10 ເດືອນເມືອງທົ່ງມີໄຊເກັບລາຍຮັບໄດ້ 1.145 ລ້ານກີບ

   ໃນວັນທີ 4 ພະຈິກ 2020  ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍຄະນະໄດ້ລົງຢ້ຽມຢາມ ແລະເຮັດວຽກຢູ່ເມືອງທົ່ງມີໄຊແຂວງໄຊຍະບູລີ, ໃຫ້ການຕ້ອນຮັບໂດຍ ທ່ານ ສົມພອນ ໄຊດວງຕາ ເຈົ້າເມືອງ-ເມືອງທົ່ງມີໄຊ ແລະການນໍາຫຼັກແຫຼ່ງຂອງເມືອງໃຫ້ການຕ້ອນຮັບຢ່າງອົບອຸ່ນ.

  ທ່ານ ສົມພອນ ໄຊດວງຕາ ເຈົ້າເມືອງ-ເມືອງ ທົ່ງມີໄຊ ໄດ້ລາຍງານສະພາບການພັດທະນາຮອບດ້ານຂອງເມືອງໂດຍລວມແລ້ວເມືອງທົ່ງມີໄຊແມ່ນສືບຕໍ່ມີສະຖຽນລະພາບທາງດ້ານ ການເມືອງຢ່າງໜັກແໜ້ນ, ຮັກສາໄດ້ຄວາມສະຫງົບ-ປອດໄພ ແລະມີຄວາມເປັນລະບຽບຮຽບຮ້ອຍໃນສັງຄົມໂດຍພື້ນຖານ, ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງສະເລ່ຍ 8,84% ຕໍ່ປີ, ການຈັດເກັບລາຍຮັບໃນ 10 ເດືອນ 2020 ສາມາດປະຕິບັດໄດ້ທັງໝົດ 1.145 ລ້ານກີບ, ສົ່ງອອກສິນຄ້າຕ່າງເມືອງໄດ້ທັງໝົດມູນຄ່າ 4.252 ລ້ານກີບ, ນໍາເຂົ້າສິນຄ້າຈາກຕ່າງປະເທດ 8.056 ໂດລາສະຫະລັດ, ໄດ້ເອົາໃຈໃສ່ຊຸກຍູ້ສົ່ງເສີມປະຊາຊົນຜະລິດເປັນສິນຄ້າໃຫ້ຫຼາຍໂດຍເລັ່ງໃສ່ການປູກຝັງ ແລະ ລ້ຽງສັດປະເພດຕ່າງໆ ເພື່ອສ້າງລາຍຮັບໃຫ້ແກ່ຄອບຄົວເຊັ່ນ: ການປູກເຂົ້າ, ປູກສາລີ, ໝາກແຕງ, ໝາກໂມ, ໝາກເຜັດ, ໝາກເຂືອ, ຜັກ, ພືດຕະກຸນຖົ່ວຕ່າງໆ, ນອກນີ້ກໍ່ໄດ້ຊຸກຍູ້ໃຫ້ປະຊາຊົນລ້ຽງສັດໃຫຍ່ໂດຍຫັນມາປູກຫຍ້າເປັນອາຫານສັດ, ສ່ວນວຽກງານວັດທະນະທໍາ-ສັງຄົມກໍ່ໄດ້ເອົາໃຈໃສ່ປັບປຸງຄຸນ ນະພາບການຮຽນ-ການສອນ ຂອງຄູ-ອາຈານ ແລະນັກຮຽນຢ່າງໃກ້ຊິດ ແລະຕໍ່ເນື່ອງເພື່ອເຮັດໃຫ້ຄຸນນະພາບການສຶກສານັບມື້ດີຂຶ້ນ, ປັບປຸງຂອດບໍລິການດ້ານສາທາ ລະນະສຸກໃຫ້ສະດວກວ່ອງໄວນັບທັງປັບປຸງສະຖານທີ່ບໍລິການຄົນເຈັບໃຫ້ດີຂຶ້ນເທື່ອລະກ້າວ, ເອົາໃຈໃສ່ປ້ອງກັນ, ຕ້ານ ແລະສະກັດກັ້ນການແຜ່ລະບາດຂອງພະຍາດໂຄ ວິດ-19 ຢ່າງເຂັ້ມງວດ ແລະສົ່ງເສີມໃຫ້ປະຊາຊົນອະນຸລັກປົກປັກຮັກສາແລະເສີມຂະຫຍາຍຮີດຄອງປະເພນີຂອງທ້ອງຖິ່ນໄວ້ໃຫ້ໝັ້ນຄົງ,

  ໂອກາດດັ່ງກ່າວ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີກໍ່ໄດ້ເນັ້ນໜັກໃຫ້ການນໍາທຸກພາກສ່ວນຂອງເມືອງຈົ່ງເອົາໃຈໃສ່ຕ້ານ ແລະ ສະກັດກັ້ນບັນຫາປະ ກົດການຫຍໍ້ທໍ້ໃນສັງຄົມ, ປ້ອງກັນການລັກລອບນໍາເຂົ້າພາຫະນະທີ່ບໍ່ຖືກຕ້ອງ, ການລັກລອບ ຕັດໄມ້ເຂດຊາຍແດນແລະປ່າສະຫງວນ, ພ້ອມທັງເອົາໃຈໃສ່ປູກໄມ້ ໃຫ້ເປັນປ່າ, ສ້າງອ່າງເກັບນໍ້າຢູ່ບັນດາຫ້ວຍຕ່າງໆທີ່ເຫັນວ່າມີຄວາມເໝາະສົມເພື່ອກັກເກັບນໍ້າໄວ້ໃຊ້ໃນລະດູແລ້ງ, ຮັກສາໃຫ້ໄດ້ຄວາມສະຫງົບຢູ່ບັນດາບ້ານລຽບຕາມຊາຍ ແດນ, ສືບຕໍ່ເກັບລາຍຮັບໃຫ້ໄດ້ຕາມແຜນການທີ່ວາງໄວ້, ປັງປຸງການຮຽນ-ການສອນໃຫ້ມີຄຸນນະພາບ ແລະລົງໂຄສະນາວຽກງານສຸຂະສືກສາໃຫ້ທົ່ວເຖິງ.

-------------

ຂຽນໂດຍ: ອຸ່ນເຮືອນ ໂພທິລັກ

ຮູບພາບ: #ຫນັງສືພິມເສດຖະກິດສັງຄົມ

แชร์