ນໍ້າຕານມິດລາວກວດສອບຊີງຊັ່ງ

  ວັນທີ 5 ພະຈິກຜ່ານມາທີ່ບໍລິສັດ ນໍ້າຕານມິດລາວ ບ້ານແກ້ງແຮດ ເມືອງໄຊບູລີ ແຂວງສະຫວັນນະເຂດ, ໄດ້ຈັດພິທີກວດກາວັດແທກຊີງຊັ່ງອ້ອຍຂອງບໍລິສັດດັ່ງກ່າວຂຶ້ນ, ໂດຍການເຂົ້າຮ່ວມຂອງທ່ານ ສີວິໄລ ອິນທະລືໄຊ ຮອງເຈົ້າເມືອງໄຊບູລີ, ທ່ານ ບຸນເຄືອບ ແກ້ວມະນີ ຮອງຫົວໜ້າພະແນກວິທະຍາສາດ ແລະເຕັກໂນໂລຊີແຂວງ,
ທ່ານ ສະອາດ ປັນຍາດິດວົງ ຜູ້ອຳນວຍການດ້ານອ້ອຍບໍລິສັດນໍ້າຕານມິດລາວພ້ອມດ້ວຍວິຊາການຈາກກົມມາດຕະຖານ ແລະວັດແທກກະຊວງວິທະຍາສາດ ແລະເຕັກໂນໂລຊີຕະຫຼອດເຖິງຕົວແທນຊາວສວນອ້ອຍເຂົ້າຮ່ວມ.

   ຈຸດປະສົງໃນການກວດກາວັດແທກຊິງຊັ່ງອ້ອຍຂອງບໍລິສັດນໍ້າຕານມິດລາວຈຳກັດປະຈຳປີ 2020-2021 ນີ້, ກໍ່ເພື່ອເປັນການຮັບປະກັນທາງດ້ານຊິງຊັ່ງນໍ້າໜັກທີ່ໄດ້ມາດຕະຖານ,ຍຸຕິທຳລະຫວ່າງຜູ້ຊື້ ແລະຜູ້ຂາຍຄືບໍລິສັດນໍ້າຕານມິດລາວກັບຊາວສວນອ້ອຍ,ຊຶ່ງໃນແຕ່ລະປີທາງກົມມາດຕະຖານ ແລະວັດແທກກະຊວງວິທະຍາສາດ ແລະເຕັກໂນໂລຊີຈະໄດ້ລົງກວດກາວັດແທກຊີງຊັ່ງອ້ອຍຂອງບໍລິສັດນໍ້າຕານມິດລາວປີລະຄັ້ງ. ໃນນີ້ທາງວິຊາການກົມມາດຕະຖານ ແລະວັດແທກແມ່ນໄດ້ທຳການກວດເຊັກຂາໂຫຼດເຊວທັງ 6 ຂາ, ໂດຍກວດກາໄປແຕ່ລະຂາ, ຫຼັງຈາກນັ້ນແມ່ນໄດ້ເອົາແມ່ແບບມາຢາຍໝົດແຜ່ນເມື່ອເຫັນວ່າຊີງຊັ່ງໄດ້ມາດຕະຖານແລ້ວທາງພາກສ່ວນທີ່ ກ່ຽວຂ້ອງຈຶ່ງໄດ້ທຳການລັອກກິບ ແລະ ຫົວອ່ານຄອມພີວເຕີຢ່າງຄັກແນ່ເພື່ອ ຮັບປະກັນດ້ານມາດຕະຖານ.

 ໂອກາດນີ້,ທ່ານ ສະອາດ ປັນຍາດິດວົງ ຜູ້ອຳນວຍການດ້ານອ້ອຍຂອງບໍລິສັດນໍ້າຕານມິດລາວຍັງໄດ້ໃຫ້ສຳພາດຕໍ່ຜູ້ສື່ຂ່າວພວກເຮົາວ່າ: ທາງບໍລິສັດຈະໄດ້ເປີດຫີບອ້ອຍໃນຄັ້ງວັນທີ 17 ທັນວາ ໄປຈົນຮອດເດືອນມີນາ 2021 ຄາດວ່າປີນີ້ຈະມີອ້ອຍປ້ອນເຂົ້າໂຮງງານປະມານ 4 ແສນໂຕນ, ຊຶ່ງຈະຫຼຸດລົງຈາກປີຜ່ານມາປະມານ 1 ແສນໂຕນ. ສາເຫດແມ່ນເນື່ອງມາຈາກປະລິມານນໍ້າຝົນໜ້ອຍກວ່າປີຜ່ານມາ ແລະປີນີ້ເປັນປີທີ່ຊາວສວນອ້ອຍພັກດິນເພື່ອມາປູກອີກໃນປີຕໍ່ໄປຈຶ່ງເຮັດໃຫ້ອ້ອຍເຫຼືອປະມານ 4 ແສນໂຕນ. ປີນີ້ມີອ້ອຍທີ່ປູກທັງໝົດໃນເນື້ອທີ່ 7.200 ເຮັກຕາ, ລວມທັງເນື້ອທີ່ຂອງບໍລິສັດ ແລະຂອງປະຊາຊົນ. ສ່ວນວ່າລາຄາອ້ອຍຈະມີ 3 ປະເພດຄື: ອ້ອຍຊີວະພາບລາຄາ 337.500 ກີບ/ໂຕນ, ອ້ອຍງາມ 350.000 ກີບ/ໂຕນ ແລະອ້ອຍປ່ຽນຖ່າຍ 312.500 ກີບ/ໂຕນ. ນອກນັ້ນທາງບໍລິສັດຍັງມີໂບນັດໃຫ້ກັບຊາວສວນອ້ອຍຕື່ມອີກເປັນຕົ້ນ: ອ້ອຍງາມ, ຕັດອ້ອຍແລ້ວຈົ່ງໃບໄວ້ໃນດິນສວນອ້ອຍ ແລະລາງວັນອື່ນໆອີກ.

------------

ຂ່າວ: ສະຫວັນ, 

ຮູບພາບ: ໜັງສືພິມເສດຖະກິດ-ສັງຄົມ

แชร์