ເມືອງລະມາມ ສະເຫຼີມສະຫຼອງວັນສາກົນຜູ້ອາຍຸສູງ

  ວັນສາກົນຜູ້ອາຍຸສູງແມ່ນວັນທີ່ມີຄວາມໝາຍຄວາມສຳຄັນທີ່ພະນັກງານການນຳບໍ່ເຄີຍຫຼົງລືມໄດ້ ແລະຄົນລຸ້ນຫຼັງໄດ້ຈາລຶກເຖິງບຸນຄຸນ ແລະຄຸນງາມຄວາມດີທີ່ລຸ້ນພໍ່ລຸ້ນແມ່, ລຸ້ນປ້າລຸ້ນລູງທີ່ໄດ້ປະກອບສ່ວນໃນພາລະກິດປົດປ່ອຍຊາດປະຊາທິປະໄຕກໍຄືສະໄໝປົກປັກຮັກສາ ແລະສ້າງສາພັດທະນາປະເທດຊາດ.

  ໃນວັນທີ 12 ພະຈິກ 2020 ເມືອງລະມາມ ແຂວງເຊກອງໄດ້ຈັດພິທີສະເຫຼີມສະຫຼອງວັນສາກົນຜູ້ອາຍຸສູງ (ວັນທີ 1 ຕຸລາ) ແລະວັນຄົນພິການແຫ່ງຊາດ (ວັນທີ 3 ທັນວາ) ປະຈຳປີ 2020 ຂຶ້ນຢູ່ທີ່ສະໂມສອນແຂວງໂດຍການເຂົ້າຮ່ວມຂອງທ່ານ ເຫຼັກໄຫຼ ສີວິໄລ ເຈົ້າແຂວງ-ແຂວງເຊກອງ,ມີບັນດາຄະນະປະຈຳພັກແຂວງ, ກໍາ ມະການພັກແຂວງ, ຄະນະປະຈຳພັກເມືອງ, ກໍາມະການພັກເມືອງ,  ຫົວໜ້າ-ຮອງພະແນກການອ້ອມຂ້າງແຂວງຕະຫຼອດຮອດພະນັກງານອາວຸໂສປະຕິວັດພາຍໃນບ້ານເທສະບານແຂວງເຂົ້າຮ່ວມຢ່າງຫຼວງຫຼາຍ.

  ທ່ານ ວົງເດືອນ ຈັນທະບຸດຊຽງ ເຈົ້າເມືອງ-ເມືອງລະມາມໄດ້ຜ່ານປະຫວັດຄວາມເປັນມາຂອງວັນສາກົນຜູ້ອາຍຸສູງຊຶ່ງມີບາງຕອນທ່ານກ່າວວ່າ: ວັນສາກົນຜູ້ອາຍຸສູງຖືເປັນສຳຄັນຂອງຜູ້ອາຍຸສູງໃນທົ່ວໂລກຊຶ່ງອົງການສະຫະປະຊາຊາດໄດ້ກຳນົດເອົາວັນທີ 1 ຕຸລາ ຂອງທຸກປີເປັນວັນສາກົນຜູ້ອາຍຸສູງ, ຊຶ່ງໃນທົ່ວໂລກຈັດງານຜູ້ອາຍຸສູງ ຂຶ້ນເພື່ອສະແດງໃຫ້ເຫັນຄຸນຄ່າຂອງຜູ້ອາຍຸສູງໃຫ້ຄົນທົ່ວໄປໄດ້ເຫັນວ່າຜ່ານມາຜູ້ອາຍຸສູງໄດ້ສ້າງຜົນງານ,ໄດ້ສ້າງຄຸນງາມຄວາມດີທີ່ເປັນປະໂຫຍດໃຫ້ກັບສັງຄົມໃນຫຼາຍດ້ານນັບແຕ່ອາດີດຈົນເຖິງປະຈຸບັນ.

  ສຳລັບປະເທດລາວເຮົາກໍເຊັ່ນດຽວກັນຢູ່ໃນຂອບເຂດທົ່ວປະເທດໂດຍສະເພາະຢູ່ເມືອງລະມາມ ແຂວງເຊກອງ ກໍໄດ້ຈັດງານດັ່ງກ່າວຂຶ້ນທຸກໆປີເພື່ອຈາລຶກເຖິງຄຸນງາມຄວາມດີຂອງຜູ້ອາຍຸສູງ, ກໍຄືພະນັກງານອາວຸໂສປະຕິວັດທຸກທົ່ວໜ້າທີ່ໄດ້ປະກອບສ່ວນໃນພາລະກິດປົກປັກຮັກສາ ແລະສ້າງສາປະເທດຊາດ ແລະເພື່ອເປັນການສະເຫຼີມສະຫຼອງວັນດັ່ງກ່າວໃຫ້ມີຄວາມໝາຍຄວາມສຳຄັນ, ໂດຍແນໃສ່ປູກຈິດສໍານຶກໃຫ້ຄົນຮຸ່ນຫຼັງໄດ້ຮັບຮູ້ເຖິງຄຸນງາມຄວາມດີຂອງຜູ້ອາຍຸສູງພ້ອມນີ້ເຈົ້າເມືອງຍັງໄດ້ຮຽກ ຮ້ອງມາຍັງບັນດາຫົວໜ່ວຍຄອບຄົວ, ບຸກຄົນ ແລະການຈັດຕັ້ງຈົ່ງໃຫ້ການອຸປະຖໍາຊ່ວຍເຫຼືອ ແລະ ເບິ່ງແຍງດູແລ,ປະຕິບັດນະໂຍບາຍຕອບບຸນແທນຄຸນຂອງເພິ່ນດ້ວຍການໃຫ້ຄວາມອົບອຸ່ນທາງດ້ານຮ່າງກາຍ ແລະຈິດໃຈນັບແຕ່ວັນນີ້ ແລະຕະຫຼອດໄປ.

  ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ກໍໄດ້ສະແດງຄວາມຮູ້ບຸນຄຸນ, ເຖິງຄຸນງາມຄວາມດີ ແລະຄວາມກະຕັນຍູກາຕະເວທີຕໍ່ບັນດາທ່ານອາດີດການນຳພັກ-ລັດທີ່ໄດ້ຮັບອຸດໜູນບຳນານກໍຄືຜູ້ອາຍຸສູງທີ່ໄດ້ເປັນຄັນທຸງທີ່ສຳຄັນໃນການຕິດຕາມຊ່ວຍເຫຼືອໃຫ້ຄຳຄິດຄຳເຫັນ, ເປັນທີ່ປຶກສາ, ເປັນແບບຢ່າງທີ່ດີໃຫ້ແກ່ການນຳແຂວງແຕ່ ລະຍຸກແຕ່ລະສະໄໝຕະຫຼອດມາ ແລະສະແດງຄວາມຍ້ອງຍໍຊົມເຊີຍຕໍ່ຜົນງານ ແລະຄຸນງາມຄວາມດີຂອງພວກເພິ່ນຈາກອາດີດຈົນເຖິງປະຈຸບັນ, ພ້ອມທັງອວຍພອນມາຍັງບັນດາອາດີດການນຳ ແລະຜູ້ອາຍຸສູງທຸກທ່ານຈົ່ງສຸຂະພາບເຂັ້ມແຂງ-ແຂງແຮງເປັນຮົ່ມໂພຮົ່ມໄຊໃຫ້ລູກໃຫ້ຫຼານຕະຫຼອດໄປ.

  ນອກຈາກສະເຫຼີມສະລອງແລ້ວຍັງມີກິດຈະກຳກວດສຸຂະພາບ ແລະຈ່າຍຢາໂດຍບໍ່ໄດ້ເສຍຄ່າໃຫ້ແກ່ຜູ້ເຂົ້າຮ່ວມທຸກທ່ານຕື່ມອີກ.

--------

ຂຽນໂດຍ: ພຸດທະສອນ

ຮູບພາບ: ໜັງສືພິມເສດຖະກິດ-ສັງຄົມ

แชร์