ງານສະແດງລົດຄັ້ງນີ້ຄາດຍອດຂາຍເພີ່ມ 40%

   ງານວາງສະແດງລົດນາໆຊາດວຽງຈັນຄັ້ງທີ 5 ຫຼື vientine international motor Expo 2020 ໄດ້ເປີດຢ່າງເປັນທາງການໃນວັນທີ 9 ພະຈິກທີ່ສູນການຄ້າລາວ-ໄອເຕັກ ໂດຍການເຂົ້າຮ່ວມຂອງທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມການຄ້າ,ທ່ານນາງ ຈັນທະຈອນ ວົງໄຊ ຮອງປະທານສະພາການຄ້າ ແລະອຸດສາຫະກໍາແຫ່ງຊາດ, ມີທ່ານຮອງຫົວໜ້າກົມການນໍາເຂົ້າ ແລະສົ່ງອອກ, ຫົວໜ້າພະແນກຍານພາຫະນະ ແລະກົນຈັກ, ກົມຂົນສົ່ງພ້ອມດ້ວຍນັກທຸລະກິດ ແລະຜູ້ປະກອບການລົດຫຼາຍຄ້າຍເຂົ້າຮ່ວມຊຶ່ງຄາດວ່າຈະມີການຊື້-ຂາຍເພີ່ມຂຶ້ນ 40% ທຽບໃສ່ປີຜ່ານມາ.

  ທ່ານ ພອນຈັນ ເພັງສຸວັນ ຜູ້ອໍານວຍການບໍລິສັດ ພີພີເອັນເຕີ້ເທນເມັນ ຈໍາກັດ ຜູ້ດຽວ ກ່າວວ່າ: ງານຄັ້ງນີ້ເລີ່ມຈັດຂຶ້ນແຕ່ວັນທີ 7-15 ພະຈິກ 2020 ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ, ເພື່ອເພີ່ມການສ້າງໂອກາດໃຫ້ແກ່ຜູ້ປະກອບການທາງດ້ານທຸລະກິດລົດ ແລະໂຄສະນາໃຫ້ຄວາມຮູ້ກ່ຽວກັບນະວັດຕະກຳໃໝ່ໆກ່ຽວກັບລົດ, ເພື່ອຍົກລະດັບຂີດຄວາມສາມາດໃນການແຂ່ງຂັນທາງດ້ານການຄ້າ ແລະຍົກສູງຄຸນະພາບໃນການຊົມໃຊ້ພະຫະນະໃນແຕ່ລະລຸ້ນ,ເພື່ອເພີ່ມທາງເລືອກໃຫ້ແກ່ຜູ້ບໍລິໂພກໄດ້ເລືອກຊື້ລົດທີ່ມີຄຸນະພາບ ແລະລາຄາສົມເຫດສົມຜົນ,ຊຶ່ງພາຍໃນງານປະກອບມີຄ້າຍລົດຕ່າງໆເຂົ້າຮ່ວມເຊັ່ນ: ຮອນດ້າ, ໂຕໂຢຕ້າ, ນິສັນ,ມາສສະດາ,

ເອັມຈີ, SUZUKI, FORD, ອີຊູຊຸ, ເອຈີຊີ, ຈີເອຊີ ແລະ VOLKSWAGEN, ພ້ອມນີ້ກໍມີບໍລິສັດສິນເຊື່ອ ແລະປະກັນໄພທີ່ຄອຍໄວ້ໃຫ້ບໍລິການຄໍາແນະນໍາສໍາລັບ ທຸກຄົນທີ່ມີແຜນຈະຊື້ລົດໃໝ່, ໂດຍພາຍໃນງານປະກອບດ້ວຍກິດຈະກຳແຈກກູປ່ອງປ່ອນບັດຊີງໂຊກຂອງບັນດາຄ້າຍລົດຕ່າງໆ ເພື່ອຮັບສິດທີພິເສດການລຸ້ນຮັບລົດຈັກ ແລະ ເຄື່ອງອຸປະກອນຕົບແຕ່ງລົດມູນຄ່າຫຼາຍກວ່າ 100 ລ້ານກີບ, ພ້ອມນີ້ຢູ່ເດີ່ນໜ້າໄອເຕັກຍັງມີສູນບໍລິການຫຼັງການຂາຍໄວ້ຄອຍໃຫ້ບໍລິການກວດເຊັກສະພາບລົດ 30 ລາຍການ ໃຫ້ກັບທຸກຄົນທີ່ມາໃນງານແບບບໍ່ເສຍຄ່າ.

  ນອກຈາກນີ້ບັນດາຄ້າຍລົດຕ່າງໆ ເຊັ່ນ: ໂຕໂຢຕ້າ, ມາສສະດາ ແລະ VOLKSWAGEN ກໍໄດ້ມີການເປີດໂຕລົດລຸ້ນໃໝ່ໃນນີ້ VOLKSWAGEN ໄດ້ເປີດໂຕລົດ TAYRON X ຈັກ 2000cc, ຊຶ່ງຄາດວ່າຈະກະຕຸ້ນເສດຖະກິດໃຫ້ມີການຂະຫຍາຍໂຕ, ມີການບໍລິການ ແລະມີການຊື້-ຂາຍລົດພາຍໃນງານເພີ່ມຂຶ້ນ 40% ທຽບໃສ່ປີຜ່ານມາ, ຈະມີຜູ້ເຂົ້າມາຊົມງານວາງສະແດງ 1 ແສນຄົນ ແລະຄາດວ່າຈະມີຜູ້ມາໃຊ້ບໍລິການກວດກາເຊັກລົດກັບບັນດາຄ້າຍລົດຕ່າງໆ 300 ຄັນ.

------------------------ສະໜັບສະໜູນໂດຍ: HONDA

ຮູບພາບ: #ຫນັງສືພິມເສດຖະກິດສັງຄົມ

แชร์