ຍອດສົ່ງອອກຈີນເພີ່ມສູງຂຶ້ນ 11,4%

  ສຳນັກງານພາສີອາກອນ ສປ ຈີນ ເປີດເຜີຍວ່າຍອດສົ່ງອອກຂອງຈີນຂະຫຍາຍຕົວສູງສຸດໃນຮອບ 19 ເດືອນໃນເດືອນຕຸລາ ແລະການນໍາເຂົ້າຂະຫຍາຍຕົວເຂັ້ມແຂງເຊັນກັນຂະນະທີ່ເສດຖະກິດຈີນຍັງຟື້ນຕົວຈາກຜົນກະທົບຂອງເຊື້ອໂຄວິດ-19 ເມື່ອຕົ້ນປີນີ້.
  ຕາມຂ່າວຕ່າງປະເທດລາຍງານວ່າຍອດສົ່ງອອກໃນເດືອນຕຸລາເພີ່ມສູງຂຶ້ນ 11,4% ຈາກປີກ່ອນສູງກວ່າທີ່ນັກວິເຄາະຄາດໄວ້ວ່າຈະເພີ່ມຂຶ້ນ 9,3% ແລະຂະຍາຍຕົວຫຼາຍກວ່າຍອດສົ່ງອອກໃນເດືອນກັນຍາທີ່ເພີ່ມຂຶ້ນ 9,9%, ຊຶ່ງຍອດນໍາເຂົ້າເພີ່ມຂຶ້ນ 4,7% ເມື່ອທຽບລາຍປີໃນເດືອນຕຸລາລໍຕົວລົງຈາກເດືອນກັນຍາທີ່ເພີ່ມຂຶ້ນ 13,2% ແລະຕໍ່າກວ່າຕົວເລກຄາດຄະເນຂອງນັກວິເຄາະທີ່ຄາດວ່າຈະເພີ່ມຂຶ້ນ 9,5% ແຕ່ກໍຍັງຂະຫຍາຍຕົວເປັນເດືອນທີ 2 ຕິດຕໍ່ກັນຊຶ່ງການສົ່ງອອກທີ່ເພີ່ມຂຶ້ນ ເຮັດໃຫ້ຈີນມີຍອດເກີນດຸນການຄ້າ 58,4 ຕື້ໂດລາສະຫະລັດ ໃນເດືອນຕຸລາເພີ່ມຂຶ້ນຈາກ 37 ຕື້ໂດລາ ໃນເດືອນກັນຍາ ແລະ ສູງກວ່າຕົວເລກຄາດຄະເນທີ່ 46 ຕື້ ໂດລາ.
   ທັງນີ້ຍອດເກີນດຸນການຄ້າຂອງຈີນກັບອາເມລິກາເພີ່ມຂຶ້ນສູ່ລະດັບ 31,3 ຕື້ໂດລາໃນເດືອນຕຸລາ ຈາກ 30 ຕື້ໂດລາໃນເດືອນກັນຍາ.

---------------

ໜັງສືພິມເສດຖະກິດ-ສັງຄົມ

แชร์