ຕາດມ່ວງ ໜຶ່ງແຫຼ່ງທ່ອງທ່ຽວທີ່ສວຍງາມ

  ສາຍນໍ້າແມ່ນແຫຼ່ງຊັບພະຍາກອນທໍາມະຊາດທີ່ຫຼໍ່ລ້ຽງປະຊາຊົນລາວແຕ່ເໜືອຮອດໃຕ້ ແລະເປັນເສັ້ນທາງຄົມມະນາຄົມທີ່ອໍານວຍຄວາມສະດວກໃຫ້ປະຊາຊົນເຂດຫ່າງໄກໃຫ້ສາມາດໄປ-ມາຫາສູ່ກັນໄດ້ຕະຫຼອດປີ, ຕາມແມ່ນໍ້າກໍ່ມີເກາະດອນນ້ອຍໃຫຍ່ແຈກຢາຍແຕ່ເໜືອເຖິງໃຕ້, ເປັນບ່ອນອາໄສຂອງສັດນໍ້າຫຼາຍຊະນິດ ຊຶ່ງສະແດງໃຫ້ເຫັນເຖິງຄວາມອຸດົມສົມບູນຂອງປະເທດເຮົາ.

  ຕາດມ່ວງຍັງຄົງຄວາມງາມຂອງທໍາມະຊາດໄວ້ແບບດັ້ງເດີມທີ່ອຸດົມໄປດ້ວຍຊັບໃນດິນສິນໃນນໍ້າທີ່ໜ້າທ່ຽວຊົມເນື່ອງຈາກວ່າພື້ນທີ່ດັ່ງກ່າວປົກຄຸມໄປດ້ວຍຕົ້ນໄມ້ນ້ອຍ-ໃຫຍ່ຈໍານວນຫຼາຍແມ່ນແຕ່ຍາມແລ້ງກໍຍັງຮູ້ສຶກເຢັນສົດຊື່ນບວກກັບສັດນ້ອຍໃຫຍ່ສົ່ງສຽງດັງກ້ອງລະງົມທີ່ຟັງແລ້ວໜ້າຫຼົງໄຫຼມ່ວນຊື່ນໄປກັບມັນເຮັດໃຫ້ລືມຄວາມອິດເມື່ອຍຈາກການ ເດີນທາງກັນເລີຍ.

  ຕາດມ່ວງເປັນນໍ້າຕົກຕາດທີ່ນອນຢູ່ບໍລິເວນດຽວກັນກັບຕາດນໍ້າສະນາມຕັ້ງຢູ່ບ້ານຄູນຄຳເມືອງຄູນຄຳ ແຂວງຄຳມ່ວນທາງເຂົ້າລະຫວ່າງສອງນໍ້າຕົກຕາດນີ້ຫ່າງກັນປະມານ 600-700 ແມັດຫ່າງຈາກທາງເລກ 8 ເຂົ້າໄປປະມານ 1,5 ກິໂລແມັດ, ຕາດແຫ່ງນີ້ເໝາະທີ່ສຸດໃນການຫຼິ້ນນໍ້າ,  ຜ່ອນຄາຍສະໜອງ ແລະເຊື່ອແນ່ວ່າຈະມີນັກທ່ອງທ່ຽວທັງພາຍໃນ ແລະຕ່າງປະເທດເດີນທາງໄປທ່ຽວຊົມເປັນຈຳນວນຫຼວງຫຼາຍ.

 ----

ໂດຍ: ວົງມະນີ

แชร์