ຄອບຄົວ ພອນວິໄລສັກ ມອບເຄື່ອງຊ່ວຍບ້ານຫ້ວຍສານ

   ວັນທີ 8 ພະຈິກ ຜ່ານມາ, ທ່ານ ປອ ເພັດສະໝອນ ພອນວິໄລສັກ ພ້ອມດ້ວຍຄອບຄົວ ແລະຍາດຕິພີ່ນ້ອງໄດ້ນຳເອົາເຄື່ອງບໍລິໂພກ, ອຸປະໂພກທີ່ຮັບໃຊ້ໃນຄົວເຮືອນໄປມອບໃຫ້ແກ່ປະຊາຊົນບ້ານຫ້ວຍສານ ແລະອຳນາດການປົກຄອງ ເມືອງເຊໂປນ ແຂວງສະຫວັນນະເຂດ.

  ຊຶ່ງພາຍຫຼັງເມືອງ ແລະບ້ານດັ່ງກ່າວໄດ້ຮັບຜົນກະທົບໜັກຈາກໄພພິບັນໍ້າຖ້ວມໃນລະຫວ່າງເດືອນຕຸລາ 2020 ເຄື່ອງທີ່ນຳໄປມອບໃນຄັ້ງນີ້ປະກອບມີຜ້າຫົ່ມ 100 ຜື່ນ, ເຄື່ອງນຸ່ງຫົ່ມ 100 ໂຕ, ເຂົ້າສານໜຽວ 500 ກິໂລ, ໝີ່ແຫ້ງ 5 ແກັດ, ນໍ້າດື່ມ 136 ແຟັກ ແລະເກືອປຸງອາຫານ 10 ຖົງ, ເຄື່ອງທັງເໝິດນັ້ນເປັນສ່ວນ ໜຶ່ງຂອງຄອບຄົວທ່ານ ປອ ເພັດສະໝອນ ພອນວິໄລສັກ ທີ່ໄດ້ປະກອບສ່ວນບັນເທົ່າທຸກໃຫ້ແກ່ປະຊາຊົນບັນດາເຜົ່າເມືອງເຊໂປນ, ເວົ້າສະເພາະກໍ່ຄືຄອບຄົວປະຊາຊົນບ້ານຫ້ວຍສານ.

 ດັ່ງນັ້ນຄອບຄົວ ພອນວິໄລສັກ ຈຶ່ງໄດ້ສົ່ງນໍ້າໃຈ, ຄວາມອົບອຸ່ນໄປຍັງອໍານາດການປົກຄອງເມືອງເຊໂປນ. ກ່າວຮັບໂດຍທ່ານ ສົມບັດ ອິດທະວົງ ຮອງເຈົ້າເມືອງໆເຊໂປນ ແລະທ່ານໄດ້ສະແດງຄວາມຂອບໃຈ ແລະຮູ້ບຸນຄຸນມາຍັງທ່ານ ປອ ເພັດສະໝອນ ພອນວິໄລສັກ ພ້ອມຄອບຄົວ, ຍາດຕິພີ່ນ້ອງທີ່ມີນໍ້າໃຈອັນປະເສີດຊ່ວຍເຫຼືອປະຊາຊົນທີ່ປະສົບໄພໃນຄັ້ງນີ້ ແລະອວຍພອນໃຫ້ຄອບຄົວຂອງທ່ານຈົ່ງມີແຕ່ຄວາມຜາສຸກຍິ່ງໆຂຶ້ນເພື່ອສືບຕໍ່ຊ່ວຍເຫຼືອສັງຄົມລາວຕໍ່ໄປ ແລະຫວັງຢ່າງຍິ່ງວ່າໂອກາດໜ້າຈະໄດ້ຮັບການຊ່ວຍເຫຼືອດ້ານອື່ນໆອີກຈາກຄອບຄົວຂອງທ່ານກໍ່ຄືຂອງການຈັດຕັ້ງຕ່າງໆອີກຕໍ່ໄປ.

แชร์