ເກັບກູ້ລະເບີດຕົກຄ້າງເກືອບ 900 ລູກ ໃນ 2 ບ້ານ

  ວັນທີ 6 ພະຈິກ 2020 ທີ່ພະແນກພາຍໃນແຂວງຄຳມ່ວນ ອົງການເກັບກູ້ລະເບີດ (ແມັກ) ໄດ້ສະຫຼຸບໂຄງການກວດກູ້ລະເບີດເພື່ອສະໜັບສະໜູນການພັດທະນາຊຸມຊົນຢູ່ເມືອງຍົມມະລາດ ໂດຍການເຂົ້າຮ່ວມຂອງທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ, ທ່ານ ໄຊມອນ ເຣ (Simon Rea) ຫົວໜ້າອົງການເກັບກູ້ລະເບີດ (ແມັກ) ປະຈຳ ສປປ ລາວ, ມີຜູ້ຕາງໜ້າບັນດາກະຊວງ, ພະແນກການກ່ຽວຂ້ອງ, ການນຳເມືອງຍົມມະລາດ ແລະ ນາຍບ້ານໃນເຂດເປົ້າໝາຍຂອງໂຄງການເຂົ້າຮ່ວມ.

   ທ່ານ ສີອຳພອນ ບຸດສະດີ ໄດ້ຕາງໜ້າອົງການຂຶ້ນຜ່ານສະຫຼຸບການຈັດຕັ້ງປະຕິບັດໃນໄລຍະ 12 ເດືອນຜ່ານມາ. ຊຶ່ງໂຄງການເກັບກູ້ລະເບີດເພື່ອສະໜັບສະໜູນການພັດທະນາຊຸມຊົນຢູ່ເມືອງຍົມມະລາດ ແຂວງຄຳມ່ວນ ໂດຍໄດ້ຮັບການສະໜັບສະໜູນຈາກມູນນິທິ UMCOR ປະເທດສະຫະລັດອາເມລິກາດ້ວຍງົບປະມານ 5 ແສນໂດລາຊຶ່ງມີໄລຍະການຈັດຕັ້ງປະຕິບັດ 12 ເດືອນເລີ່ມແຕ່ເດືອນກັນຍາ 2019 ຫາ ສິງຫາ 2020 ໃນເຂດ 5 ບ້ານທີ່ນອນຢູ່ໃນເປົ້າໝາຍຄື: ບ້ານຄຳແຮ່, ຫາງການ, ຊຽງດາວ, ບ້ານສ້າງ-ປຸງບອນ ແລະບ້ານຕະຫຼາກ.

  ຜ່ານການຈັດຕັ້ງປະຕິບັດຕົມຈິງໃນ 2 ກິດຈະກຳຫຼັກຄື: ການສຳຫຼວດ ແລະການເກັບກູ້ລະເບີດອອກຈາກເນື້ອທີ່, ໃນນັ້ນກິຈະກຳການສຳຫຼວດເນື້ອທີ່ດິນປະຕິບັດໄດ້ທັງໝົດ 6,9 ແສນຕາແມັດ ໃນ 5 ບ້ານ ເປົ້າໝາຍ ຫຼືເທົ່າກັບ 223% ຂອງຄາດໝາຍທີ່ວາງໄວ້,ສ່ວນກິດຈະກຳການເກັບກູ້ລະເບີດອອກຈາກເນື້ອທີ່ດິນແມ່ນຈັດຕັ້ງປະຕິບັດໄດ້ພຽງແຕ່ 2 ບ້ານ ຄື: ບ້ານຫາງການ ແລະບ້ານຊຽງດາວໃນເນື້ອທີ່ດິນ 5,7 ແສນຕາແມັດສາມາດເກັບກູ ແລະທຳລາຍລະເບີດໄດ້ທັງໝົດ 871 ລູກ ໃນນັ້ນເປັນປະເພດບົ່ມບີ້ 784 ລູກ ແລະລະເບີດອື່ນໆ 87 ລູກ.

  ເມື່ອທຽບໃສ່ຄາດໝາຍແລ້ວການຈັດຕັ້ງປະຕິບັດເກັບກູ້ລະເບີດອອກຈາກເນື້ອທີ່ແມ່ນປະຕິບັດໄດ້ພຽງແຕ່ 90% ເນື່ອງຈາກການແຜ່ລະບາດຂອງພະຍາດໂຄວິດ-19 ຈຶ່ງເຮັດໃຫ້ງົບປະມານຍັງເຫຼືອຈຳນວນ 1,47 ແສນໂດລາ, ດັ່ງນັ້ນທາງໂຄງການຈຶ່ງໄດ້ສະເໜີຂໍຕໍ່ໄລຍະໃນການຈັດຕັ້ງປະຕິບັດຕື່ມອີກ 6 ເດືອນ ໂດຍເລີ່ມແຕ່ເດືອນກັນຍາ 2020 ຫາ ເດືອນກຸມພາ 2021.

------------

ຂຽນໂດຍ: ກອງຄໍາ

ຮູບພາບ: #ຫນັງສືພິມເສດຖະກິດສັງຄົມ

แชร์