ລາວ-ອາເມລິກາ ຫາລືສ້າງຄວາມເຂັ້ມແຂງດ້ານການບິນ

  ກອງປະຊຸມສຳມະນາກ່ຽວກັບສົນທິສັນຍາເຄັບທາວ Cape Town Convention ເພື່ອປຶກສາຫາລືແນວທາງການປະຕິບັດທີ່ດີທີ່ສຸດເພື່ອສ້າງຄວາມເຂັ້ມແຂງໃຫ້ແກ່ບັນຍາກາດທາງດ້ານທຸລະກິດທີ່ກ່ຽວຂ້ອງກັບຜູ້ຖືກຳມະສິດເປັນເຈົ້າຂອງເຮືອບິນ ແລະການສະໜອງທຶນຢູ່ໃນ ສປປ ລາວ ໄດ້ຈັດຂຶ້ນໃນວັນທີ 20 ກຸມພາ 2019 ທີ່ນະຄອນຫຼວງວຽງຈັນ ໂດຍສະຖານທູດສະຫະລັດອາເມລິກາຮ່ວມກັບກົມການບີນພົນລະເຮືອນກະຊວງໂຍທາທິການ ແລະຂົນສົ່ງ, ເຊິ່ງໄດ້ຮັບການສະໜັບໜູນຈາກບໍລິສັດ General Electric (GE) ແລະໂບອິ້ງ.  

 ທ່ານ ສັນຕິສຸກ ສີມມະລາວົງ, ຮອງລັດຖະມົນຕີ ກະຊວງໂຍທາທິການ ແລະຂົນສົ່ງ ກ່າວ່າ: ກອງປະຊຸມຄັ້ງນີ້ຈັດຂຶ້ນເພື່ອສົ່ງເສີມໃຫ້ຜູ້ເຂົ້າຮ່ວມຈາກພາກລັດຖະບານ, ຜູ້ຊ່ຽວຊານດ້ານກົດໝາຍ ແລະຜູ້ນຳດ້ານທຸລະກິດເພື່ອຍາດເອົາໂອກາດໃນການສ້າງຄວາມເຂັ້ມແຂງໃຫ້ແກ່ບັນຍາກາດທາງດ້ານທຸລະກິດ ແລະເພື່ອຂະຫຍາຍຄວາມເຕີບໂຕຂອງອຸດສາຫະກຳການບິນ ໃນ ສປປ ລາວ.

  ທ່ານນາງ ຣີນາ ບິດເຕີ ເອກອັກຄະລັດຖະທູດ ສະຫະລັດອາເມລິກາປະຈຳ ສປປ ລາວ ກ່າວວ່າ: ສົນທິສັນຍາເຄັບທາວ ແມ່ນໃຫ້ຜົນປະໂຫຍດແກ່ທຸກໆຝ່ າຍ, ຜູ້ດໍາເນີນການສາມາດຊື້ ຫຼື ເຊົ່າເຮືອບິນໃນລາຄາທີ່ຖືກລົງຫຼາຍ, ນອກນີ້ ຜູ້ຜະລິດເຮືອບິນ ແລະຜູ້ໃຫ້ເຊົ່າ ຍັງສາມາດເຂົ້າເຖິງໂອກາດຂອງຕະຫຼາດໃໝ່ ໂດຍມີຄວາມສ່ຽງໜ້ອຍລົງ, ຊຶ່ງການລົງນາມໃຫ້ສັດຕະຍາບັນໃນສົນທິສັນຍາເຄັບທາວແມ່ນຄວາມພະຍາຍາມ ແລະຫົນທາງທີ່ຖືກຕ້ອງສໍາລັບບັນດາປະເທດ ໃນການເສີມຂະຫຍາຍຂະແໜງການບິນ ແລະຍັງເປັນການປະຢັດຄ່າໃຊ້ຈ່າຍນຳອີກ. ພ້ອມນີ້ ຍັງເປັນການສົ່ງເສີມການທ່ອງທ່ຽວ ແລະ ສົ່ງເສີມການເຊື່ອມໂຍງໃນພາກພື້ນໃຫ້ຫຼາຍຂຶ້ນ. ຍ້ອນເຫດຜົນດັ່ງກ່າວ, ຈຶ່ງມີຫຼາຍກວ່າ 70 ປະເທດ ທີ່ເປັນພາຄີໃນສົນທິສັນຍາສະບັບນີ້ ເຊິ່ງລວມເອົາເຖິງບັນດາປະເທດໃນອາຊຽນເຊັ່ນ: ມຽນມ້າ, ສສ ຫວຽດນາມ, ມາເລເຊຍ, ສິງກະໂປ ແລະອິນໂດເນເຊຍ. ນອກຈາກນີ້ ຍັງມີບັນດາຜູ້ນຳທາງດ້ານທຸລະກິດຈາກຫຼາຍປະເທດໄດ້ເຂົ້າຮ່ວມເຊິ່ງລວມມີ 10 ພາກສ່ວນເອກະຊົນທີ່ເປັນສະມາຊິກຈາກ ສປປ ລາວ ເຊັ່ນ: ບັນດາທະນາຄານ, ບໍລິສັດກົດໝາຍ, ສະພາການຄ້າ ແລະອຸດສາຫະ ກຳແຫ່ງຊາດລາວ.

ເຂົ້າຮ່ວມກອງປະຊຸມດັ່ງກ່າວມີ ທ່ານ ອາລຸນແກ້ວ ກິດຕິຄຸນ ລັດຖະມົນຕີປະຈໍາສໍານັກງານນາຍົກ, ແລະບັນດາຜູ້ບັນຍາຍທີ່ມາຈາກໜ່ວຍງານບໍລິຫານການບິນພົນລະເຮືອນຂອງ ສະຫະລັດ ອາເມລິກາ U.S. Federal Aviation Administration (FAA), ການບິນພົນລະເຮືອນຈາກ ສສ ຫວຽດນາມ, ຜູ້ຊ່ຽວຊານດ້ານກົດໝາຍ, ບໍລິສັດກົດໝາຍສິງກະໂປ ແລະຜູ້ຊໍານານການສະເພາະດ້ານຈາກບໍລິສັດໂບອີ້ງ ແລະບໍລິສັດ GE.

ນສພ ເສດຖະກິດ-ສັງຄົມ

แชร์