ໄຊສົມບູນ ສະຫຼຸບການກະກຽມກອງປະຊຸມໃຫຍ່ 3 ຂັ້ນ

  ແຂວງໄຊສົມບູນຈັດກອງປະຊຸມສະຫຼຸບຖອດຖອນບົດຮຽນກ່ຽວກັບການກະກຽມກອງປະຊຸມໃຫຍ່ 3 ຂັ້ນ ຂອງພັກໃນວັນທີ 9 ພະຈິກ ທີ່ສະໂມສອນເມືອງອະນຸວົງ ໂດຍການເປັນປະທານຂອງສະຫາຍ ພົຕ ຄຳລຽງ ອຸທະໄກສອນ ເລຂາພັກແຂວງ, ເຈົ້າແຂວງໄຊສົມບູນ, ມີບັນດາຄະນະບໍລິຫານງານພັກແຂວງ, ບັນດາຫົວໜ້າອະນຸກຳມະການກອງປະຊຸມໃຫຍ່ອົງຄະນະພັກແຂວງຄັ້ງທີ I ເຂົ້າຮ່ວມ.

  ສະຫາຍ ພົຕ ຄຳລຽງ ອຸທະໄກສອນກ່າວວ່າ: ກອງປະຊຸມຄັ້ງນີ້ຈະໄດ້ສະຫຼຸບຖອດຖອນບົດຮຽນເພື່ອຍົກໃຫ້ເຫັນຜົນສຳເລັດ, ຈຸດດີ, ຈຸດອ່ອນ-ຂໍ້ຄົງຄ້າງ ແລະບາງບົດຮຽນທີ່ຖອດຖອນໄດ້ໃນການກະກຽມ ແລະດຳເນີນກອງປະຊຸມໃຫຍ່ອົງຄະນະພັກແຂວງໄຊສົມບູນຄັ້ງທີ I ທີ່ໄດ້ຮັບຜົນສຳເລັດຢ່າງຈົບງາມ ແລະເພື່ອນຳໄປເປັນບົດຮຽນໃນຄັ້ງຕໍ່ໄປພ້ອມນີ້ສະຫາຍຍັງໄດ້ຮຽກຮ້ອງມາຍັງບັນດາຜູ້ເຂົ້າຮ່ວມຈົ່ງພ້ອມກັນສຸມສະຕິປັນຍາເຂົ້າໃນການຄົ້ນຄວ້າປະກອບຄຳເຫັນ.

 ຈາກນັ້ນໄດ້ຮັບຟັງການຜ່ານບົດສະຫຼຸບຕີລາຄາຖອດຖອນບົດຮຽນການກະກຽມ ແລະດຳເນີນກອງປະຊຸມໃຫຍ່ຄັ້ງທີ I ຂອງອົງຄະນະພັກແຂວງຈາກສະຫາຍ ຄົ້ວຈັ້ງ ດຣາເຊັ້ງຫົວໜ້າອະນຸກຳມະການເນື້ອໃນຊຶ່ງບັນດາອະນຸກຳມະການຊ່ວຍວຽກຕ່າງໆແຕ່ລະອະນຸກຳມະການກໍໄດ້ເອົາໃຈໃສ່ໃນການຈັດຕັ້ງປະຕິບັດພາລະບົດບາດ, ສິດ ແລະໜ້າທີ່ຕາມການມອບໝາຍໂດຍສະເພາະແມ່ນໄດ້ປຶກສາຫາລືກຳນົດແຜນການເຄື່ອນໄຫວວຽກຢ່າງລະອຽດຈະແຈ້ງເຮັດໃຫ້ການເຄື່ອນໄຫວກະກຽມກອງປະຊຸມແຕ່ລະອະນຸກຳມະການໄດ້ດຳເນີນໄປຢ່າງເປັນລະບົບ ແລະສຳເລັດຕາມແຜນການເປັນຕົ້ນອະນຸກຳະການເນື້ອໃນໄດ້ກະກຽມຮ່າງລາຍງານການເມືອງ ແລະຮ່າງແຜນພັດທະນາເສດຖະກິດ-ສັງຄົມ 5 ປີ ຜ່ານມາ ແລະບັນດາບົດປິ່ນອ້ອມຕ່າງໆສ່ວນອະນຸກຳມະການບຸກຄະລາກອນໄດ້ລົງຢັ່ງຫາງສຽງທາບທາມບຸກຄະລາກອນເລີ່ມຈາກຂັ້ນເມືອງ, ພະແນກການຂຶ້ນມາສາມາດຮັບປະກັນໄດ້ເປົ້າໝາຍອອກສະໝັກຮັບເລືອກຕັ້ງທີ່ມີຄຸນລັກສະ ນະຕາມມາດຖານເງື່ອນໄຂທີ່ກຳນົດໄວ້ເຮັດໃຫ້ການເລືອກຕັ້ງໄດ້ດຳເນີນ ແລະບັນລຸຕາມລະດັບຄາດໝາຍ, ສຳລັບອະນຸກຳມະການສະຖານທີ່, ພິທີການ ແລະຮັບແຂກກໍໄດ້ເອົາໃຈໃສ່ກະກຽມຄວາມພ້ອມທຸກດ້ານເພື່ອຮອງຮັບ ແລະຕອບສະໜອງໃຫ້ແກ່ກອງປະຊຸມໄດ້ດຳ ເນີນໄປຕາມແຜນ ແລະອະນຸກຳມະການໂຄສະນາ, ຂະບວນການ ແລະການປະດັບປະດາກໍໄດ້ລົງຊຸກຍູ້ວຽກງານໂຄສະນາ ແລະຂະບວນການຢູ່ບັນດາ 5 ເມືອງ, ພະແນກການ, ກົມກອງອ້ອມຂ້າງແຂວງຢ່າງຕັ້ງໜ້າເພື່ອໃຫ້ທຸກພາກສ່ວນເປັນເຈົ້າການປະກອບສ່ວນເຂົ້າໃນວຽກງານຂະບວນການຮອບດ້ານແນໃສ່ເຮັດໃຫ້ການກະກຽມ ແລະດຳເນີນກອງປະຊຸມໃຫຍ່ອົງຄະນະພັກແຂວງມີເນື້ອໃນ,ມີຄວາມໝາຍອັນເລິກເຊິ່ງ,ມີຂະບວນການຟົດຟື້ນ,ຮັບປະກັນຄວາມສະຫງົບ ແລະ ເປັນລະບຽບຮຽບຮ້ອຍຢ່າງໜັກແໜ້ນ ແລະ ມີຜົນສຳເລັດເປັນຢ່າງດີພ້ອມກັນນີ້ອະນຸກຳມະການປ້ອງກັນຊາດ-ປ້ອງກັນຄວາມສະຫງົບກໍໄດ້ກະກຽມຄວາມພ້ອມສູ້ຕະຫຼອດ 24 ຊົ່ວໂມງໂດຍຈັດກຳລັງອອກເຄື່ອນໄຫວລາດຕະເວນປະຈຳຢູ່ບັນດາຈຸດຫຼໍ່ແຫຼມສຳຄັນຕ່າງໆ ສ່ວນອະນຸກຳມະການດ້ານອື່ນໆກໍ່ໄດ້ມີການຈັດຕັ້ງປະຕິບັດວຽກງານຂອງຕົນສຳເລັດຕາມຄາດໝາຍ, ຫຼັງຈາກນັ້ນບັນດາຜູ້ເຂົ້າຮ່ວມໄດ້ພ້ອມກັນຄົ້ນຄວ້າແລກປ່ຽນປະກອບຄຳຄິດຄຳເຫັນໂດຍເນັ້ນໃສ່ອະນຸກຳມະການຕ່າງໆ ຢ່າງກົງໄປກົງມາດ້ວຍຄວາມຮັບຜິດຊອບສູງ.

---------

ຂ່າວ: ພຸດທະສອນ ເວດສະວົງ

ຮູບພາບ: ໜັງສືພິມເສດຖະກິດ-ສັງຄົມ

แชร์