ແຂວງວຽງຈັນເປີດການຜະລິດລະດູແລ້ງ

  ໃນອາທິດຜ່ານມາແຂວງວຽງຈັນໄດ້ຈັດພິທີສະເຫຼີມສະຫຼອງວັນຊົນລະປະທານແຫ່ງຊາດ ແລະເປີດການຜະລິດລະດູແລ້ງປະຈຳປີ 2020 ແລະເປີດນຳໃຊ້ຊົນລະປະ ທານນໍ້າຕົງ 2, ຂຶ້ນທີ່ຊົນລະປະທານນໍ້າຕົງ 2 ເມືອງເຟືອງ, ມີທ່ານ ຄຳພະຈັນ ວົງຊະນະ ຮອງຫົວໜ້າກົມຊົນລະປະທານກະຊວງກະສິກຳ ແລະປ່າໄມ້, ທ່ານ ພູວົງ ບຸນຊູຫົວໜ້າແນກກະສິກຳ ແລະປ່າໄມ້ແຂວງວຽງຈັນ, ທ່ານ ບຸນທັນ ປັນຍາທິລາດ ປະທານບໍລິສັດກໍ່ສ້າງເຄຫາ-ຂົວທາງ ແລະຊົນລະປະທານຈຳກັດຜູ້ດຽວພ້ອມດ້ວຍບັນດາແຂກຖືກເຊີນຈາກແຂວງ, ເມືອງ, ບ້ານ ແລະກຸ່ມຜູ້ນຳໃຊ້ນໍ້າເຂົ້າຮ່ວມ.

  ທ່ານ ພູວົງ ບຸນຊູ ໄດ້ລາຍງານສະພາບການຈັດຕັ້ງປະຕິບັດວຽກງານການຜະລິດໄລຍະ 1 ປີຜ່ານມາວ່າ: ແຂວງວຽງຈັນເປັນແຂວງໜຶ່ງທີ່ມີທ່າແຮງດ້ານການຜະລິດກະສິກຳ ແລະປ່າໄມ້, ມີເນື້ອທີ່ດິນກະສິກຳກວ້າງຂວາງ, ມີແມ່ນໍ້າຫຼາຍສາຍໄຫຼຜ່ານ, ປະຊາຊົນຊາວແຂວງວຽງຈັນກໍຍຶດຖືອາຊີບປູກຝັງ, ລ້ຽງສັດເປັນຕົ້ນຕໍເພື່ອຮັບປະ ກັນການບໍລິໂພກ ແລະຜະລິດເປັນສິນຄ້າສ້າງລາຍຮັບໃຫ້ກັບຄອບຄົວ,ຮອດປະຈຸບັນທົ່ວແຂວງວຽງຈັນມີລະບົບຊົນລະປະທານທັງໝົດ 1.341 ແຫ່ງໃນນີ້,ຝາຍປະຖົມປະຖານ 887 ແຫ່ງ,ຝາຍດິນ 212 ແຫ່ງ,ຝາຍກວາຍຫີນ48 ແຫ່ງປະຕູນໍ້າ 8 ແຫ່ງ,ຝານໍ້າລົ້ນ 126 ແຫ່ງ,ອ່າງເກັບນໍ້າ 22 ແຫ່ງ ແລະຈັກສູບນໍ້າ 33 ແຫ່ງສາມາດສະໜອງນໍ້າໃຫ້ແກ່ການຜະລິດລະດູຝົນ 41,100 ເຮັກຕາ ແລະລະດູແລ້ງ 14,500 ເຮັກຕາ,ໂຄງການຊົນລະປະທານຈຳນວນໜຶ່ງໄດ້ຫັນປ່ຽນຈາກລະບົບແບບປະຖົມປຖານມາເປັນແບບຖາວອນ ແລະໂຄງການຈັກສູບນໍ້າຈຳນວນ 17 ໂຄງການ, ໄດ້ຮັບການປັບປຸງປ່ຽນລະບົບຈັກສູບນໍ້າໃໝ່ໂດຍໄດ້ຮັບທຶນຈາກລັດຖະບານອິນ ເດຍໃນມູນຄ່າ 2,44 ລ້ານໂດລາສະຫະລັດສຳລັບວຽກງານຄຸ້ມຄອງນຳໃຊ້ນໍ້າຊົນລະປະທານມາຮອດປະຈຸບັນໄດ້ສ້າງຕັ້ງກຸ່ມຜູ້ນຳໃຊ້ນໍ້າທັງໝົດ 134 ກຸ່ມ ໃນນີ້, ໄດ້ມອບ-ໂອນໃຫ້ປະຊາຊົນເປັນຜູ້ຄຸ້ມຄອງ-ນຳໃຊ້ໄປແລ້ວ 85 ໂຄງການ ແລະພັດທະນາເປັນສະມາຄົມຜູ້ຊົມໃຊ້ນໍ້າຊົນລະປະທານມີ 6 ໂຄງການ.

 ສຳລັບການຜະລິດລະດູແລ້ງສົກປີ 2019-2020 ແຂວງວຽງຈັນ ມີແຜນສະໜອງນໍ້າມີທັງໝົດ 261 ໂຄງການ,ຊຶ່ງສາມາດສະໜອງນໍ້າໃຫ້ແກ່ເນື້ອທີ່ການຜະລິດລະດູແລ້ງໄດ້ທັງໝົດ 12.083 ເຮັກຕາ, ໃນນັ້ນ, ເນື້ອທີ່ປູກເຂົ້າ 7.635 ເຮັກຕາ ແລະເນື້ອທີ່ປູກພືດທົ່ວໄປ 4.448 ເຮັກຕາ ຫຼື ເທົ່າກັບ 96,58% ຂອງແຜນ ການ (ແຜນການ 12.510 ເຮັກຕາ), ສຳລັບການຜະລິດລະດູຝົນປີ  2020  ແຜນສະໜອງນໍ້າເພື່ອກະກຽມການຕ້ານແລ້ງມີທັງໝົດ 443 ໂຄງການ, ສາມາດສະໜອງນໍ້າໃຫ້ແກ່ການຜະລິດໄດ້ທັງໝົດ 38,514 ເຮັກຕາ, ໃນນັ້ນ: ເນື້ອທີ່ປູກເຂົ້າ 35.497 ເຮັກຕາ ແລະປູກພືດ 3.017 ເຮັກຕາ ຫຼື ເທົ່າກັບ 98,84% ຂອງແຜນການ (ແຜນການ 38.964 ເຮັກຕາ), ສຳລັບຢູ່ເມືອງເຟືອງມີໂຄງການຊົນລະປະທານທັງໝົດ: 176 ໂຄງການ (ມີຝາຍປະຖົມປະຖານ 162 ໂຄງ ການ), ສາມາດສະໜອງນໍ້າໄດ້ທັງໝົດ 7.775  ເຮັກຕາ, ລະດູແລ້ງ 1.000 ເຮັກຕາ, ໃນນີ້, ໂຄງການນໍ້າຕົງ 2, ໂຄງ ການນໍ້າສັງເປັນໂຄງການທີ່ສາມາດສະ ໜອງນໍ້າໃຫ້ເນື້ອທີ່ການຜະລິດ 1.575 ເຮັດຕາ.

  ສຳລັບການຜະລິດລະດູແລ້ງສົກປີ 2020-2021 ແຂວງວຽງຈັນຈະສຸມໃສ່ການຊຸກຍູ້ການປູກເຂົ້ານາແຊງ ແລະພືດລະດູແລ້ງໃຫ້ເປັນຂະບວນການຟົດຟື້ນໂດຍສຸມໃສ່ຈຸດທີ່ກຳນົດເປັນເຂດຜະລິດສະບຽງອາຫານ ແລະຜະລິດເປັນສິນຄ້າ ແລະເປັນເຂດທີ່ຮັບປະກັນການສະໜອງນໍ້າຊົນລະປະທານເຊັ່ນ: ເມືອງທຸລະຄົມ (ໂຄງການນໍ້າມັງ, ນໍ້າປອດ); ເມືອງໂພນໂຮງ (ໂຄງການນໍ້າຊວ່ງ, ນໍ້າຈີມ); ເມືອງເຟືອງ (ໂຄງການນໍ້າຕົງ, ນໍ້າສັງ) ແລະເມືອງຊະນະຄາມ (ໂຄງການເຂດລອ່ງນໍ້າມີ້) ເພື່ອສູ້ຊົນບັນລຸຄາດໝາຍການປູກເຂົ້ານາແຊງໃຫ້ໄດ້ 10.000 ເຮັກຕາ ແລະພືດລະດູແລ້ງ 25.000 ເຮັກຕາໂດຍການເອົາໃຈໃສ່ຊຸກຍູ້, ປຸກລະດົມກຸ່ມຊາວນາ, ພໍ່ແມ່ປະຊາ ຊົນຜູ້ເຮັດການຜະລິດເປັນເຈົ້າການເຂົ້າຮວ່ມແຕ່ຫົວທີ, ພອ້ມກັນກວດກາຄືນລະບົບຫົວງານ, ອະນາໄມຄອງຊົນລະປະທານ; ກະກຽມປັດໄຈການຜະລິດເຊັ່ນ: ແນວພັນ, ຝຸ່ນ, ຢາປ້ອງກັນສັດຕູພືດ, ເຄື່ອງມືການຜະລິດເພື່ອໃຫ້ທວ່ງທັນລະດູການ.

#ຫນັງສືພິມເສດຖະກິດສັງຄົມ

แชร์