ເຊັນສັນຍາຮັບທຶນໂຄງການສະໜັບສະໜູນການເງິນອາຊີວະສືກສາ

 ວັນທີ 11 ພະຈິກ 2020 ທີ່ສະຖາບັນພັດທະນາອາຊີວະສຶກສາມີຜູ້ແທນຈາກສະຖາບັນອາຊີວະສຶກສາວິທະຍາໄລເຕັກນິກລາວ-ເຢຍລະມັນ, ວິທະຍາໄລເຕັກນິກກະ ສິກຳດົງຄຳຊ້າງ ແລະ ຄູ່ຮ່ວມງານສະຖານປະກອບການກຸ່ມບໍລິສັດດວງຈະເລີນພັດທະນາກໍ່ສ້າງຈຳກັດ, ບໍລິສັດສົ່ງເສີມແຮງງານລາວ, ກຸ່ມການພິມຄື: (ໂຮງພິມສີສະຫວາດ, ວິສາຫະກິດໂຮງພິມແຫ່ງລັດ, ລັດວິສາຫະກິດໂຮງພິມສຶກສາ, ໂຮງພິມນະຄອນຫຼວງ, ວິສາຫະກິດໂຮງພິມໜຸ່ມລາວ), ບໍລິສັດພັນເພັດພັດທະນາດ້ານການກະເສດ ຈຳກັດຜູ້ດຽວ, ສະໄໝສຸກະເສີນ ການຄ້າຂາອອກ-ຂາເຂົ້າຈຳກັດຜູ້ດຽວ, ບໍລິສັດຈັນທີບໍລິການປູກຫຍ້າ ແລະສູນຜະລິດເມັດະພັນພືດທີ່ດີລາວ-ຈີນ ໄດ້ເຊັນສັນຍາຮັບທຶນສະໜັບສະໜູນນຳໂຄງການສະໜັບສະໜູນການເງິນອາຊີວະສຶກສາ (VEFF) ຊຶ່ງລວມທັງໝົດ 3 ສັນຍາ ໂດຍພິທີດັ່ງກ່າວໄດ້ມີທ່ານ ໜູນພັນ ອຸດ ສາ ຫົວໜ້າກົມອາຊີວະສຶກສາ, ກະຊວງສຶກສາທິການ ແລະກີລາເຂົ້າຮ່ວມເປັນສັກຂີພິຍານ. ອີງໃສ່ສັນຍາໂຄງການ VEFF ຈະສະໜອງການສະໜັບສະໜູນທາງດ້ານການເງິນ ແລະທາງດ້ານວິຊາການໃຫ້ແກ່ສະຖານອາຊີວະສຶກສາ ແລະຄູ່ຮ່ວມງານສະຖານປະກອບການເພື່ອຈັດຕັ້ງປະຕິບັດການຝຶກວີຊາຊີບໃນຮູບແບບການຮຽນ-ການສອນອາຊີວະສຶກສາແບບຄວບຄູ່ (ອສຄ) ໃຫ້ແກ່ຜູ້ຮຽນວິຊາຊີບ 30 ຄົນ ໃນສາຂາອາຊີບ “ສ້ອມແປງກົນຈັກໜັກ”, 20 ຄົນ ໃນສາຂາອາຊີບ “ສ້ອມແປງ ແລະ ບຳລຸງຮັກສາເຄື່ອງຈັກພິມ” ແລະ 20 ຄົນ ໃນສາຂາອາຊີບ “ນັກວິຊາການປູກຝັງ”.

  ວິທະຍາໄລເຕັກນິກລາວ-ເຢຍລະມັນ, ວິທະຍາໄລເຕັກນິກກະສິກຳດົງຄຳຊ້າງ ແລະຄູ່ຮ່ວມງານສະຖານປະກອບການໄດ້ຢື່ນບົດສະເໜີແຜນງານພ້ອມກັບ 10 ບົດສະ ເໜີຈາກພາກສ່ວນອື່ນ ແລະໄດ້ຜ່ານເງື່ອນໄຂຂອງຂະບວນການປະເມີນທີ່ດຳເນີນໂດຍໂຄງການ, ຈາກຜົນການແຂ່ງຂັນແມ່ນໄດ້ນອນໃນ 10 ບົດ ສະເໜີແຜນງານ ການຮຽນ-ການສອນ ອສຄ ທີ່ໄດ້ຮັບທຶນສະໜັບສະໜູນໂຄງການ VEFF . ການຝຶກອາຊີບຮູບແບບ ອສຄ ລະດັບວິຊາຊີບຊັ້ນສູງ (12+3) ໃນສາຂາ “ສ້ອມແປງກົນຈັກໜັກ” ຊຶ່ງຄາດໝາຍຮັບຜູ້ຮຽນວິຊາຊີບຈຳນວນ 30 ຄົນ ໃນນັ້ນແມ່ຍິງ 6 ຄົນ, ສາຂາອາຊີບ “ສ້ອມແປງ ແລະ ບຳລຸງຮັກສາເຄື່ອງຈັກພິມ” (ຫຼັກສູດຕໍ່ເນື່ອງ 12+2+1) ຄາດໝາຍຜູ້ຮຽນວິຊາຊີບ 20 ຄົນ ຍິງ 1 ແລະສາຂາອາຊີບ “ນັກວິຊາການປູກຝັງ” ລະດັບວິຊາຊີບຊັ້ນສູງຜູ້ຮຽນວິຊາຊີບ 20 ຍິງ 8 ໄດ້ວາງກຳນົດ ການຮຽນພາກທິດສະດີຢູ່ສະຖານອາຊີວະສຶກສາປະມານ 30-40% ແລະ ພາກປະຕິບັດ 60-70% ຢູ່ສະຖານປະກອບການໄດ້ມີການເຊັນບົດບັນທຶກຊ່ວຍຈຳລະ ຫວ່າງສະຖານອາຊີວະສຶກສາ ແລະຄູ່ຮ່ວມງານສະຖານປະກອນການ.

   ການສະໜັບສະໜູນທາງດ້ານການເງິນສຳລັບລາຍຈ່າຍເພີ່ມເຕີມຊຶ່ງເກີດຈາກຈັດຕັ້ງປະຕິບັດແຜນງານ ອສຄ ປະກອບມີ: ງົບປະມານບໍລິຫານ ແລະການປະສານງານ ອສຄ,ຄູສອນວິຊາຊີບ ແລະຄູຝຶກພາຍໃນສະຖານປະກອບການ, ເງິນອູດໜູນໃຫ້ແກ່ຜູ້ຮຽນວີຊາຊີບ,ເງິນນະໂຍບາຍເພີ່ມໃຫ້ຄູຝຶກໃນສະຖານປະກອບການ, ອຸປະ ກອນຮັບໃຊ້ການຮຽນ-ການສອນ, ອຸປະກອນຄວາມປອດໄພ ແລະສຸຂະພາບແຮງງານ ແລະສຸຂະອະນາໄມ, ວັດສະດຸສິ້ນເປືອງ ແລະຄ່າລຸ້ຍຫຽນເຄື່ອງຈັກ ແລະເຄື່ອງ ຈັກຮັບໃຊ້ວິຊາສະເພາະໃຫ້ແກ່ຄູ່ຮ່ວມງານຝ່າຍສະຖານອາຊີວະສຶກສາ. ທຶນສະໜັບສະໜູນທາງດ້ານການເງິນສຳລັບຈັດຕັ້ງປະຕິບັດການຮຽນ-ການສອນ ອສຄ, ລວມທັງການສະໜອງທີ່ປຶກສາສຳລັບການຈັດຕັ້ງປະຕິບັດແຜນງານ ແລະການປະກອບສ່ວນຂອງຄູ່ຮ່ວມງານ ອສຄ, ສຳລັບສາຂາອາຊີບ “ສ້ອມແປງກົນຈັກໜັກ” ລວມມີມູນຄ່າ 1,29 ແສນເອີໂຣ,ສາຂາອາຊີບ “ບຳລຸງຮັກສາເຄື່ອງຈັກພິມ” ມູນຄ່າ 43,6 ແສນເອີໂຣ ແລະສາຂາອາຊີບ “ນັກວິຊາການປູກຝັງ” ມູນຄ່າ 76,5 ແສນເອີໂຣ.

   ລວມມູນຄ່າສູງສຸດຂອງ 10 ແຜນງານ ທີ່ໄດ້ຮັບທຶນສະໜັບສະໜູນ 724 ແສນເອີໂຮ;ສຳລັບສະຖານອາຊີວະສຶກສາໄດ້ຮັບທຶນສະໜັບສະໜູນມູນຄ່າ 1,55 ແສນເອີໂຣ, ສະຖານປະກອບການ 2,3 ແສນເອີໂຣ ແລະຜູ້ຮຽນວິຊາຊີບ 1,98 ແສນເອີໂຣ.

  ອີງໃສ່ລະບຽບການຂອງກະຊວງສຶກສາທິການ ແລະກີລາກ່ຽວກັບການຮຽນ-ການສອນອາຊີວະສຶກສາແບບຄວບຄູ່ແມ່ນຈະໄດ້ດຳເນີນຢູ່ສອງບ່ອນ,ພາກທິດສະດີຢູ່ສະ ຖານອາຊີວະສຶກສາ ແລະ ພາກປະຕິບັດຢູ່ໃນສະຖານປະກອບການທີ່ກ່ຽວຂ້ອງກັບສາຂາອາຊີບນັ້ນຄູ່ຮ່ວມງານ ອສຄ ຈະໄດ້ຮ່ວມກັນຄັດເລືອກຜູ້ຮຽນວິຊາຊີບ, ດຳເນີນການຈັດຕັ້ງປະຕິບັດການຝຶກອົບອາຊີບ, ປະເມີນ, ສອບເສັງ ແລະ ອອກໃບປະກາສະນີຍະບັດ, ຜູ້ຮຽນວິຊາຊີບຕ້ອງໄດ້ເຊັນສັນຍາກັບຄູ່ຮ່ວມງານຝ່າຍສະຖານປະກອບການ.

   ໄລຍະການຈັດຕັ້ງປະຕິບັດສັນຍາຮັບທຶນສະໜັບສະໜູນແມ່ນ 3 ປີ ເລີ່ມແຕ່ວັນ ທີ 1 ກັນຍາ 2020 ຈົນຮອດວັນທີ 31 ສິງຫາ 2023.

แชร์