ເຈົ້າແຂວງສະຫວັນນະເຂດໃຫ້ກຳລັງໃຈ 9 ຄອບຄົວໄຟໄໝ້

ວັນທີ 8 ພະຈິກ 2020 ການນຳ ແຂວງສະຫວັນນະເຂດ ນຳໂດຍທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມພັນລະຍາ, ທ່ານ ບຸນເລດ ຈັນທອງທິບ ຮັກສາການຫົວໜ້າພະແນກກະສິກຳ ແລະປ່າໄມ້ແຂວງ, ພ້ອມດ້ວຍຫົວໜ້າ-ຮອງຫົວໜ້າພະແນກການອ້ອມຂ້າງແຂວງໄດ້ລົງມອບເຄື່ອງຊ່ວຍເຫຼືອ ແລະເງິນສົດໃຫ້ກັບ 9 ຄອບຄົວ ທີ່ໄດ້ຮັບຜົນກະທົບຈາກອັກຄີໄພ (ໄຟໄໝ້ເຮືອນ) ປະຊາຊົນຢູ່ດົງຫວາຍ ເມືອງຊົນນະບູລີ ໃນນີ້ຄອບຄົວການນຳໄດ້ມອບເງິນຊ່ວຍເຫຼືອໃຫ້ຄອບຄົວລະ 1 ລ້ານກີບ, ພ້ອມດ້ວຍເຄື່ອງຊ່ວຍເຫຼືອຈຳນວນໜຶ່ງ, ພະແນກແຮງງານ ແລະສະຫວັດດີການສັງຄົມແຂວງມອບສັງກະສີຈຳນວນ 360 ແຜ່ນ, ເຫຼັກຕະປູ 110 ກິໂລ, ຖັງດຳໃສ່ນໍ້າ 9 ໜ່ວຍ, ເຂົ້າສານ 450 ກິໂລ, ຜ້າຫົ່ມ, ໝອນຈຳນວນໜຶ່ງ ແລະ ກໍ່ຍັງມີພະແນກການ, ນັກທຸລະກິດກໍ່ໄດ້ປະກອບສ່ວນເຄື່ອງອຸປະໂພກ ແລະບໍລິໂພກໃຫ້ກັບຄອບຄົວທີ່ໄດ້ຮັບຜົນກະທົບຈາກໄຟໄໝ້ເຮືອນ ແລະຜູ້ປະສົບໄພນໍ້າຖ້ວມໃນຈຳນວນ 145 ຄອບຄົວພາຍໃນບ້ານດົງຫວາຍຕື່ມອີກ.

   ການມອບເຄື່ອງຊ່ວຍເຫຼືອຄັ້ງນີ້ເນື່ອງຈາກວ່າໃນເວລາປະມານ 10:10 ໂມງ, ຂອງວັນທີ 5 ພະຈິກ 2020 ໄດ້ເກີດເຫດໄຟໄໝ້ເຮືອນປະຊາຊົນບ້ານດົງຫວາຍ ເມືອງຊົນນະບູລີຈໍານວນ 9 ຫຼັງ, ໃນນີ້ເສຍຫາຍໝົດຫຼັງຈຳນວນ 7 ຫຼັງ ຄາເຮືອນ ແລະ ອີກ 2 ຫຼັງແມ່ນເສຍຫາຍເລັກໜ້ອຍ. ເຮືອນທີ່ຖືກໄຟໄໝ້ເປັນເຮືອນໄມ້ແອ້ມດ້ວຍແປ້ນ, ມຸງດ້ວຍສັງກະສີ, ເຊິ່ງຕົນເພີງໄດ້ເກີດຢູ່ເຮືອນທ້າວ ບອນ ເຊິ່ງມີແມ່ເຖົ້າຄົນໜຶ່ງທີ່ຢູ່ເຮືອນໃກ້ໄດ້ຍິນເສຍແຕກບາດໜຶ່ງແລ້ວກໍ່ມີໄຟລຸກລາມຂຶ້ນ, ໃນເວລານັ້ນຢູ່ເຮືອນບໍ່ມີໃຜຈຶ່ງເຮັດໃຫ້ໄຟລຸກລາມບວກກັບມີລົມພັດເຮັດໃຫ້ໄຟລາມໄປໃສ່ເຮືອນຄົນອື່ນໆຕື່ມອີກລວມທັງໝົດ 7 ຫຼັງທີ່ເສຍຫາຍທັງໝົດ. ນອກຈາກເຮືອນທ້າວ ບອນ ແລ້ວຍັງມີເຮືອນຂອງທ້າວ ລິນທອງ, ເຮືອນນາງ ປຸ້ງ, ເຮືອນທ້າວຈວງ, ເຮືອນທ້າວບ່ຽງ, ເຮືອນທ້າວລອຍ, ເຮືອນນາງສູນທີ່ຖືກໄຟໄໝ້ເສຍຫາຍທັງໝົດ ໂດຍທີ່ບໍ່ໄດ້ຫຍັງ. ຕາມການເອົາຂໍ້ມູນເບື້ອງຕົ້ນໃນ 7 ຫຼັງ ຄາເຮືອນທີ່ຖືກໄຟໄໝ້ ມີຜົນເສຍຫາຍຫຼາຍຢ່າງເປັນຕົ້ນ: ລົດໄຖນາຍ່າງຕາມ, ເລົ້າເຂົ້າ, ເຂົ້າເປືອກ, ເຄື່ອງເອເລັກໂທນ 1 ຊຸດ ພ້ອມດ້ວຍຊັບສິນເງິນ-ຄຳ ແລະເຄື່ອງໃຊ້ສອຍຕ່າງໆ ລວມມູນຄ່າທັງໝົດ 1,1 ຕື້ກີບ. ສ່ວນອີກ 2 ຫຼັງແມ່ນໄດ້ຮັບຄວາມເສຍຫາຍບາງສ່ວນຄື: ເຮືອນທ້າວ ຂຽວ ແລະເຮືອນນາງ ຂອດ ຖືກໄຟໄໝ້ຝາເຮືອນພຽງເລັກໜ້ອຍ.

--------------

ຂ່າວ: ສະຫວັນ, ຮູບພາບ: #ຫນັງສືພິມເສດຖະກິດສັງຄົມ

      

แชร์