ສຟລ ກຽມຈັດງານວາງສະແດງຜະລິດຕະພັນເຟີນິເຈີໄມ້ລາວຄັ້ງທີ 7

ສະມາຄົມເຟີນີເຈີລາວ (ສຟລ) ກຽມຈັດງານວາງສະແດງຜະລິດຕະພັນສິນເຟີນີເຈີໄມ້ລາວຄັ້ງທີ 7 ປະຈໍາ ປີ 2021 ຂຶ້ນໃນລະຫວ່າງວັນທີ 9-17 ມັງກອນ 2021 ທີ່ຕຶກເກົ່າສູນການຄ້າລາວ-ໄອເຕັກ ນະຄອນຫຼວງວຽງຈັນ ຊຶ່ງມາຮອດປະຈຸບັນການກະກຽມງານຂອງຄະນະຮັບຜິດຊອບແມ່ນມີຄວາມພ້ອມແລ້ວ 60% ທັງນີ້ຄາດວ່າງານຈະມີຄວາມຄຶກຄັກກວ່າຄັ້ງກ່ອນໆ.

  ທ່ານ ກອງມາລາ ພົມມາໄລ, ຮອງປະທານສະມາຄົມເຟີນິເຈີລາວ, ຜູ້ຊີ້ນໍາການຈັດງານວາງສະແດງຜະລິດຕະພັນເຟີນິເຈີໄມ້ລາວຄັ້ງທີ 7 ເປີດເຜີຍໃຫ້ຮູ້ວ່າ: ການຈັດງານຄັ້ງນີ້ເຖິງຈະຜ່ານວິດກິດໂຄວິດ-19 ແຕ່ຄາດຄະເນຈະມີມູນຄ່າຊື້-ຂາຍທັງໝົດປະມານ 10 ຕື້ກີບ ຈາກຜູ້ທີ່ຈະເຂົ້າຊົມງານ 2 ແສນຄົນ ທັງນີ້ກໍເພື່ອປະຕິບັດຕາມນະໂຍບາຍໃນການສົ່ງເສີມການຜະລິດເຄື່ອງເຟີນີເຈີໄມ້ລາວທັງເປັນການໂຄສະນາເຜີຍແຜ່ໃຫ້ສັງຄົມຮັບຮູ້ຜະລິດຕະພັນເຟີນີເຈີໄມ້ລາວຫຼາຍຂຶ້ນໃຫ້ຜູ້ຜະລິດສາ ມາດເຂົ້າຫາຕະຫຼາດ ແລະຈຳໜ່າຍສີນຄ້າໄດ້ທັງພາຍໃນ ແລະຕ່າງປະເທດກ້າວເຂົ້າສູ່ການສ້າງຕາໜ່າງການວາງສະແດງ-ຂາຍສີນຄ້າເຟີນີເຈີກັບພາກພື້ນ ແລະສາກົນໃນອະນາຄົດ.

   ພ້ອມດຽວກັນນັ້ນກໍເພື່ອຜັນຂະຫຍາຍຕາມເນື້ອໃນຂອງແຈ້ງການຄໍາສັ່ງ ເລກທີ 15/ນຍ ໃຫ້ປະກົດຜົນເປັນຈິງ, ເປັນການອະນຸລັກຮັກສາປ່າໄມ້, ການນຳໃຊ້ໄມ້ໃຫ້ເກີດປະໂຫຍດສູງສຸດ ແລະມີໄມ້ໄວ້ໃຊ້ຢ່າງຍືນຍົງໂດຍການປຸງແຕ່ງໃຫ້ເປັນຜະລິດຕະພັນສຳເລັດຮູບຈາກໄມ້, ຫວາຍ ແລະໄມ້ປ່ອງ ໃຫ້ມີຫຼາກຫຼາຍຜະລິດຕະພັນຕາມທີ່ສັງຄົມປະຈຸບັນຕ້ອງການ ແລະເປັນທີ່ນິຍົມກັນຢູ່ດ້ວຍການນຳໃຊ້ເຕັກໂນໂລຊີທີ່ທັນສະໄໝ ແລະທັງເປັນການສ້າງມູນຄ່າເພີ່ມໃຫ້ກັບຜະລິດຕະພັນເຟີນີເຈີໄມ້ລາວໃຫ້ກາຍເປັນສີນຄ້າທີ່ມີຄຸນນະພາບ ແລະລາຄາສູງກົງຕາມຄວາມຕ້ອງການຂອງລູກຄ້າ ແລະຕະຫຼາດເຮັດໃຫ້ສາມາດສົ່ງອອກຕ່າງປະເທດໄດ້, ຍັງເປັນການສ້າງວຽກເຮັດ ງານທຳໃຫ້ກັບປະຊາຊົນບັນດາເຜົ່າ, ຕ້ານໄພວ່າງງານ ແລະຊ່ວຍໃຫ້ຫຼຸດພົ້ນຈາກຄວາມທຸກຍາກຕື່ມອີກໃນອະນາຄົດ, ສົ່ງເສີມ ແລະສ້າງຄວາມເຂັ້ມແຂງໃຫ້ກັບສີໄມ້ລາຍມືຂອງຄົນລາວເຮົາ ແລະຫົວໜ່ວຍທຸລະກິດເຟີນີເຈີໄມ້ລາວໃຫ້ຂະຫຍາຍໂຕ ແລະສາມາດເຂົ້າສູ່ຕະຫຼາດພາກພື້ນ ແລະສາກົນໄດ້ໃນອະນາຄົດ, ສືບຕໍ່ຈາກການຈັດ ງານວາງສະແດງສີນຄ້າໃນຄັ້ງກ່ອນໃຫ້ຕໍ່ເນື່ອງ ແລະ ຍືນຍົງໂດຍໃນປີ 2020 ທາງສະມາຄົມແມ່ນໂຈະການວາງສະແດງເນື່ອງຈາກການລະບາດຂອງພະຍາດໂຄວິດ- 19.

   ທ່ານ ກອງມາລາ ພົມມາໄລ ກ່າວວ່າ: ມາຮອດປະຈຸບັນແມ່ນເລີ່ມມີຫົວຫນ່ວຍທຸລະກິດຈັບຈອງພື້ນທີ່ແດ່ແລ້ວທີ່ມາຈາກນະຄອນຫລວງວຽງຈັນ ແລະ ຕ່າງແຂວງ ນອກຈາກນີ້ຍັງຈະມີຫົວໜ່ວຍທຸລະກິດໂອດັອບຈຳນວນຫນຶ່ງຊຶ່ງກິດຈະກໍາໃນງານມີການວາງສະແດງຊື້-ຂາຍສິນຄ້າ, ຍັງຈະມີການສາທິດການຜະລິດເຄື່ອງເຟີນີເຈີໄມ້ ແລະແກະສະຫຼັກໄມ້, ຈົກສະຫຼາກຊີງລາງວັນ, ມີການສະແດງສີນລະປະ ແລະອີກຫລາກຫລາຍກິດຈະກຳທີ່ໜ້າສົນໃຈຕື່ມອີກ.

แชร์