ເຊັນສັນຍາກໍ່ສ້າງຊົນລະປະທານນໍ້າກະຕະ ເມືອງບົວລະພາ

   ວັນທີ 6 ພະຈິກຜ່ານມາທີ່ນະຄອນຫຼວງວຽງຈັນໄດ້ມີພິທີເຊັນສັນຍາການກໍ່ສ້າງໂຄງການຊົນລະປະທານຕົວແບບນໍ້າກະຕະເມືອງບົວລະພາ ແຂວງຄຳມ່ວນ ຊຶ່ງລົງ ນາມສັນຍາລະຫວ່າງທ່ານ ບຸນຄຳ ສີດາວົງ ຫົວໜ້າກົມຊົນລະປະທານ, ກະຊວງກະສິກຳ ແລະປ່າໄມ້ ແລະທ່ານ ແຫຼວຄຳ ວົງສາວັນທອງ ຜູ້ອຳນວຍການໃຫຍ່ບໍລິສັດອິນຊີພັດທະນາກໍ່ສ້າງຈຳກັດ ໂດຍເຂົ້າຮ່ວມຂອງທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະປ່າໄມ້, ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍ ເຂົ້າຮ່ວມ.

ໂຄງການຊົນລະປະທານຕົວແບບນໍ້າກະຕະເມືອງບົວລະພາແຂວງຄຳມ່ວນມີເນື້ອທີ່ໂຄງການທັງໝົດ 300 ເຮັກຕາ ໃນນັ້ນລະດູແລ້ງ 60 ເຮັກຕາແລະລະດູຝົນ 270 ເຮັກຕາກວມເອົາເນື້ອທີ່ 3 ບ້ານຄື: ບ້ານນາສົມບູນ, ບ້ານທ່າແຮ່ ແລະບ້ານນາພະນັງ, ໂຄງການດັ່ງກ່າວແມ່ນເພື່ອພັດທະນາພື້ນຖານໂຄງລ່າງດ້ານຊົນລະປະທານນໍ້າກະຕະໃຫ້ກາຍເປັນໂຄງການຕົວແບບລວມມີວຽກກໍ່ສ້າງຟື້ນຟູລະບົບຊົນລະປະທານ, ການຈັດຕັ້ງກຸ່ມນຳໃຊ້ນໍ້າ, ສົ່ງເສີມການຜະລິດກະສິກຳເພື່ອເປັນການສ້າງຄວາມເຂັ້ມແຂງໃຫ້ຊາວກະສິກອນໃນການຜະລິດສະບຽງອາຫານ ແລະຜະລິດເປັນສິນຄ້າເພື່ອໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ.

 ໂຄງການດັ່ງກ່າວໄດ້ຮັບທຶນຊ່ວຍເຫຼືອລ້າຈາກອົງການຝຣັ່ງເພື່ອພັດທະນາ (AFD) ໃນມູນຄ່າລວມທັງໝົດ 4,8 ລ້ານເອີໂຣ ໃນນັ້ນ 4,5 ລ້ານເອີໂຣ ແມ່ນຊ່ວຍເຫຼືອລ້າຈາກ AFD ແລະ 3 ແສນເອີໂຣ ແມ່ນຂອງລັດຖະບານລາວ ແລະຜູ້ໄດ້ຮັບຜົນປະໂຫຍດຈາກໂຄງການ, ຊຶ່ງງົບປະມານດັ່ງກ່າວໃຊ້ເຂົ້າໃນການພັດທະນາວຽກງານຄື: 1) ການກໍ່ສ້າງພື້ນຖານໂຄງລ່າງລະບົບຊົນລະປະທານ, 2) ສ້າງຄວາມອາດສາມາດດ້ານການຄຸ້ມຄອງນຳໃຊ້, ການສົ່ງເສີມການຜະລິດແລະການຕະຫຼາດ, 3) ຖອດຖອນບົດຮຽນ ແລະເຜີຍແຜ່ສູ່ໂຄງການອື່ນໆທີ່ຄ້າຍຄື.

  ຊຶ່ງໂຄງການໄດ້ເລີ່ມສຶກສາຄວາມເປັນໄປໄດ້ແຕ່ປີ 2014 ຮອດປີ 2016 ຈຶ່ງໄດ້ຮັບການອະນຸມັດທຶນຊ່ວຍເຫຼືອລ້າຈາກ AFD, ໃນປີ 2018-2019 ຈຶ່ງມີການສຳ ຫຼວດ-ອອກແບບລະອຽດຂອງໂຄງການໂດຍແມ່ນບໍລິສັດ SCP-CES ຂອງຝຣັ່ງ,ໃນປີ 2020 ໄດ້ຮັບຮອງການອອກແບບການກໍ່ສ້າງໂຄງການຈາກກົມຊົນລະປະທານ ໂດຍແມ່ນບໍລິສັດອິນຊີພັດທະນາກໍ່ສ້າງຈຳກັດເປັນຜູ້ຮັບເໝົາກໍ່ສ້າງໃນມູນຄ່າຕາມສັນຍາ 2,28 ລ້ານໂດລາໄລຍະສັນຍາ 1 ປີ.

แชร์