ຖ້ຳຈອມອອງເປັນອີກສະຖານທີ່ທ່ອງທ່ຽວທາງທຳມະຊາດຂອງເມືອງໄຊ ແຂວງອຸດົມໄຊ ທີ່ມີຄວາມສວຍງາມ ແລະໂດດເດັ່ນກວ່າສະຖານທີ່ທ່ອງທ່ຽວອື່ນໆພາຍໃນແຂວງເນື່ອງຈາກເປັນຖ້ຳທີ່ມີຫີນຍ້ອຍທີ່ສວຍງາມ, ມີນ້ຳໄຫຼຜ່ານ, ມີນົມຜາ, ຫີນສີຂາວເຫຼື້ອມຄືກັບເພັດພອຍເປັນກ້ອນໃຫຍ່ນ້ອຍຫ້ອຍປະດັບປະດາຢູ່ຕາຜາຫີນ ແລະອື່ນໆ.
ຖ້ຳຈອມອອງຖືກຄົ້ນພົບໃນປີ 2005 ແລະເປີດໃຫ້ບໍລິການໃນປີ 2007 ແລະຜ່ານການສຳຫຼວດຂອງນັກວິທະຍາສາດຈາກສະຫະພາບເອີຣົບໃນປີ2010 ຖ້ຳດັ່ງກ່າວກໍ່ໄດ້ຮັບການພັດທະນາໃຫ້ເປັນແຫຼ່ງ ທ່ອງທ່ຽວລະດັບຊາດ, ຖ້ຳດັ່ງກ່າວຕັ້ງຢູ່ບ້ານຈອມອອງ ເມືອງໄຊ ຫ່າງຈາກເທສະບານເມືອງໄປປະມານ 45 ກິໂລແມັດເປັນຖ້ຳກວ້າງໃຫຍ່, ມີຫຼາຍຮູເຂົ້າ-ອອກ ຍາວປະມານ 16 ກິໂລແມັດ, ກວ້າງ 15-50 ແມັດ ແລະສູງປະມານ 25-100 ແມັດ ຊຶ່ງເປັນຖ້ຳທີ່ມີຄວາມສວຍງາມທີ່ສຸດຂອງແຂວງປະກອບໄປດ້ວຍສີສັນຕ່າງໆແບບທຳມະຊາດເປັນໜ້າອັດສະຈັນ.
ຖ້ຳຈອມອອງມີສາຍນ້ຳໄຫຼຜ່ານ, ມີນົມຜາ ແລະຫີນຍ້ອຍທີ່ມີລວດລາຍສວຍງາມພ້ອມຍັງມີຫີນແກ້ວເປັນສີຂາວເຫຼື້ອມຄືກັບເພັດພອຍເປັນກ້ອນໃຫຍ່ນ້ອຍຫ້ອຍປະດັບປະດາຢູ່ຕາມຝາຫີນຄ້າຍຄືດອກໄຟສະຫວ່າງສະໄຫວຢ່າງສວຍສົດງົດງາມ, ຊື່ຖ້ຳຈອມອອງແມ່ນເອີ້ນຕາມຊື່ບ້ານແຕ່ເມື່ອກ່ອນປະຊາຊົນເຄີຍເອີ້ນຖ້ຳນີ້ວ່າຖ້ຳເຈຍ ຫຼື ຖ້ຳຂີ້ເຈຍຍ້ອນມີເຈຍມາອາໄສຢູ່ເປັນຈຳນວນຫຼາຍຈົນຊາວບ້ານພາກັນເອົາຂີ້ເຈຍໄປເຮັດໝື້ປືນແກັບ.
ປະຈຸບັນຖ້ຳດັ່ງກ່າວພວມໄດ້ຮບທຶນຊ່ວຍເຫຼືອຈາກໂຄງການພັດທະນາພື້ນຖານໂຄງລ່າງເພື່ອສົ່ງເສີມການທ່ອງທ່ຽວໃນການສ້າງທາງປູຢາງເຂົ້າຫາຖ້ຳ ແລະສ້າງສິ່ງອຳນວຍຄວາມສະດວກໃນບໍລິເວນຖ້ຳ ແລະພາຍໃນຖ້ຳ, ຊຶ່ງຫາກທ່ານໃດໄດ້ໄປຢ້ຽມຢາມ ຫຼື ໄປທ່ອງທ່ຽວແຂວງອຸດົມໄຊກໍຢ່າລືມແວະໄປທ່ຽວຊົມແຫຼ່ງທ່ອງທ່ຽວຖ້ຳຈອມອອງຮັບຮອງວ່າທ່ານຈະບໍ່ເສຍເວລາກັບການເດີນທາງຫາກໄດ້ເຫັນຄວາມສວຍງາມຂອງຖ້ຳແຫ່ງນີ້.
ນສພ-ເສດຖະກິດ-ສັງຄົມ
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |