປະຊຸມສຸດຍອດແມ່ນໍ້າຂອງ-ຍີ່ປຸ່ນ ແລະກອງປະຊຸມສຸດຍອດແມ່ນນໍ້າຂອງ-ສ.ເກົາຫຼີ. ນອກນີ້, ຍັງມີ 5 ກິດຈະກຳປິ່ນອ້ອມ.

​  ກອງປະຊຸມຄັ້ງນີ້ໄດ້ຮັບຜົນສຳເລັດຢ່າງຈົບງາມ, ຜູ້ນຳຂອງບັນດາປະເທດອາຊຽນກໍຄືຄູ່ຮ່ວມເຈລະຈາໄດ້ຮັບຮອງ ແລະ ຮັບຊາບເອກະສານຜົນກອງປະຊຸມຫຼາຍກວ່າ 80 ສະບັບ ຊຶ່ງເປັນຈໍານວນຫຼາຍທີ່ສຸດຕັ້ງແຕ່ມີການຈັດກອງປະຊຸມສຸດຍອດອາຊຽນທີ່ຜ່ານມາ. ກອງປະຊຸມຍັງໄດ້ຍົກເອົາຫຼາຍບັນຫາຂຶ້ນມາປຶກສາຫາລືໂດຍສະເພາະແມ່ນການຈັດຕັ້ງປະຕິບັດແຜນແມ່ບົດການສ້າງປະຊາຄົມອາຊຽນໃນໄລຍະຜ່ານມາກໍຄືໄລຍະ 1 ປີ ພາຍໃຕ້ການເປັນປະທານຂອງ ສສ.ຫວຽດນາມ. ນອກນັ້ນ, ຜູ້ນໍາຂອງບັນດາປະເທດອາຊຽນ ແລະ ປະເທດຄູ່ເຈລະຈາກໍໄດ້ມີການປຶກສາຫາລືການຈັດຕັ້ງປະຕິບັດການຮ່ວມມືລະຫວ່າງອາຊຽນກັບປະເທດຄູ່ເຈລະຈາຕ່າງໆຊຶ່ງຜູ້ນໍາອາຊຽນກໍໄດ້ຕີລາຄາສູງຕໍ່ຜົນສໍາເລັດຂອງການຮ່ວມມືໃນຕະຫຼອດໄລຍະທີ່ຜ່ານມາ.
​   ບັນຫາທີ່ພົ້ນເດັ່ນໃນການກອງປະຊຸມສຸດຍອດອາຊຽນ ຄັ້ງທີ 37 ແລະກອງປະຊຸມສຸດຍອດອື່ນທີ່ກ່ຽວຂ້ອງຊຶ່ງຕະຫຼອດໄລຍະ 1 ປີ ຂອງການເປັນປະທານອາຊຽນ ຂອງ ສສ.ຫວຽດນາມ, ເຖິງແມ່ນມີຂໍ້ຫຍຸ້ງຍາກ ແລະ ສິ່ງທ້າທາຍຈາກການແຜ່ລະບາດຂອງພະຍາດລະບາດຂອງພະຍາດໂຄວິດ-19 ເຮັດໃຫ້ອາຊຽນຫັນປ່ຽນຈາກການຈັດກອງປະຊຸມແບບເຊິ່ງໜ້າ ມາເປັນແບບທາງໄກ, ແຕ່ອາຊຽນກໍໄດ້ສືບຕໍ່ຮັດແໜ້ນຄວາມເປັນແກນກາງ, ຄວາມສາມັກຄີເປັນປຶກແຜ່ນ, ໂດຍສະເພາະໃນການສະກັດກັ້ນ, ຄວບຄຸມ, ແກ້ໄຂ ແລະຟື້ນຟູຜົນກະທົບຈາກພະຍາດໂຄວິດ-19 ກໍຄືຜົນກະທົບຈາກໄພພິບັດທາງທໍາມະຊາດຄື:

 1). ການຮັບມືກັບພະຍາດໂຄວິດ-19 ແລະການຟື້ນຟູເສດຖະກິດຫຼັງໂຄວິດ-19: ອາຊຽນ ໄດ້ສ້າງຕັ້ງກອງທຶນອາຊຽນເພື່ອຮັບມືກັບການແຜ່ລະບາດຂອງພະຍາດໂຄວິດ-19, ເຊິ່ງ (1 > ບັນດາປະເທດຄູ່ເຈລະຈາໄດ້ປະກອບສ່ວນທຶນຮອນໃສ່ກອງທຶນດັ່ງກ່າວເຊັ່ນ: ສປ ຈີນ, ຍີ່ປຸ່ນ, ສ.ເກົາຫຼີ, ແລະອິນເດຍໄດ້ປະກອບສ່ວນເງິນປະເທດລະ 1 ລ້ານໂດລາສະຫະລັດ; ອົດສະຕຣາລີປະກອບສ່ວນ 1 ລ້ານໂດລາອົດສະຕຣາລີ; ນິວຊີແລນປະກອບສ່ວນ 1 ລ້ານໂດລານິວຊີແລນ; ຂອບການຮ່ວມມືອາຊຽນບວກສາມປະກອບສ່ວນ 10% ຈາກຈໍານວນທຶນຂອງກອງທຶນຮ່ວມມືອາຊຽນບວກສາມ. ສ່ວນພາຍໃນອາຊຽນ, ຫວຽດນາມ, ສິງກະໂປ ແລະ ໄທປະກອບສ່ວນປະເທດລະ 100,000 ໂດລາສະຫະລັດ. ນອກນັ້ນ, ບັນດາປະເທດຄູ່ເຈລະຈາເປັນຕົ້ນ: ສປ ຈີນ ໄດ້ປະກອບສ່ວນ 5 ລ້ານໂດລາສະຫະລັດເພື່ອສະຫນັບສະຫນູນໂຄງການຮ່ວມມືດ້ານສາທະນະສຸກອາຊຽນ-ຈີນ: ອົດສະຕາລີ ປະກອບສ່ວນຈໍານວນ 21 ລ້ານໂດລາອົດສະຕຣາລີ ເຂົ້າໃນສູນຂະແຫນງສາທາລະນະສຸກ ແລະ ພະຍາດລະບາດອາຊຽນ; 500 ລ້ານໂດລາອົດສະຕຣາລີສໍາລັບການເຂົ້າເຖິງວັກແຊັງໂຄວິດ-19 ຫຼື ໂຄງການ ໂຄແວັກ ຂອງບັນດາປະເທດອາຊີ-ປາຊີຟິກ ລວມທັງອາຊຽນ. ອາຊຽນໄດ້ປະກາດສ້າງຕັ້ງຄັງແຮຢາປົວພະຍາດ ແລະ ອຸປະກອນການແພດສໍາລັບພາວະສຸກເສີນສາທາລະນະສຸກພາກພື້ນອາຊຽນ, ຊຶ່ງຈະເຮັດໃຫ້ອາຊຽນກໍຄື ສປປ ລາວ ມີຄວາມພ້ອມໃນການຮັບມືກັບສິ່ງທ້າທ້າຍທີ່ເກີດຈາກພະຍາດລະບາດໃນອະນາຄົດ, ໃນນີ້, ຫວຽດນາມໄດ້ປະກາດຈະປະກອບສ່ວນ 5 ລ້ານໂດລາສະຫະລັດ. ສ້າງຕັ້ງສູນສາທາລະນະສຸກສຸກເສີນ ແລະພະຍາດລະບາດພາກພື້ນອາຊຽນ, ໂດຍແມ່ນຢີ່ປຸ່ນປະກອບສ່ວນທຶນມູນຄ່າ 50 ລ້ານໂດລາສະຫະລັດ, ເຊິ່ງກອງປະຊຸມສຸດຍອດຄັ້ງນີ້ໄດ້ປະກາດການສ້າງຕັ້ງຢ່າງເປັນທາງການ ແລະຄືໄດ້ກ່າວເຖິງຂ້າງເທິງ, ອົດສະຕຣາລີໄດ້ປະກອບສ່ວນທຶນຈໍາ ນວນ 21 ລ້ານໂດລາອົດສະຕຣາລີ ເຂົ້າໃນວຽກຄຸ້ມຄອງ-ບໍລິຫານ ສູນດັ່ງກ່າວ.

2) ອາຊຽນຍັງໄດ້ປະກາດເປັນທາງການເລີ່ມການທົບທວນກາງສະໄຫມແຜນແມ່ບົດວິໄສທັດປະຊາຄົມອາຊຽນ 2025; ປະກາດເປັນທາງການ ແຜນຟື້ນຟູຮອບຕ້ານອາຊຽນ ແລະແຜນຈັດຕັ້ງປະຕິບັດ ແລະການສ້າງຂອງທາງໄປມາຫາສູ່ກັນ (travel corridor) ແລະມອບຫມາຍໃຫ້ຂະແຫນງການກ່ຽວຂ້ອງນໍາໄປຜັນຂະຫຍາຍໃຫ້ເປັນຮູບປະທໍາ.

3) ດ້ານເສດຖະກິດ: ໄດ້ເນັ້ນໃສ່ການຮ່ວມມືເພື່ອຫັນໄປເປັນດີຈີຕອນ ແລະເສດຖະກິດດິຈິຕອນເທື່ອລະກ້າວໂດຍສະເພາະສຸມໃສ່ການຍົກລະດັບ MSMEsໃຫ້ສາມາດດໍາເນີນທຸລະກິດທາງອອນລາຍໄດ້ ແລະການພັດທະນາຕົວເມືອງອັດສະລິຍະອາຊຽນ; ໄດ້ລົງນາມໃນສັນຍາການຮ່ວມມືເສດຖະກິດພາກພື້ນແບບຮອບດ້ານ ຫຼືອາເຊັບ (ມີ 15 ປະເທດຄື: 10 ປະເທດອາຊຽນ ແລະ 5 ປະເທດຄູ່ເຈລະຈາ ມີ: ອົດສະຕຣາລີ, ສປ.ຈີນ, ຍີ່ປຸ່ນ, ສ.ເກົາຫຼີ ແລະ ນິວຊີແລນ); ເປັນຂອບສັນຍາເສດຖະກິດທີ່ໃຫຍ່ທີ່ສຸດໃນໂລກ ກວມເອົາເກືອບ 1/3 ຂອງ GDP ໂລກ, ເຊິ່ງມີ GDP ທັງຫມົດ 24.669 ຕື້ໂດລາສະຫະລັດ ຫຼື ປະມານ 30% ຂອງຂະຫນາດເສດຖະກິດໂລກ, ມີມູນຄ່າການຄ້າກວມ 27,1 % ຂອງການຄ້າໂລກ, ມູນຄ່າການລົງທຶນ 29,3% ຂອງການລົງທຶນ | ໂລກ ແລະມີປະຊາກອນລວມກັນ 2,249 ລ້ານຄົນ.

4) ການຮ່ວມມືດ້ານວັດທະນະທໍາ-ສັງຄົມ, ໂດຍສະເພາະການສົ່ງເສີມການໄປມາລະຫວ່າງ ປະຊາຊົນ ກັບ ປະຊາຊົນດ້ວຍການສະໜອງທຶນການສຶກສາໄລຍະສັ້ນ-ໄລ ຍະຍາວ, ພາສາອັງກິດ, ການຝຶກອົບຮົມວິຊາຊີບ (TVET) ແລະອື່ນໆ.

5) ສໍາລັບບັນຫາພາກພື້ນ ແລະສາກົນກໍມີການປຶກສາຫາລືບາງບັນຫາເປັນຕົ້ນບັນຫາທະເລຈີນໃຕ້, ແຫຼມເກົາຫຼີ,ຂໍ້ຂັດແຍ່ງທາງດ້ານການຄ້າ,ການຮ່ວມມືໃນຂອບອິນໂດ-ປາຊີຟິກ ແລະອື່ນໆ.

6) ໃນໂອກາດກອງປະຊຸມສຸດຍອດອາຊຽນຄັ້ງທີ 37 ກໍໄດ້ມີກອງປະຊຸມສຸດຍອດຜູ້ນໍາແມ່ຍິງອາຊຽນຈັດຂຶ້ນເປັນຄັ້ງທໍາອິດໂດຍມີບັນດາຜູ້ນໍາອາຊຽນ, ຕາງຫນ້າຜູ້ນໍາຍິງອາຊຽນ ແລະອື່ນໆເຂົ້າຮ່ວມ. ສໍາລັບຕາງຫນ້າຜູ້ນໍາແມ່ຍິງລາວແມ່ນພະນະທ່ານນາງ ປານີ ຢາທໍ່ຕູ້, ປະທານສະພາແຫ່ງຊາດ.

  ໃນໂອກາດກອງປະຊຸມສຸດຍອດຄັ້ງນີ້ກໍ່ໄດ້ຮັບຮອງ ແລະຮັບຊາບເອກະສານຜົນກອງປະຊຸມກວ່າ 80 ສະບັບໃນນັ້ນ, ມີເອກະສານທີ່ສໍາຄັນຄື: (1). ຖະແຫຼງການຮ່າໂນ້ຍ ວ່າດ້ວຍປະຊາຄົມອາຊຽນຫຼັງປີ 2025; (2). ຖະແຫຼງການຮ່າໂນ້ຍວ່າດ້ວຍການຮັບຮອງເອົາຂໍ້ລິເລີ່ມເພື່ອການເຊື່ອມໂຍງອາຊຽນສະບັບທີ IV (2021-2025); (3). ຖະແຫຼງການອາຊຽນວ່າດ້ວຍຂໍ້ຕົກລົງໃນການສ້າງແລ້ວການເດີນທາງໃນອາຊຽນ; (4). ຖະແຫຼງການອາຊຽນ ວ່າດ້ວຍການທ່ອງທ່ຽວໃນຮູບແບບດີຈີຕອນ; (5). ຖະແຫຼງການຮ່າໂນ້ຍວ່າດ້ວຍການສ້າງຄວາມເຂັ້ມແຂງວຽກງານສັງຄົມສົງເຄາະເພື່ອກ້າວໄປສູ່ປະຊາຄົມອາຊຽນທີ່ເຂັ້ມແຂງ ແລະຕອບສະຫນອງຕໍ່ສະພາບການ. ນອກນັ້ນ, ກໍໄດ້ຮັບຮອງເອົາບັນດາແຜນປະຕິບັດງານສະບັບໃຫມ່ເພື່ອປ່ຽນແທນສະບັບເກົ່າລະຫວ່າງອາຊຽນກັບແຕ່ລະຄູ່ເຈລະຈາສໍາລັບສົກປີ 2021-2025.

 ສໍາລັບ ສປປ ລາວ, ພະນະທ່ານນາຍົກລັດຖະມົນຕີໄດ້ສະເຫນີຊຸກຍູ້ໃຫ້ອາຊຽນສືບຕໍ່ເລັ່ງຟື້ນຟູບັນດາຂົງເຂດທີ່ໄດ້ຮັບຜົນກະທົບຈາກພະຍາດໂຄວິດ-19 ລວມທັງການສືບຕໍ່ຮ່ວມມືກັນຄົ້ນຄວ້າ ແລະ ພັດທະນາ, ຜະລິດຢາປິ່ນປົວພະຍາດໂຄວິດກໍຄືຢາວັກແຊັງໃຫ້ໄດ້ໂດຍໄວ, ສືບຕໍ່ຊຸກຍູ້ການເຮັດວຽກຮ່ວມກັນແນໃສ່ສົ່ງເສີມເສດຖະກິດພາຍໃນອາຊຽນ, ການສະຫນອງແບບຕ່ອງໂສ້ດ້ານການຄ້າ, ການສ້າງເງື່ອນໄຂເອື້ອອໍານວຍໃຫ້ແກ່ຈຸລະວິສາຫະກິດ, ວິສາຫະກິດຂະຫນາດນ້ອຍ ແລະ ກາງ (MSMEs) ໂດຍສະເພາະການເຂົ້າເຖິງແຫຼ່ງທຶນ ແລະເຕັກໂນໂລຊີທີ່ທັນສະໄຫມເພື່ອສາມາດຂັບເຄື່ອນທຸລະກິດ ແລະການຜະລິດສິນຄ້າໄດ້ຢ່າງເຕັມສ່ວນລວມທັງຫັນໄປສູ່ການເປັນດີຈີຕອນ ແລະຟື້ນຟູການສະຫນອງແບບຕ່ອງໂສ້ດ້ານການເຊື່ອມຈອດ ແລະການຄົມມະນາຄົມຂົນສົ່ງທາງບົກ, ທາງນໍ້າ ແລະ ທາງອາກາດ,ລວມທັງການບໍລິການ ແລະການສະຫນອງສິນຄ້າອຸປະໂພກ ແລະບໍລິໂພກ, ການສຶກສາກໍຄືການສ້າງຂີດຄວາມສາມາດເພື່ອກຽມພ້ອມໃຫ້ແກ່ການຫັນໄປສູ່ຍຸກດີຈີຕອນ.

   ໃນພິທີປິດກອງປະຊຸມດັ່ງກ່າວ, ກໍໄດ້ມີພິທີມອບ-ຮັບ ການເປັນປະທານອາຊຽນລະຫວ່າງ ສສ.ຫວຽດນາມ ໃຫ້ແກ່ບຣູໄນ ສໍາລັບປີ 2021 ພາຍໃຕ້ຄໍາຂັວນ: “WE CARE–WE PREPARE–WE PROSPER” ຫຼື “ພວກເຮົາຫວ່ງໃຍ-ພວກເຮົາກຽມພ້ອມ-ພວກເຮົາພ້ອມກັນຈະເລີນ”.

---------------

(ຂ່າວ-ພາບ: ສຸກສະຫວັນ )

ໜັງສືພິມເສດຖະກິດ-ສັງຄົມ

แชร์